Олунньу 20 күнүгэр М.П.Габышев аатынан Балыктаах орто оскуолатын коллективын көҕүлээһининэн, тэрийиитинэн, оскуоланы араас сылларга бүтэрбит выпускниктарбыт, анал байыаннай дьайыыга сырдык тыыннарын толук уурбут хорсун буойуттарбыт Заровняев Прокопий Прокопьевич, Цыпандин Григорий Григорьевич, Семенов Уйгулан Алексеевич, сырдык ааттарын үйэтитэр соруктаах, стендэ арыйыытын сиэрэ-туома буолан ааста.
Бу ийэ сирбитигэр билигин да сэрии, анал байыаннай дьайыы тохтообокко салҕана турарын бары күннэтэ истэ, билэ сылдьабыт. Сэрии саҕаланыаҕыттан элбэх да биир дойдулаахтарбыт, эдэркээн дьон Аҕа дойду көмүскэлигэр туруннулар, хоһууннук кырыктаах кыргыһыыга киирдилэр, сырдык тыыннарын толук уурдулар. Биһиги олохторун харыстаабакка, бу дьайыыга кыттыбыт харыаннаах эр хоһууттарбытын ахтан-санаан ааһабыт, кинилэр тустарынан эдэр көлүөнэ ыччакка кэпсиир, билиһиннэрэр ытык иэспит буолар.
Заровняев Прокопий Прокопьевич 1987 сыллаахха Валентина Дмитриевна, Прокопий Прокопьевич Заровняевтарга иккис оҕонон күн сирин көрбүтэ. Бииргэ төрөөбүт бары уолаттар. Оҕо сааһа Халдьаайы, Сайылык түөлбэлэригэр ааспыта. Оҕо-оҕо курдук элбэх табаарыстардааҕа, бэрт холку майгылааҕа, аҕыйах саҥалааҕа. 1994 сыллаахха Балыктаах орто сокуолатыгар маҥнайгы кылааска үөрэнэ киирбитэ. Бастакы учуутала — Харитонова Марфа Петровна. Улахан кылаастарга кылаас салайааччылара Цыпандина Күннэйэ Николаевна, Ноговицына Любовь Николаевна, Сотникова Галина Дмитриевна. Биир саастыылаахтарыттан кыра буолан, наар бастакы паартаҕа олороро, хаҥас илиитинэн туттара, тупсаҕай буочардааҕа. Кылаас, оскуола активиһа этэ. Оскуолатын бүтэрэн баран, Хотугулуу-Илиҥҥи Федеральнай университетка математика уонна информатика салаатыгар үөрэнэ сылдьыбыт кэмнээҕэ, 2012 сыллаахха аармыйаҕа сулууспалыыр, ол кэнниттэн үлэлии сылдьан, эмискэ Украинаҕа тиийбитин ийэтигэр биллэрэр. Сэрии быдан инниттэн хорсуннук сэриилэспит. 2024 сыллаахха ыам ыйын 5 күнүгэр байыаннай сорудаҕы толоро сылдьан, Украинаҕа, Донецкай народнай Республикалар территорияларыгар сержант Прокопий Заровняев сүппүтүн туһунан ыар сурах кэлэр. Чугас дьоно-сэргэтэ уһун кэмҥэ көрдөөн, ирдэһэн оҕолорун, бырааттарын бу ааспыт сыл ыам ыйыгар төрөөбүт дойдутун булларбыттара. 2023 сыллаахха ыам ыйын 9 күнүгэр хорсуннук сэриилэспитин иһин Российскай Федерация байыаннай дьыалатын Министерствота «За воинскую доблесть» диэн мэтээлинэн наҕараадалаабыта.
Прокопий туһунан ахтыыны оҥордо эдьиийэ Андросова Александра Дмитриевна.
