Муус устар 18 күнүгэр олохтоох култуура дьиэтигэр Аҕа дойду улуу сэриитин кыттыылааҕа, үлэ, сцена ветерана, Мэҥэ-Хаҥалас оройуонун бочуотун кинигэтигэр киирбит Скрябин Василий Иванович төрөөбүтэ 105 сааһыгар ананар, аҕаларын, эһээлэрин аатын үйэтитэр сыаллаах, кини сырдык кэриэһигэр оҕолоро, сиэннэрэ таһааттарбыт «Үйэлэргэ махтанабыт!» кинигэ сүрэхтэниитэ буолан ааста.
Кинигэҕэ Василий Иванович бэйэтэ суруйан хаалларбыт бэлиэтээһиннэрэ, ону тэҥэ оҕолорун, аймахтарын, бииргэ алтыспыт дьонун истин-иһирэх ахтыылара киирдилэр. Күн сирин көрбүт «Үйэлэргэ махтанабыт!» кинигэнэн ырытыы оҥордулар Василий Иванович кыыһа – Саха Өрөспүүбүлүкэтин тыа хаһаайыстыбатын туйгуна, үлэ ветерана Маргарита Васильевна Катакинова уонна Василий Иванович балта – Саха Өрөспүүбүлүкэтин үөрэҕириитин туйгуна, Мэҥэ-Хаҥалас улууһун бочуоттаах олохтооҕо Елизавета Семеновна Попова.
Кинигэ – билии-көрүү бараммат байҕала, өй-санаа уостубат кылаата. Киһи аймах көлүөнэттэн көлүөнэҕэ, үйэттэн үйэҕэ муспут баай уопута, билбитэ-көрбүтэ барыта кинигэҕэ киирэр. Ол иһин кинигэттэн ааспыт үйэлэри билэбит, кэлэр кэмнэри сабаҕалыыбыт. Кинигэ баар — үтүөҕэ, кэрэҕэ үөрэтээччи, киһи дууһатын байытааччы, билии биэрээччи, үтүө санааны тутааччы. «Үйэлэргэ махтанабыт!» кинигэ сүрэхтэниитин тула ахтыы оҥорон, бэйэлэрин эҕэрдэлэрин, санааларын тириэртилэр:
«Мэҥэ нэһилиэгэ» тыа сирин түөлбэтин баһылыга Куприянов Александр Валерьевич.
Балыктаахтааҕы ветеринарнай участок коллективын аатыттан Никитина Татьяна Степановна.
Василий Иванович Аҕа дойду улуу сэриитин кэминээҕи бойобуой сырыыларын, сэрииттэн эргиллэн кэлэн, эйэлээх олоххо таһаарыылаах үлэтин, ону сэргэ түбүктээх үлэтин тэҥҥэ дьүөрэлээн, быыс-бириэмэ булан, нэһилиэк общественнай олоҕор кыттыытын туһунан ахтыыны оҥордулар:
Протодьяконов Афанасий Никифорович, Мохначевский Егор Семенович, Попова Елизавета Семеновна, Чукрова Дария Григорьевна, Гоголев Роман Иннокентьевич, Прибылых Марина Семеновна, Габышева Марфа Николаевна, Цыпандина Күннэйэ Николаевна, Рожина Альбина Дмитриевна, төрөппүт уола Аркадий Васильевич Скрябин.
Истиҥ эҕэрдэтин тириэртэ уонна сэмэй бэлэхтэрин туттарда Березкина Валентина Борисовна.
«Үйэлэргэ махтанабыт!» кинигэ сүрэхтэниитин тэрээһинин музыкальнай эҕэрдэлэринэн ситэрэн, киэргэтэн биэрдилэр:
«Ситим» эр дьон ансаамбылын толоруутугар Марфа Куличкина тыла, Аркадий Алексеев матыыба «Герой Попов туһунан ырыа», салайааччы Саха Республикатын култууратын туйгуна Иван Прибылых.
Икки көлүөнэ үҥкүүһүттэрин толоруутугар «Синий платочек».
Василий Иванович суруйбут «Бүттүүн Эйэ туһугар» хоһоонун аахтылар аатын ааттатар кэнчээри ыччаттара – хос сиэннэрэ.
Миша Ноговицын, Андриан Докторов, Күннэйэ Цыпандина толорууларыгар ырыа — Василий Ушницкай тылыгар, Валерий Егоров матыыбыгар «Ветераннар».
Василий Иванович тылыгар уонна матыыбыгар «Балыктааҕым сайдаҕын» ырыаны бэлэх уунна кыыһа Маргарита Катакинова.
Ааптар Елизавета Семеновна Попова толоруутугар уус-уран ааҕыы.
Петр Дохунаев толоруутугар «Сааскы киэһэ».
«Үйэлэргэ махтанабыт!» кинигэ презентациятын тэрээһини сэргээн – сэҥээрэн, үтүө тылларынан ахтан-санаан ааспыккытыгар Василий Иванович оҕолорун, сиэннэрин, хос сиэннэрин уонна олохтоох култуура дьиэтин коллективын аатыттан нэһилиэкпит олохтоохторугар, ыалдьыттарбытыгар сылаас махтал тылларын аныыбыт. Василий Иванович аатын ааттатар ыччаттара сырдык ыраас санаалаах, эйэҕэс-сайаҕас майгылаах, үгүс үөрүү үктэллээх үлэһит үтүөтэ буолуҥ диэн баҕа санаа бастыҥын тиэрдэбит. Дьоллоох буолуҥ, этэҥҥэ буолуҥ!
