Муус устар 20 күнүгэр Мөҥүрүөн нэһилиэгин култууратын дьиэтигэр үтүө үгэскэ кубулуйбут, быйылгы хоту эҥэр култуура үлэһиттэрин спартакиадата буолан ааста. Бу күн 3-с Мэлдьэхси, Дьабыыл, Төҥүлү, Араҥас, Мэҥэ, Дойдуунускай уонна дьиэлээх хаһаайыттар, Мөҥүрүөн нэһилиэктэрин култууратын үлэһиттэрэ мустаннар, биирдиилээн эр дьоҥҥо уонна дьахталларга анал пневматическай саанан ытыы, 3 хамаандаҕа арахсан «Көрдөөх стартар», волейбол, канат тардыһыыта көрүҥнэргэ илин-кэлин түсүһэн, бэрт сытыы эрийсиилээх күрэхтэһиилэр буоллулар.
Түмүккэ ыһыылаах-хаһыылаах, олус көхтөөх, сэргэх, тыҥааһыннаах, өрө көтөҕүллүүлээх күрэхтэһиилэр кэннилэриттэн анал пневматическай саанан ытыы күрэхтэһиигэ эр дьоҥҥо 1-кы миэстэ — Анатолий Свинобоев (Томтор), 2-с миэстэ — Михаил Баишев (Төҥүлү), 3-с миэстэ Михаил Цыпандин (Тарат), дьахталларга 1-кы миэстэ — Вилюяна Ильина (Матта), 2-с миэстэ Лилия Долгунова (Балыктаах), 3-с миэстэ Күннэй Заровняева (Матта) кыайыылаах тахсаннар анал мэтээлинэн, грамотанан наҕараадаланнылар.
«Көрдөөх стартар» күрэхтэһиигэ 1-кы миэстэ — «Влад» хамаанда, 2-с миэстэ — «Сэмэн» хамаанда, 3-с миэстэ — «Миша» хамаанда ылары ситиһэн анал мэтээллэринэн, грамоталарынан наҕараадаланнылар.
Волейбол күрэхтэһиитигэр 1 миэстэни «Миша» сүүмэрдэммит хамаанда кыайыылаах, 2 миэстэ — «Влад» сүүмэрдэммит хамаанда, 3 бочуоттаах миэстэ — «Сэмэн» сүүмэрдэммит хамаанда тахсаннар анал мэтээллэринэн, грамоталарынан наҕараадаланнылар.
Канат тардыһыытыгар 1-кы миэстэ – «Миша» хамаанда, 2-с миэстэ – «Влад» хамаанда, 3-с миэстэ – «Сэмэн» хамаанда буолан анал мэтээллэринэн, грамоталарынан наҕараадаланнылар.
Маны сэргэ, түмсүбүччэ биир идэлээхтэр күүстээх күрэхтэһии кэнниттэн шашлык амсайан, олохтоох култуура үлэһиттэрэ минньигэс плов буһаран күндүлээн, сылаас балаҕаннарыгар дэлэй астаах сандалы тула олорон ирэ-хоро кэпсэтэн, күлэн-үөрэн, сэргэхсийэн, сынньанан, күүс-уох эбинэн, эһиил 10-с төгүл ыытыллар юбилейнай спартакиадаҕа Томтор кулуубугар түмсүөх буолан тарҕастыбыт.
