Муус устар 19 күнүгэр олохтоох култуура дьиэтигэр Россия үрдүнэн сылын аайы ыытыллар акцияҕа кыттыһан, «Библионочь — 2024» тэрээһин буолан ааста.
Биһиги нэһилиэккэ библионочь тэрээһин быйыл иккис сылын ыытыллар. Быйылгы библионочь «Дьиэ кэргэнинэн ааҕабыт» темаҕа ананан, араас хайысхаларынан киэн далааһыннаахтык тэриллэн ыытылынна.
«Библионочь — 2024» тэрээһинигэр нэһилиэкпитигэр бастыҥ ааҕар дьиэ кэргэнинэн Миша, Евдокия Семеновна, Александр Дмитриевич Ноговицыннар ааттанан анал грамотанан бэлиэтэннилэр.
Саалаҕа мустубут көрөөччүлэр кэлэн иһэр Саха Республикатын күнүгэр аналлаах «Дойдум миэнэ — Сахам сирэ» викторина ыйытыктарыгар үөрэ-көтө хоруйдаатылар.
Тэрээһин кыттыылаахтарыгар, ыалдьыттарыгар «Дьиэ кэргэн бэчээтэ» экслибрис оҥоруутугар маастар кылааһы «Үлэ албан аат» 3-с степеннээх орден кавалера, РФ уопсай үөрэхтээһин бочуоттаах үлэһитэ, «Үөрэҕириини сайыннарыыга кылаатын иһин» РФ мэтээлин кавалера, «Саха-Азия оҕолоро» фонда стипендиата, «Старшай учуутал», СР үөрэх үлэһиттэрин 10 съеһин делегата, СР үөрэхтээһинин үтүөлээх үлэһитэ, Мэҥэ-Хаҥалас улууһун норуотун маастара, «Педагог-маастар» Александра Николаевна Габышева иилээн-саҕалаан тэрийдэ, кэпсээтэ, көрдөрдө.
М.П.Габышев аатынан Балыктаах орто оскуолатын 4 кылааһын үөрэнээччилэрин уонна төрөппүттэрин икки ардыларыгар «Билии – барҕа баай» дьиэ кэргэҥҥэ аналлаах мини интеллектуальнай күрэххэ Сияна, Сергей Семенович Харитоновтар, Арылхан, Яна Яковлевна Васильевтар, Сардаана, Христина Иннокентьевна Мохначевскайдар уонна Миша, Александр Дмитриевич Ноговицыннар дьиэ кэргэттэр 3 түһүмэхтээх сытыы ыйытыыларга эппиэттээн, илин-кэлин түсүһэн, түмүккэ Сардаана, Христина Иннокентьевна Мохначевскайдар дьиэ кэргэн кыайыылааҕынан ааттанан анал грамотанан наҕараадаланнылар.
Нэһилиэкпит эдэр ыаллара Яна Ильинична, Ньургун Владимирович, Эрсан Габышевтар дьиэ кэргэн «Тыа сирэ – олох төрдө» бэйэлэрэ иитэр кыылларын туһунан олус интэриэһинэй информацияны билиһиннэрдилэр, хаартысканан сиһилии көрдөрдүлэр.
М.П.Габышев аатынан Балыктаах орто оскуолатын психолога Ньургуяна Ивановна Стручкова кэлбит дьоҥҥо анаан практикум ыытта, сүбэ-ама биэрдэ.
«Библионочь — 2024» тэрээһини иилээн-саҕалаан ыытта олохтоох библиотекарь Сардана Семеновна Трифонова.
Бу курдук олус интэриэһинэй, сонун сүүрээннэрдээх, бэрт сэргэх биир умнуллубат тэрээһин буолла. Көхтөөх кыттыыны ылбыт бары кыттааччыларга сылаас махтал тылларын аныыбыт. Куруутун маннык активнай позициялаах сылдьыҥ, этэҥҥэ буолун.