Цыпандин Григорий Григорьевич 1989 сыллаахха тохсунньу 21 күнүгэр Мэҥэ Хаҥалас улууһугар Маттаҕа Цыпандина Мария Алексеевна уонна Иванов Григорий Петрович дьиэ кэргэнигэр үһүс игирэ аҥаара оҕонон күн сирин көрбүтэ. Оҕолор кыра эрдэхтэриттэн уустук олоххо улааппыттара. Ийэлэрэ улаханнык ыалдьан, ийэлэрин быраата Колесов Петр Алексеевич уонна эдьиийэ Елизавета Алексеевна оҕолору көрөргө-улаатыннарарга опекаҕа ылбыттара. 1997 сыллаахха Григорий Балыктаах орто оскуолатын маҥнайгы кылааһыгар үөрэнэ киирбитэ. Игирэлэртэн Наташа Тааттаҕа улахан эдьиийигэр Большакова Евдокия Алексеевнаҕа иитиллибитэ. Гриша эмиэ дьонугар, эдьиийигэр Тааттаҕа ситимин быспакка сылдьара. 2006 сыллаахха тохсус кылаас кэнниттэн Григорий Харбалаахтааҕы лицейгэ үөрэнэ киирбитэ. 2008 сыллаахха лицейи слесарь автомеханик по ремонту автомобилей 3 разряда, «Автомеханик» идэлээх бүтэрбитэ. 2009 сыллаахха ыам ыйыгар ытык иэһин толоро аармыйаҕа барбыта. Онно сатабыллаах, техникаҕа сыстаҕас буолан, бойобуой массыынаҕа хамандыыр солбуйааччытынан, наводчик операторынан сылдьыбыта. 2010 сыллаахха, биир сыллаах сулууспатын этэҥҥэ түмүктээн, эдьиийигэр Наталья Григорьевнаҕа Миирнэйгэ тиийбитэ. Анал байыаннай дьайыыга 2023 сыллаахха Мииринэйтэн барбыта. Сытыы-хотуу, Саха сириттэн сылдьар уолу таба көрөн, мотострелковай взвод хамандыырын солбуйааччытынан анаабыттара, ефрейтор званияламмыта. 2024 сыллаахха бэс ыйын 6 күнүгэр Приютное диэн нэһилиэнньэлээх пуун чугаһыгар, кимэн киирии кэмигэр, сураҕа сүппүтүн туһунан биллэрии кэлбитэ. 2024 сыллаахха сэтинньи 4 күнүгэр анал байыаннай дьайыыга хорсуннук сэриилэһэ сылдьан Украина территориятыгар сырдык тыына быстыбытын туһунан биллэрии чугас дьонугар кэлбитэ. Өлбүтүн кэннэ, 2024 сыл ахсынньы 20 күнүгэр «Хорсунун иһин» мэтээлинэн наҕараадаламмытын туһунан Россия Президенин 02608 нүөмэрдээх уурааҕа тахсыбыта. Сэтинньи 16 күнүгэр 2024 сыллаахха оонньоон-көрүлээн оҕо сааһа ааспыт тапталлаах дойдутугар, Балыктааҕар көмүс уҥуоҕа кистэммитэ.
Григорий туһунан ахтыыны оҥордулар Григорий ийэтин Мария Алексеевна бииргэ төрөөбүттэрэ Трифонова Елизавета Алексеевна, Большакова Евдокия Алексеевна.
Семенов Уйгулан Алексеевич 1998 сыллаахха от ыйын 24 күнүгэр, Александра Степановна, Алексей Иванович Семеновтар дьиэ кэргэҥҥэ күүтүүлээх уол, үһүс оҕонон, күн сирин Сунтаар улууһугар көрбүтэ. Ойор-тэбэр, оонньуур-көрүлүүр дьоллоох оҕо сааһа Мэҥэ Хаҥалас улууһун Араҥас нэһилиэгэр ааспыта. 2005 сыллаахха Тарат ситэтэ суох орто оскуолатыгар маҥнайгы кылааска үөрэнэ киирбитэ. 2007 сыллаахха дьоно Балыктаахха көһөннөр, үһүс кылаастан Балыктаах орто оскуолатын үөрэнээччитэ буолбута. Уйгулаан оскуолаҕа үөрэнэ киириэҕиттэн олус элбэх доҕоттордоммута. Барыга көхтөөх буолан, араас куруһуоктарга утумнаахтык дьарыктанара. Ол курдук кылааһынан «Мүчүкчээн» фольклор ансаамбыллаахтара, «Күнчээн» вокальнай ансаамбылга сылдьан, бэрт элбэх улуустааҕы, өрөспүүбүлүкэтээҕи куонкурустарга кыттан, дипломант, лауреат буолаллара, араас кэнсиэрдэргэ, тэрээһиннэргэ куруук кытталлара. «Сардаҥа» мода студиятыгар дьарыктаммыта. 