Муус устар 10 күнүгэр Балыктаах эбэтигэр «Керлинг» спорт олимпийскай көрүҥэр нэһилиэкпитигэр аан бастакынан турнир буолан ааста. Керлинг күрэҕин биһиги биир дойдулаахпыт Варвара Игоревна кэргэнинээн Кузьма Иннокентьевич Березкиннар дьиэ кэргэн уонна олохтоох култуура дьиэтин көҕүлээһиннэринэн ыытылынна. Керлинг диэн, мууска хамаанданан оонньооһун. Хамаандалар уочаратынан мууска анал снаряды ыытан, бэлиэтэммит сиргэ тиэрдиэхтээхтэр. Снаряд тустаах сиригэр үчүгэйдик барарын, эбэтэр утарсааччы снарядтарын туоратарын инниттэн анал суокканан сотоллор. Кыайыылааҕынан, хас түһүмэх аайы элбэх очукуону ылбыт хамаанда ааттанар.
Турнир саҕаланыан иннинэ аал-уот оттон, бүгүҥҥү турнир этэҥҥэ ааһарыгар сиэр-туом толорулунна.
Ол кэннэ Варвара Игоревна, Кузьма Иннокентьевич бу спорт көрүҥэ хайдах тэриллэн барарыгар маастар-кылаас ыыттылар, ону сэргэ бүгүҥҥү турнир быраабылатын билиһиннэрдилэр.
Керлинг турнирга барыта 2-лии киһилээх 8 хамаанда, ол курдук «Дохсун» хамаанда: Семен Ноговицын, Петр Дохунаев, «Эрчим» хамаанда: Сайдам, Андрей Винокуровтар, «ОО» хамаанда: Егор Афанасьев, Игорь Стручков, «Дьулуур» хамаанда: Гаврил Дьяконов, Николай Цыпандин, «Дьулурхан» хамаанда: Илья Шишигин, Айаал Протодьяконов, «Мохсоҕоллор» хамаанда: Сергей Мохначевский, Данил Иванов, «Эрэл» хамаанда: Татьяна Иванова, Лилия Долгунова, «Саас» хамаанда: Елена Гоголева, Володя Артемьев хара маҥнайгыттан бэрт сытыы киирсиилэри көрдөрөн, А уонна Б группаҕа арахсан, круговой систиэмэнэн илин-кэлин түсүһэ күөн көрүстүлэр.
Түмүгэр финалга «ОО» уонна «Дьулуур» хамаандалар бастакы миэстэ иһин тыҥааһыннаах, ыһыылаах-хаһыылаах, бэрт эрийсиилээх оонньууну көрдөрдүлэр. Бэрт кыранан чорбойон инники таҕыстылар уонна турнир кыайыылааҕынан «ОО» хамаанда (Егор Афанасьев, Игорь Стручков) буолан чемпион аатын сүктүлэр, анал грамотанан, мэтээлинэн уонна Артемьева М.В., Артемьева Ж.И. олохтообут анал бириистэринэн наҕараадаланнылар.
Бэрт кыранан хаалан 2-с бириистээх миэстэни ылары ситистилэр «Дьулуур» хамаанда (Николай Цыпандин, Гаврил Дьяконов) анал грамотанан, мэтээлинэн уонна А.Е., И.В. Стручковтар дьиэ кэргэн олохтообут анал бириистэринэн наҕараадаланнылар.
3-с бочуоттаах миэстэҕэ тигистилэр «Эрчим» хамаанда (Сайдам, Андрей Винокуровтар) анал грамотанан, мэтээлинэн уонна А.Е., И.В. Стручковтар дьиэ кэргэн олохтообут анал бириистэринэн наҕараадаланнылар.
Ону сэргэ анал номинациялар туттарылыннылар:
«Саамай аҕам саастаах кыттааччы» — Егор Афанасьев, «Саамай эдэр кыттааччы» — Айаал Протодьяконов, «Бастыҥ оонньооччу» — Сайдам Винокуров, «Бастыҥ быраҕааччы» — Николай Цыпандин, Лилия Долгунова, Петр Дохунаев. Номинация кыайыылаахтарын спонсордарынан буоллулар: Е.И., О.В. Стручковтар, Л.В., А.Н. Винокуровтар, С.Б. Артемьева, Н.Л.Кириллин, А.Е., И.В. Стручковтар дьиэ кэргэттэрэ.
Маны сэргэ бүгүҥҥү турнир бары кыттааччыларыгар Саха Республикатын «Керлинг» федерациятын сертификаттара туттарылыннылар:
Турнир ыытыллар кэмигэр көрөөччүлэри уонна бары күрэхтэһээччилэри урукку кэми санатан, олохтоох култуура дьиэтин коллектива самоварга оргутуллубут итии чэйинэн, аныгы сиэринэн кофенан, саха мааны аһынан алаадьынан күндүлээтилэр, маны таһынан Надежда Ченянова, Мария Алексеевна Захарова сылаас аһынан атыы-тутуу тэрийэн, күүс-көмө буолбуккутугар сылаас махтал тылларын аныыбыт.
Бастакы күрэхтэһии үрдүк тэрээһиннээхтик ыытыллыбытын, кыттааччылар уонна көрөөччүлэр бары биир киһи курдук астына-дуоһуйа бэлиэтээтилэр, ыытыллыбыт спорт саҥа көрүҥүн Керлинг турнирын нэһилиэкпит олохтоохторо сүрдээҕин сэҥээрдилэр. Дьиҥ чахчы бу күн спорт уонна доҕордоһуу бырааһынньыгынан буолла.
Бу олимпийскай көрүҥү нэһилиэкпитигэр саҥа арыйааччылар диэтэххэ, хамаандалар бары үчүгэй оонньууну көрдөрдүлэр. Кырдьык, биһиэхэ керлинг саҥа сайдан эрэрин быһыытынан, спортсменнар бу көрүҥ быраабылатын дьүүллэһэн уонна бэйэлэрэ күрэхтэһэн көрөн үөрэннилэр, билистилэр уонна киһи оонньуон сөптөөх эбит, киһи интэриэһин сүрдээҕин тардар оонньуу эбит диэн астыннылар.
Спорт бу көрүҥүнэн дьарыктаныан баҕалаахтар ахсааннара күннэтэ элбии турдуннар диэн туран сэргэх оонньууну кэлэн тэрийбит Варвара Игоревна, Кузьма Иннокентьевич Березкиннар дьиэ кэргэҥҥэ нэһилиэк олохтоохторун ааттарыттан «Мэҥэ нэһилиэгэ» тыа сирин түөлбэтин баһылыга Куприянов Александр Валерьевич махтал сурук туттарда.
Керлинг турнирга сэргээн, сэҥээрэн кэлэн кыттыбыт хамаандаларбытыгар уонна көрөөччүлэрбитигэр махтал сылаас тылларын аныыбыт. Мэлдьи бу курдук активнай позициялаах буолуҥ, куруук инники күөҥҥэ сылдьыҥ! Баҕарабыт бука барыгытыгар чэгиэн чэбдик доруобуйаны, этэҥҥэ буолууну.
