Балаҕан ыйын 19 күнүгэр историяҕа киирбит өйдөбүнньүк күҥҥэ, Алаҕартан, Укаанньа сайылыгыттан күүс өттүнэн Хоту көһөрүллүү 80 сылын бэлиэтиир кэриэстэбил күҥҥэ ытык дьоннорбутун сырдык ааттарын ааттаан, билиҥҥи сырдык олохпут иһин турууласпыттарын умнубаппытын биллэрэн, бу күн киэһэ 19:00 чаастан Кыайыы скверыгар нэһилиэкпит олохтоохторо, эдэр ыччаттара, оскуола үөрэнээччилэрэ мустаннар Кэбээйи көһөрүллүүтүгэр сылдьыбыт дьоммутугар сүгүрүйэн өйдөбүнньүк чүмэчи уотун ууруута буолан ааста.
Кыайыы скверыгар Алаҕартан төрүттээх оҕолоро-аймахтара кыттыһан оҥорбут стела таһыгар өйдөбүнньүк митиҥҥэ кэлэр кэнчээри ыччаттарбытыгар 80 сыл анараа өттүгэр буолан ааспыт алдьархайдаах кэмнэр тустарынан Кэбээйи көһөрүллүүтүн кыттыылааҕа, педагогическай үлэ бэтэрээнэ Афанасьева Анна Алексеевна уонна Кэбээйи көһөрүллүүтүн кыттыылаахтарын оҕолоро Чалкин Семен Семенович, Ноговицына Марфа Иннокентьевна сырдатан иһитиннэрдилэр.
Көһөрүллүү 80 сылыгар
Алаҕаркаан-тэтэгэркээн алаастарга
Алаҕардар бигэтик олорбуттара,
Холкуоска холбоһон түмсүбүттэрэ,
Хоодуоттук-хорсуннук үлэлээбиттэрэ.
Иллээхтик олорбут олохторун
Иэдээннээх сэрии аймаабыта,
Аҕаларбыт сэриигэ аттаммыттара,
Аҕа дойдуну көмүскүү туруммуттара.
Ийэлэр-оҕолор аймана хаалбыттара,
Суту-курааны эҥэринэн тэлбиттэрэ.
Уодаһыннаах бирикээһи
толороннор,
Кэбээйигэ көһөрүллэн барбыттара.
Хахсаат тыаллаах кумах биэрэккэ
Оҕолуун-уруулуун сүөкэммиттэрэ,
Аһаҕас халлааҥҥа хаары бүрүнэннэр,
Хонон турбуттара токуччу тоҥоннор.
Балык булдугар үлэлээбиттэрэ,
Былааны куоһара толороллоро,
Тымныыны-тоҥууну аахсыбаккалар,
Кыайыы туһугар үлүмнэһэ мөхсөллөрө.
Ол кэмтэн аҕыс уон сыл ааста,
Ол эрээри ааспат дууһа кыланыыта,
Дьоммутун кэриэстээн, чүмэчи уматтыбыт,
Төбөнү төҥкөтөн, нөрүйэн турдубүт…
Умнуохпут суоҕа кинилэр ааттарын,
Көмүс буукубанан суруйуохпут,
Кэриэстиэхпит Ытык дьоммутун,
Үйэлэр тухары сүгүрүйэ, махтана.
Ноговицына Марфа Иннокентьевна -Эйээнэ. Балыктаах бөһүөлэгэ,
12.09.2022 сыл.
