Тохсунньу 13 күнүгэр олохтоох култуура дьиэтигэр Эргэ саҥа дьылы көрсө, итии чэйдээх сандалы тула аҕам саастаахтарга аналлаах, ылбаҕай ырыалаах, истиҥ эҕэрдэлээх, бэһиэлэй үҥкүүлээх, көхтөөх оонньуулаах «Истиҥ көрсүһүү» бырааһынньыктааҕы сынньалаҥ тэрээһин буолан ааста.
Долгуйа күүтэр, күлүмүрдүү киэргэммит дьикти кэрэ харыйа тула, үөрэ-көтө ыллыы-үҥкүүлүү саргылаах саҥа сылы айхаллыы, ырыаҕа ылланар, хоһооҥҥо хоһуйуллар Балыктаах бөһүөлэгэр, ыаллыы сытар Мөҥүрүөн нэһилиэгин ытык-мааны ветераннара ыҥырыылаах ыалдьыт буолан кэлэннэр, итии чэйдээх сандалы тула бэрт сэргэх тэрээһин буолла. Тэрээһини ылбаҕай ырыатынан саҕалаата Вера Михайловна Фадеева.
Эргэ саҥа дьыллааҕы бырааһынньыктааҕы минньигэс астаах, итии чэйдээх сандалы тула олорон, ирэ-хоро кэпсэтэн, бэйэлэрин алгыс тылларын, эҕэрдэлэрин, музыкальнай ырыаларын тириэртилэр:
Бу дьоро күҥҥэ «Маскарад, маскарад…» конкурс буолара эрдэттэн биллэриллибитэ. Ол курдук маскарад конкурсугар бэлэмнэнэн кэлбит аҕам саастаах дьоммут уруккуну-хойуккуну санаан, оҕо саастарыгар түһэн елка тула хоробуоттаатылар, ыллаатылар-үҥкүүлээтилэр. Түмүккэ «Маскарад, маскарад…» конкурсугар эр дьоҥҥо Константин Костантинович Марков анал бирииһинэн наҕараадаланна.
Кэрэ аҥардарга 3-с миэстэни Анна Николаевна Сивцева, 2-с миэстэни Надежда Федоровна Рожина, 1-кы миэстэни Дария Николаевна Поисеева кыайыылааҕынан ааттанан анал бириистэринэн наҕараадаланан үөрүүлэрэ үксээтэ.
Бу күн бары маскарад оҥостон кэлбит ыалдьыттарбыт бары сэмэй бириистэри тутттулар.
Бу дьоро күҥҥэ кэлбит ыалдьыттар тэриллэн ыытыллыбыт араас оонньууларга көхтөөхтүк кыттан сэргэхсийдилэр:
Урукку кэминээҕи музыканан, ону сэргэ аныгы ырыаларга доҕуһуоллатан үҥкүүлээн, ирэ-хоро кэпсэтэн, астына сынньаннылар:
Бу дьоро күҥҥэ мустубут бука бары Эргэ саҕа дьыллааҕы «Истиҥ көрсүһүү» кыттыылаахтарыгар, ис сүрэхтэн тахсар эйэҕэс эҕэрдэбит тыллара истиҥ илдьит буолан көттүннэр! Бука барыгытыгар баҕарабыт умнуллубат кэрэ түгэннэрдээх дьоллоох үтүө кэмнэри, саҥа үүммут сылга: түбүктээх күннэргит түмүктээх буоллуннар, сыралаах сырыыларгыт сыаналаах буоллуннар, туппуккутуттан туһа таҕыстын, таарыйбыккытын Таҥара тыыннаатын, ылсыбыккыт ыпсан истин, туруорбут соруккут туолан истин. Мындыр тарбахтаргыт аныгы кэм ииһин- күүһүн табыгастаахтык оҥороннор өбүгэлэрбит күүстэригэр эбии күүс буоллуннар! Олоххутугар үтүө үрдүк ситиһиилэри! Тускулаах сыл буоллун! Кэскиллээҕи үксэтиҥ! Саргылааҕы салайыҥ! Соргулааҕы булуҥ! Ыалдьар диэни билимэҥ! Мэлдьи бу курдук активнай позициялаах буолан, инники күөҥҥэ сылдьыҥ!
