Олунньу 1 күнүгэр олохтоох култуура дьиэтигэр Саха Республикатын, Мэҥэ-Хаҥалас улууһун норуотун маастара, Саха Республикатын норуотун уус- уран айымньытын сайдыытыгар кылаатын иһин бэлиэ хаһаайката, маастар-педагог, Мэҥэ Хаҥалас улууһун Дархан ууһа, Российскай Федерация худуоһунньуктарын айар союһун чилиэнэ, 2023 сыллаахха Москва куоракка «Сокровище Севера» региональнай фестиваль Кылаан бириис муҥутуур кыайыылааҕа, талааннаах модельер Августина Филиппова үөрэнээччитэ Федорова Анисия Иннокентьевна — АанИисИйэ нэһилиэкпит далбар хотуттарыгар, талба мааны кэрэ куоларбытыгар сахалыы уостаах оһуордаах, кыбытыылаах сахалыы моһуоннаах дьахтар уонна эр киһи үтүлүктэригэр, XVIII үйэтинээҕи саха дьахтарын саҕалаах, иннинэн тимэхтээх ырбаахыга, кыбытыылаах, тумустаах саары уонна сарыы этэрбэс выкройкаларыгар маастар кылаас иилээн-саҕалаан ыытта. Маастар кылааска «Арчы», «Доруобуйа» түмсүү далбар хотуттара уостаах оһуордаах, кыбытыылаах сахалыы моһуоннаах дьахтар үтүлүгэ тигиллэр ньыматын билистилэр.
Күн иккис аҥарыгар өбүгэ таҥаһыгар маастар кылаас «Арчы» түмсүү салайаачыта Рожина Надежда Федоровна алаһа дьиэтигэр салҕыы тэрилиннэ. Бу курдук биир күннээх маастар кылааска сылдьыбыт «Арчы», «Доруобуйа» түмсүү далбар хотуттара таҥастарын илдьэ кэлэн бэйэлэригэр сахалыы уостаах оһуордаах, кыбытыылаах сахалыы моһуоннаах дьахтар уонна эр киһи үтүлүктэрин быстаран, эбии выкройка, нэмиэт ыланнар, хайдах тигэргэ, иистэнэргэ, оҕуруо тиһэргэ, быысабайдыырга сүбэ-ама ылан бары астынан тарҕастылар.
Түгэнинэн туһанан Анисия Иннокентьевнаҕа нэһилиэкпит далбар хотуттарын аатыттан сылаас махтал тылларын аныыбыт. Куруутун ыҥырыыбытын ылынан кэлэҥҥит саха төрүт таҥастарын тигиитигэр сүбэ-ама буоларгытыгар, харах көрөн хайгыыр, дууһаны-санааны сөхтөрөр сыралаах, саха омук уратытын көрдөрөр айымньылаах үлэҕит куруук ситиһиилээх буоллун, норуот уус-уран идэлэрин оннунан хаалларыыга уонна сайыннарыыга кэрэни үтүөнү үксэтэр элбэх дьоһун үлэлэри, тус бэйэҕэтигэр кытаанах доруобуйаны, дьолу-саргыны баҕарабыт!
