«Киһи киэнэ үтүөтэ – биэлсэр Люба»

Алтынньы 21 күнүгэр  сүүһүнэн уот лаампалаах, ырыаҕа ылланар, хоһооҥҥо хоһуйуллар, Мэҥэ сирин бастыҥа – Балыктаахпыт сиригэр, олохтоох култуура дьиэтигэр  ыраахтан – чугастан мустан, доруобуйа харыстабылын ветерана, Саха Өрөспүүбүлүкэтин доруобуйатын харыстабылын туйгуна, Мэҥэ нэһилиэгин бочуоттаах олохтооҕо, күн күбэй ийэ, эйэҕэс эбээ Любовь Алексеевна Гоголева сырдык кэриэһигэр анаан өр сылларга бииргэ үлэлээбит, алтыспыт чугас дьонноро, оҕолоро хомуйан, таҥан таһаартарбыт  «Киһи киэнэ үтүөтэ – биэлсэр Люба » кинигэ сүрэхтэниигэр аналлаах тэрээһин буолан ааста.

Тэрээһини  аан тылынан, бэйэтин эҕэрдэтинэн саҕалаата «Мэҥэ нэһилиэгэ» тыа сирин тэриллитин баһылыгын солбуйааччы Мохначевскай Иван Егорович.

     Хас биирдии кинигэ – кылаат, өй-санаа, билии кылаата. Ол туохтан да күндү кылаат. Кинигэҕэ суруллубут суоруллубат, үйэлэри уҥуордаан, билиҥҥи историяны кэлэр көлүөнэлэргэ тиэрдиэҕэ. Нэһилиэкпит үгүс үтүө үлэһит киэн туттар дьоннордооҕунан биллэр. Олортон биирдэстэрэ нэһилиэкпит сайдарын туһугар үлэтин дьиҥ чахчы баһылаабыт , 41 сыл устата доруобуйа харыстабылын эйгэтигэр утуэ суобастаахтык биэлсэринэн үлэлээбит ытык киһибит ,эрэллээх дьүөгэ, бэриниилээх доҕор, көхтөөх общественник, бастыҥ үлэһит, тапталлаах  күн күбэй ийэ, эйэҕэс эбээ Любовь Алексеевна Гоголева буолар.  

Сабыс саҥа күн сирин көрбүт «Киһи киэнэ үтүөтэ – биэлсэр Люба » кинигэнэн ырытыы оҥордо Нестерова Любовь Семенована, Любовь Алексеевна, Семен Алексеевич Гоголевтар дьиэ кэргэн улахан кыыстара, Уус – Алдан оройуоннааҕы балыыһатын кылаабынай медсестрата.

Гоголева Любовь Алексеевна 1945 сыллаахха  Хаҥалас улууһун Маҥнайгы Дьөппөн нэһилиэгэр күн сирин көрбүтэ.     1967 сыллаахха Дьокуускайдааҕы медицинскэй училищены бүтэрэн,  Мэҥэ Хаҥалас улууһугар  Дойдуунускайга биэлсэр — акушер пуунҥа биэлсэринэн ананан, Саха Республикатын доруобуйатын харыстабылын тиһигэр үлэтин саҕалаабыта.

Кини 1972 сылтан 2007 сылга диэри Балыктахтааҕы участковай балыыһаҕа солбуллубат биэлсэринэн үтүө суобастаахтык үлэлээбитэ. Ону тэҥэ 1988 сылтан ыла профсоюз бэрэссэдээтэлинэн талыллан, коллективын түмэн, таһаарыылаах үлэлээх буоларын туһугар бары кыһамньытын уурбута. Бу уһун сылларга биэлсэринэн үлэлээн тыа сирин олохтоохторун истиҥ махталын ылбыта, бэйэтин дьыалатыгар дириҥ билиилээҕин көрдөрбүтэ.  

