Ахсынньы 13 күнүгэр Мэҥэ нэһилиэгэр үөрүүлээх бэлиэ түгэн буолан ааста. Ол курдук Балыктаах бөһүөлэгин биир сэмэй сырдык сэбэрэлээх, үтүөкэннээх уйаҕас дууһалаах, Айыыһыт айхалын курдук аламаҕай, Иэйиэхсит эҕэрдэтин курдук эйэҕэс сүрэхтээх, элэккэй бэйэлээх норуот маастара, үлэ, тыыл бэтэрээнэ, Мэҥэ нэһилиэгин бочуоттаах олохтооҕо, бары билэр, убаастыыр киһибит — Заровняева Вера Григорьевна 90 үбүлүөйдээх сааһын туолбут үөрүүлээх күнэ тосхойдо.
Бу дьоро күн ытык-мааны ветераммытын ыраахтан, чугастан уруу-аймах дьоно мустан эҕэрдэ бастыҥын анаатылар, уруйдаатылар-айхаллаатылар.
Нэһилиэк дьонун-сэргэтин аатыттан эҕэрдэтин тириэртэ «Мэҥэ нэһилиэгэ» тыа сирин түөлбэтин баһылыга Куприянов Александр Валерьевич, Мэҥэ Хаҥалас улууһун администрациятын,»Мэҥэ Хаҥалас улууһа» муниципальнай оройуон баһылыгын Тихонов Дмитрий Иванович аатыттан оройуон депутаттарын Сэбиэтин председателэ Андросов Иннокентий Иннокентьевич, Мэҥэ Хаҥалас улууһун нэһилиэнньэ көмүскэллээх буолуутун биир кэлим киинин салайааччыта Шестаков Иван Иванович истиҥ эҕэрдэлэрин тириэртилэр уонна эҕэрдэ суруктарын, сэмэй бэлэхтэрин туттардылар.
Вера Григорьевна бу орто туруу дойдуга Айыыһыт алгыһынан араҥаччыланан, Иэйиэхсит алгыһынан арчыланан Уус-Алдан улууһун Суотту нэһилиэгэр 1934 сыллаахха ахсынньы 13 күнүгэр күн сирин көрбүтэ. Вера Григорьевна кыра эрдэҕиттэн үлэҕэ эриллэн улааппыт буолан, үлэ мындырын, сатабылын баһылаан өр сылларга араас үлэлэргэ үтүө суобастаахтык үлэлээн тыа хаһаайыстыбата сайдарыгар сүҥкэн кылаатын киллэрсибитэ. Кини таһаарыылаах үлэтэ үчүгэй түмүктэрдээх буолбута. Ол курдук элбэх бочуотунай грамоталарынан, махтал суруктарынан наҕараадаламмыта, нэһилиэк сайдыытыгар сүҥкэн кылаатын киллэрсэн, култуура уонна спорт эстафетатыгар сылын аайы лауреат, дипломант аатын сүгэн дьон-сэргэ махталын, биһирэбилин ылыаҕын ылар. Вера Григорьевна «Мэҥэ-Хаҥалас улууһун норуотун маастара» анал бэлиэ хаһаайката.
Бу үөрүүлээх дьоро күҥҥэ ытык-мааны ветераммытын Вера Григорьевнаны кыргыттара, сиэннэрэ, ону сэргэ чугас аймахтара тиийэн кэлэн истиҥ эҕэрдэлэрин тириэртилэр.
Убаастабыллаах Вера Григорьевна! Айыыһытыҥ арчытынан, Иэйиэхситиҥ иэйиитинэн, тулалыыр дьонуҥ убаастабылыгар уйдаран, уһун сылларга күлэ-үөрэ, айа-тута, сүбэлии-амалыы, доруобайдык, дьоллоохтук олор! Баҕарабыт өссө да олохтон астынар уһуун-уһун сырдык, кэрэ олоҕу!
