Алтынньы 7 күнүгэр олохтоох култуура дьиэтигэр уус-уран салайааччы, СР үтүөлээх артыыһа Березкин Александр Анатольевич салалтатынан цирк «Доктор Клоун» айар бөлөҕө нэһилиэк кырачаан оҕолоругар, оскуола үөрэнээччилэригэр, олохтоохторугар, ыалдьыттарыгар анаан «Күн дьонун мичээрэ» сонун тэрээһинэ буолан ааста.
Бу күн кэлбит көрөөччүлэргэ анаан Александр Березкин, Станислав Зыков, Валерий Егоров цирковой номердары, интерактивнай фокустары, ону сэргэ «Бэтмен», жонглердар, Дьокуускай куорат күүстээх киһитэ Стасян, дьикти аптаах көрдөөх дьоннор, көрдөөх-күлүүлээх сценкалар, репризалар, дьикти кукла СЛИНКИ, трансформер «ОПТИМУС ПРАЙМ», «Шоу гигантских мыльных пузырей» курдук араас сэргэх шоу программаларын көрдөрөн, көрөөччү үөрэ-көтө күлэн, үөрэн, санааны, ис туругу өрө көтөҕөн, дуоһуйа сынньанан тарҕастылар.
«Доктор Клоун» цирк бөлөҕөр баҕарабыт айар үлэҕитигэр үрдүктэн үрдүк ситиһиилэри, саҥаттан саҥа программалары, тус бэйэҕитигэр уонна дьиэ кэргэҥҥэтигэр дьолу-соргуну, этэҥҥэ буолууну! Аныгыскы көрсүөххэ диэри!