Любовь Алексеевна өр сылларга бииргэ үлэлээбит Балыктаахтааҕы участковай балыыһатын коллективын аатыттан   ахтан – санаан аастылар

ЛИДИЯ МИХАЙЛОВНА НОГОВИЦЫНА– үлэ бэтэрээнэ, үрдүк категориялаах акушерка, Саха Республикатын доруобуйатын харыстабылын  туйгуна.

 ЕЛИЗАВЕТА АЛЕКСЕЕВНА ТРИФОНОВА — үлэ бэтэрээнэ,  үрдүк категориялаах медсестра, Саха Республикатын доруобуйатын харыстабылын  туйгуна.

     2008 сылтан  төһө да бочуоттаах сынньалаҥҥа олордор,  Балыктаах орто оскуолатыгар медигынан үлэлээбитэ. Үлэлиир кэмигэр билиилээх, үрдүк профессиональнай специалист быһыытынан бэйэтин көрдөрбүтэ. Отчуоттааһын хаачыстыбата үрдээн, вакцинацияны кэмигэр ыытара, оскуола хас биирдии үөрэнээччилэрин физическай туруктарын  олохтоох уонна улуустааҕы балыыһа таһымыгар чинчийиини сатабыллаахтык тэрийэрэ. Любовь Алексеевна оскуола медкабинетын хааччыйыыга улахан үлэни ыыппыта, наадалаах оборудование атыылаһары туруорсубута. Оскуолаҕа оҕолоро үөрэнэр кэмигэр төрөппүт комитетын бэрэссэдээтэлинэн талыллан ,  өр кэмнэргэ төрөппүтү кытта үлэҕэ  оскуола коллективын кытта ыкса сибээстээхтик, кыһамньылаахтык, системалаахтык үлэлэспитэ.

Онон оскуола, төрөппүттэр, общественность биир соругунан, сыалынан түмсэн үлэлээһиннэригэр дьоһун кылаатын киллэрбит төрөппүт быһыытынан үрдүктүк сыаналыыбыт.  

Михаил Прокопьевич Габышев аатынан Балыктаах орто оскуолатын коллективын аатыттан ахтан – санаан тыл эттилэр профсоюз бэрэссэдээтэлэ, саха тылын уонна литературатын учуутала Сардаана Степановна Молукова , Барабанова Анастасия Михайловна.

 Тыа сиригэр эмчит үлэтэ  сүрдээх уустук, эппиэттээх үлэ, Түүнү – күнүһү, бырааһынньыгы аахсыбакка  Любовь Алексеевна дьон үрүҥ тыынын өрөһүйэ, бэйэтин кэмигэр эппиэтинэстээхтик үлэлээбитэ.  Любовь Алексеевна — олус эппиэтинэстээх, толоругас, дойдутугар бэриниилээх киһинэн биллэн, нэһилиэкпитигэр биир тарбахха баттанар холобур оҥостор ытык ветераммыт. Кини бэйэтин эрэ үлэтинэн муҥурдаммакка  улуус, нэһилиэк общественнай үлэлэригэр, культурнай – спортивнай олоҕор актыыбынайдык кыттыыны ылара.   Нэһилиэкпитигэр «Айылгы»- түмсүү ветераннарын сэбиэтин бэрэссэдээтэлинэн өр сылларга үлэлээбитэ. общественнай үлэтинэн олус умсугутуулаахтык үлэлээн ааспыта, «Алгыс» оскуола ветераннарын ансамблларыгар ыллыыра, Балыктаахтааҕы участковай балыыһа үҥкүү коллективын чилиэнэ. Саахымакка оскуола, нэһилиэк чиэһин мэлдьи көмүскүүрэ. Нэһилиэкпит сайдарын туһугар үгүс кылааты киллэрсибит киһинэн биирдэстэрэ буолар. Любовь Алексеевна салайар общественнай түмсүүлэрэ үгүс тэрээһиннэри тэрийэллэрэ, кыттыыны ылаллара, ону туоһулуур Любовь Алексеевна өр сыллаах сыралаах үлэтэ үрдүктүк сыаналанан: доруобуйа харыстабылын ветерана, Саха Өрөспүүбүлүкэтин доруобуйа харыстабылын министерствотын Бочуотунай грамоталарынан бэлиэтэммитэ, Саха Өрөспүүбүлүкэтин доруобуйатын харыстабылын туйгуна бэлиэ хаһаайката, улуус Доруобуйа харыстабылын Бочуот кинигэтигэр киирбитэ уонна Мэҥэ нэһилиэгин Бочуотунай грамотатынан наҕараадаламмыта. Любовь Алексеевна  эмчит идэтин талан,  идэтинэн бэриниилээхтик үлэлээбитин таһынан ханнык да общественнай үлэттэн иҥнэн – толлон турбакка үтүө суобастаахтык үлэлээбитин түмүгэ буолар.

