Михаил Михайлович Сотников ‒ Аҕа дойду Улуу сэриитин кыттыылааҕа, РСФСР үтүөлээх юриһа, уопсастыбаннай диэйэтэл, Мэҥэ Хаҥалас улууһун Бочуоттаах гражданина, норуодунай судьуйанан киэҥник биллибит, тарбахха баттанар биир дойдулаахпыт. Ахсынньы 18 күнүгэр Мэҥэ нэһилиэгэр, Михаил Прокопьевич Габышев аатынан Балыктаах орто оскуолатыгар Михаил Михайлович төрөөбүтэ 100 сааһын бэлиэтиир, кини сырдык аатыгар сүгүрүйэр тэрээһин буолан ааста.
Тэрээһин оскуола үөрэнээччилэрин уус уран ааҕыытынан уонна судьуйа Михаил Сотников олоҕун сырдатар «Ытык киһи олоҕун сэһэнэ» диэн ааттаах И.М. Сосин аатынан улуустааҕы бибилэтиэкэ исписэлиистэрэ бэлэмнээбит видеосюжетынан саҕаланна.
Михаил Михайлович төрөөбүтэ 100 сааһын бэлиэтиир, кини сырдык аатыгар сүгүрүйэр тэрээһини «Мэҥэ нэһилиэгэ» тыа сирин тэриллиитин баһылыга Александр Валерьевич Куприянов киирии тылынан арыйда.
Михаил Михайлович чаҕылхай олоҕун туһунан ахтан – санаан кэлэр кэнчээри ыччаттарбытыгар, тэрээһиҥҥэ мустубут бар дьоммутугар — сэргэбитигэр сырдаттылар:
Мэҥэ нэһилиэгин бочуоттаах олохтооҕо, үлэ ветерана, уус – уран самодеятельность ветерана, «Уус – уран самодеятельность сайдыытыгар кылаатын иһин» бэлиэ хаһаайына, өр сылларга олох – дьаһах коммунальнай хаһаайыстыба коллективын салайан кэлбит ытык – мааны ветераммыт Руслан Ефимович Мохначевскай.
Мэҥэ нэһилиэгин бочуоттаах олохтооҕо, «Саха Республикатын олох – дьаһах коммунальнай хаһаайыстыба бочуоттаах үлэһитэ» государственнай унитарнай тэрилтэ анал бэлиэтин хаһаайына, үлэ ветерана, уһун сылларга производство маастарынан, тракториһынан үтүө суобастаахтык үлэлээбит ытык – мааны ветераммыт Семен Семенович Чалкин.
Убаастыыр, киэн туттар киһибит М.М. Сотников аймахтарын ааттарыттан ахтыыны оҥордо хаан уруу аймаҕа, быраата Илья Николаевич Бродников.
Өр сылларга Саха Республикатын Үрдүкү Суутун судьуйатынан үлэлээбит, ыҥырыылаах ыалдьыппыт, СР үтүөлээх юриһа М.М. Сотников төрөппүт уола Александр Михайлович Сотников.
Мэҥэ – Хаҥалас оройуоннааҕы суутун бэрэссэдээтэлин эбээһинэһин толорооччу Афанасий Васильевич Соловьев.
Бу тэрээһиҥҥэ саха эстрадатын ырыаһыта, сахалыы тыыннаах уол оҕо оскуолатын төрүттээччи Анатолий Бурнашев норуот ырыата «Татыйаас барахсан» ырыаны дохсун ытыс тыаһын доҕуһуолугар кэлбит бар дьоммутугар бэлэх уунна.
Мэҥэ – Хаҥалас улууһун баһылыгын социальнай уонна имиджевай политикатыгар солбуйааччы Альбина Андреевна Григорьева эҕэрдэ тылынан уонна дириҥ ис хоһоонноох ахтыытынан Михаил Михайлович Сотников 100 сааһын бэлиэтиир, кини сырдык аатыгар сүгүрүйэр тэрээһин истиҥник – иһирэхтик түмүктэннэ.
Саха саарына Михаил Михайлович Сотников туһунан өйдөбүл үйэ – саас тухары өлбөөдүйбэтин, эдэр көлүөнэ ыччаттарбытыгар кини аата – суола холобур буола туруохтун!
