Олунньу 23 күнүгэр «Саха саргытын салайсыаҕыҥ, эйэлээх олоҕу түстүөҕүҥ!» девизтээх 69-с төгүлүн ыытыллар Василий Константинович Степанов аатынан култуура уонна спорт эстафетатын бэстибээлин былааҕа Балыктаах бөһүөлэгэр айаннаан кэллэ.
Сарсыардаттан ыраахтан айаннаан кэлбит Тараҕай нэһилиэгин култуура уонна спорт эстафетатын кыттыылаахтарын, ыалдьыттарын, өбүгэбит саҕаттан илдьэ кэлбит ыалдьытымсах сиэринэн, арыылаах алаадьынан, уохтаах кымыһынан айах тутан көрүстүбүт.
«Мэҥэ нэһилиэгэ» тыа сирин түөлбэтин баһылыга Габышев Нь.В., «Тараҕай нэһилиэгэ» тыа сирин түөлбэтин баһылыга Порядин Ю.А. бүгүҥҥү күн тосхойбутунан эҕэрдэ тылларын анаатылар.
Мэҥэ Хаҥалас улууһун физическай култуура уонна спорт управлениетын начальнигын солбуйааччы, күрэхтэһии кылаабынай судьуйата Баишев И.А. күрэхтэһии хаамыытын билиһиннэрдэ.
В.К.Степанов аатынан култуура уонна спорт эстафета бэстибээлин биир сүрүн күрэҕэ спортивнай курэхтэһиилэр буолаллар. Ол курдук 10 спорт (дуобат, саахымат, волейбол, салгын саатынан ытыы, сахалыы ох саанан ытыы, остуол тенниһэ, мас-рестлинг, хапсаҕай, хабылык, хаамыска уонна канат тардыһыыта) көрүҥнэригэр бу күн Табаҕа, Балыктаах спортка сүүмэрдэммит хамаандалара күөн көрсөннөр, ыһыылаах-хаһыылаах күрэхтэһии кэнниттэн түмүккэ 20,5 – 14,5 Балыктаах туһатыгар буолла.
Киэһэ 17:00 чаастан олохтоох култуура дьиэтигэр оһуохай истиитэ буолла. Эстафета балаһыанньатынан оһуохайы 3 көлүөнэ таһаарар (оскуола оҕото, ыччат, 35 саастан үөһээ), мантан биир Мэҥэлии оһуокайы таһаарыы, оһуохай тылын таһаарааччылар кынат этээччилэрдээх буолаллара ирдэнэр. Ол курдук эстафета балаһыанньатынан оһуохай түһүлгэтин саҕалаата нэһилиэкпит көхтөөх эдэр ыччата — Дария Андросова, оһуохайы салҕаата М.П.Габышев аатынан Балыктаах орто оскуолатын 10 кылааһын үөрэнээччитэ – Айыына Максимова. Оһуохайы түмүктээтэ нэһилиэкпит эрчимнээх эр бэрдэ Петр Дохунаев. Нэһилиэкпит ыччаттара, олохтоохторо көхтөөхтүк кыттан, кынат этээччилэрдээх уопсайа 198 киһи кыттан, оһуохай бэрт сэргэхтик тэриллэн ыытылынна.
Оһуохай түмүгэ:
Лауреат үрдүк аатын ылары ситистэ – Дария Андросова.
Грамотанан бэлиэтэннилэр:
Айыына Максимова.
Петр Дохунаев.
Оһуохай 4,05 баалынан сыаналанна.
Бу күн киэһэ 19:00 олохтоох култуура дьиэтигэр култуура уонна спорт эстафетатын былааҕа күөрэччи көтөҕүлүннэ. Тараҕай нэһилиэгин баһылыга Порядин Юрий Афанасьевич эҕэрдэ тылын тириэртэ уонна анал байыаннай дьайыы кыттыылаахтарын, ол курдук сырдык тыыннарын толук уурбут анал байыаннай кыттыылаахтарын Ариан Колесов, Прокопий Заровняев, Николай Кычкин, Григорий Цыпандин, Данил Скрябин чугас дьонноругар, билигин сулууспалыы сылдьар биир дойдулаахтарбыт Эдуард Андросов, Илья Габышев, Николай Никитин, Павел Желобцов, Александр Ноговицын, Иван Прибылых, Семен Мохначевский, Николай Чирков, Василий Кычкин чугас дьонноругар уонна Чечня сэриитин ветераныгар Семен Ноговицыҥҥа Аҕа дойдуну көмүскээччилэрин күнүнэн Уол Табаҕа оҥорон таһаарар анал бородууксайаларын бэлэх уунна.
Эстафета күнэ Тараҕай нэһилиэгин уус-уран самодеятельноһын кэнсиэринэн түмүктэннэ. Тараҕай нэһилиэгин кэнсиэрэ 4,16 баалынан сыаналанна.
Нэһилиэкпит чиэһин көмүскээн оһуохайга көхтөөхтүк кыттыбыт дьоннорбутун, спортивнай күрэхтэһиилэргэ ситиһиилээхтик кыттыбыт спортсменнарбытын истиҥник эҕэрдэлиибит. Ону сэргэ Тараҕай нэһилиэгин култуура уонна спорт эстафетатын кыттыылаахтарын арыылаах алаадьынан көрсөргө күүс-көмө буолбут «Доруобуйа» (салайааччы Ноговицына М.И.) уонна «Арчы» (салайааччы Рожина Н.Ф.) Далбар Хотуттарыгар, уохтаах кымыһы оҥорбут Макарова М.И., эбиэккэ итии миининэн хааччыйбыт М.П.Габышев аатынан Балыктаах орто оскуолатын коллективыгар (директор Иванов Е.Н.), оһуохайга кэлэн көхтөөх кыттыыны ылбыт нэһилиэкпит бары олохтоохторугар сылаас махтал тылларын аныыбыт. Бу курдук, бары биир сомоҕо буоламмыт, нэһилиэкпит туһугар үлэлиэҕин-хамсыаҕын, ситиһиилэр өссө да сиэттиһэн кэлэн истиннэр!