Киэн туттабыт, махтана саныыбыт норуот таптаан «Биэлсэр Люба» диэн ааттыыр  Саха Республикатын доруобуйатын харыстабылын  туйгунун, 41 сыл эмчит эриирдээх үлэтигэр сыратын биэрбит бастыҥ үтүө үлэһит киһибит сырдык аата үйэттэн үйэҕэ ааттана туруохтун.   

Любовь Алексеевна нэһилиэккэ кырдьаҕастар сэбиэтин бэрэссэдээтэлинэн үлэлии сылдьыбыт кэмигэр бииргэ үлэлээбит дьүөгэлэрэ Прибылых Марина Семеновна , Иванова Анна Андреевна, Ноговицына Наталья Гаврильевна  истиҥ – иһирэх  ахтыыны оҥордулар.

1973 сыллаахха Балыктаахха Никитина Любовь Алексеевна  Гоголев Семен Алексеевичтыын сүрэхтэринэн таптаһан, санааларынан сөбүлэһэн  ыал буолан 3 оҕону күн сирин көрдөрбүттэрэ.

—  Гоголевтар дьиэ кэргэн улахан соҕотох уоллара Гоголев Алексей Семенович ыал буолан Аллараа – Бэстээх бөһүөлэгэр  олохсуйан олорор, « Якутскнерго » тэрилтэҕэ суоппарынан үлэлиир. Кэргэнэ Саргылана Дмитриевна Аллараа Бэстээх М.Е. Попов  аатынан орто оскуолатыгар алын кылаас учууталынан, иитэр улэҕэ дириэктэр субэһитинэн үлэлиир. Улахан уоллара Айсиэн, Хабаровскайдаа5ы ис дьыала министиэристибэтин  институтун бутэрэн, Следственнай комитет үлэһитэ, билигин дойдутугар ытык иэһин толоро сылдьар. Орто уоллара Алеша Хотугулуу-Илиҥҥи федеральнай университет педагогическай институтун 2 курсун устудьуона ). Кыра кыыстара Майя, Хотугулуу-Илиҥҥи федеральнай университет филология факультетын журналистика салаатын 3 курсун устудьуона.

— Гоголевтар дьиэ кэргэн улахан кыыстара  Любовь Семеновна, Нестеров Алексей Михайловичтыын ыал буолан  Уус- Алдан улууһугар Бороҕон нэһилиэгэр олороллор, 3 оҕолоохтор. Улахан уоллара Семен Дьокуускайдааҕы медецинскэй колледжы бүтэрэн фельдшер идэлээх, билигин анал байыаннай дьайыыга сылдьар, кыыстара Айыына 8 кылаас , кыра мааны уоллара Айтал 7 кылаас Мүрү орто оскуолатын үөрэнээччилэрэ.  Любовь Семеновна  Уус- Алдан оройуоннаазы балыыһаҕа кылаабынай медсестранан улэлиир, кэргэнэ Нестеров Алексей Михайлович балыыһаҕа охранниктыыр.

Гоголевтар ыал кыра кыыстара Гоголева Татьяна Семеновна —  Сахафильм хампаанньа салайааччытын солбуйааччыта,  Татьяна Семеновна Иванов Николай Александровичтыын ыал буолан Дьокуускайга олороллор, кэргэнэ суоппарынан үлэлиир. кыыстара Гоголева Диана- Саха гимназия 9 б кылааһын үөрэнээччитэ;

Оҕолор , сиэттэр ийэлэрин туһунан истиҥник ахтан – санаан аастылар.

    Любовь Алексеевна чугас аймахтарыгар , бииргэ төрөөбүттэригэр ураты истиҥ сыһыаннааҕа , бука барыларыгар эдьиий , кийиит, саҥаас  дэтэн мэлдьи ытыс үрдүгэр сылдьара , олох үөрүүтүн – хомолтотун тэҥҥэ үллэстэрэ.

Аймах – билэ дьоннорун ааттарыттан ахтыы оҥордулар:

Гоголева Марфа Николаевна — педагогическай үлэ ветерана, Мөҥүрүөн нэһилиэгин олохтооҕо

Туласынова Мария Семеновна — Любовь Алексеевна бииргэ төрөөбүт улахан убайын кыыһа, Таатта улууһун Чөркөөх олохтооҕо

Шарина Екатерина Михайловна — Любовь Алексеевна орто убайын кыыһа, Майа сэлиэнньэтин олохтооҕо

Никитин Петр Семенович- Любовь Алексеевна улахан убайын уола

Бэйэлэрин истиҥ ахтыыларын оҥордулар:

Балыаһа билиҥҥи үлэлиир коллективын аатыттан Сотникова Акулина Федоровна

Кычкина Анна Васильевна

Дьяконова Татьяна Васильевна, Гоголев Роман Иннокентьевич

Кинигэ презентациятын музыкальнай эҕэрдэлэринэн ситэрэн, киэргэтэн биэрдилэр:

«Кыталыктар» үҥкүүнэн «Ыллыкчаан» о5о образцовай үҥкүү ансаамбыла ( сал. Рожин Х.М.)

«О5о сааһым до5отторо» ырыанан олохтоох балыыһа коллектива, доруобуйа харыстабылын ветераннара.

«Эйэ – дьол иһин» ырыанан 2- 4 кылаас кыргыттара ( сал. Прибылых И.Н.)

«Күһүҥҥү ырыа» ырыанан Вера Фадеева

«Дьол ырыата» ырыанан Рима Фадеева, Дария Андросова

«Күөрэгэй көрө» ырыанан Рима Фадеева

«Хомус тыаһа» ырыанан «Сайдыына» вокальнай ансаамбыл ( сал. Фадеева Р.К.).

Бүгүҥҥү тэрээһини салайан , иилээн – саҕалаан ыытта Скрябина Анисия Даниловна, ССРС култууратын туйгуна, Саха республикатын култууратын үтүөлээх үлэһитэ.

Балыктаахпыт балыыһатыгар Любовь Алексеевна курдук үлэлэрин чахчы баһылаабыт үтүө дьон үлэлээн ааспыттарынан киэҥ туттабыт .кинилэр үтүө ааттара үйэлэргэ ааттана туруохтун . Түмүк тылы этэн , биир дойдулаахтарыгар истиҥник махтанна Нестерова Любовь Семенована

 Тэрээһин фуршет тула истиҥ кэпсэтиинэн түмүктэннэ

Күн күбэй ийэ, эйэҕэс эбээ, Саха республикатын доруобуйатын харыстабылын туйгуна, Мэҥэ нэһилиэгин бочуоттаах олохтооҕо Любовь Алексеевна сырдык аатын үйэтитэр сыаллаах «Киһи киэнэ үтүөтэ – биэлсэр Люба » кинигэ сүрэхтэниитигэр анаммыт тэрээһиммитигэр кэлэн кыттыыны ылбыт бар дьоммутугар махтал тылларын аныыбыт. Баҕарабыт бука барыгытыгар саха алмааһыныы кытаанах доруобуйаны , тус олоххутугар , дьиэ кэргэттэргитигэр этэҥҥэ буолууну. Мэлдьи бу курдук түмсүүлээх буолуоҕуҥ!