2012 сыллаахха мода студия иитиллээччилэрэ Грецияҕа, Салоники куоракка ыытыллыбыт Бүтүн аан дойдутааҕы «Цвет граната» фестивальга ситиһиилээхтик кыттан кэлбиттэрэ. Уйгулан кыра эрдэҕиттэн, удьуордарын утумнаан уонна күннэтэ аҕата массыынатын оҥосторугар, кэлэригэр-барарыгар элбэхтик алтыһар буолан, суоппар идэтин баһылыыр баҕалааҕа. Баҕа санаатын толорор соруктаах, 9 кылааһы ситиһиилээхтик үөрэнэн бүтэрээт, Дьокуускайдааҕы автодорожнай техникумҥа туттарсан киирбитэ. 2017 сыллаахха үөрэҕин түмүктээн, автомеханик-водитель специальностаммыта. 2015 сыллаахха Чурапчыттан төрүттээх Мариялыын ыал буолабыт диэн кийиит кыыһы дьиэтигэр сиэтэн киллэрбитэ. Эдэр ыал утуу-субуу үс оҕоломмуттара. Улахан дьиэ кэргэн аҕата буолан, Уйгулан элбэхтик үлэлиирэ. Ыал буолаат, үөрэҕин быыһыгар үлэлээн, харчылаһара. Дипломнаах үлэһит буолан баран, «Хоту» СХПК-ҕа, Төҥүлү орто оскуолатыгар суоппардаабыта. Кэнники сылларга вахтовай үлэлэргэ: 2021 сыллаахтан Нерюнгрига «Инаглинскай» чоҕу хостуур компанияҕа, 2024 сыллаахха саас-сайын Өймөкөөҥҥө «Богуславец» тэрилтэҕэ геологическай үлэҕэ сылдьыбыта. 2024 сыл күһүнүгэр Чурапчы улууһун Бахсы нэһилиэгин филиалыгар — олох-дьаһах коммунальнай хаһаайыстыбаҕа үлэлии киирэн, саҥа дьылга дылы үтүө суобастаахтык үлэлээн кэлбитэ. Уйгулан саҥа дьыл кэнниттэн анал байыаннай дьайыыга, контракт баттаан, тохсунньу 12 күнүгэр барбыта. Барыаҕыттан ый устата дьонун кытта сотору – сотору сибээстэһэ турбута. Олунньу 13 күнүгэр мин бардым, кэллэхпинэ сибээскэ бэйэм тахсыам диэн бүтэһигин биллэрбитэ. Олунньу 22 күнүгэр сураҕа суох сүттэ диэн сулууспалыыр чааһыттан биллэрбиттэрэ. Кулун тутар 28 күнүгэр сэрии толоонугар өлбүтүн туһунан иһитиннэрии кэлбитэ.
Уйгулан туһунан ахтыыны оҥордо эдьиийэ Молукова Сардана Степановна.
Хорсун быһыы – кыл түгэн. Киһи уйана-хатана, ордук сымсата, харса- хабараан майгыта – барыта ситиһиллэр сорук тула түмүллэр. Хорсун быһыы хас биирдиибит – ытык иэспит. Ол гынан баран, уһулуччу дьон кыайар суоллара. Бу сэрии содулугар биһиги биир дойдулаахтарбыт, эдэркээн уолаттарбыт сырдык тыыннара быһынна. Биһиги, тыыннаахтар, кинилэри кэриэстээн ааһарбыт – ытык иэспит.
Оскуолабыт выпускниктара, анал байыаннай дьайыы кыттыылаахтара Заровняев Прокопий Прокопьевич, Цыпандин Григорий Григорьевич, Семенов Уйгулан Алексеевич сырдык ааттарын үйэтитэр сыаллаах стендэни арыйыыга бэйэлэрин санааларын тириэртилэр:
«Мэҥэ» нэһилиэгэ тыа сирин түөлбэтин баһылыгын солбуйааччы Мохначевский Иван Егорович.
М.П.Габышев аатынан Балыктаах орто оскуолатын директора Иванов Егор Николаевич.
Салгыы биир дойдулаахтарбыт, Аҕа дойдуну көмүскээччи, буойун олоҕун сырдатар стендэни уонна федеральнай бырайыак чэрчитинэн оҥоһуллубут Герой паартатын арыйдылар буойуттар чугас дьонноро уонна Мэҥэ нэһилиэгин баһылыгын солбуйааччы Мохначевский И.Е., оскуола директора Иванов Е.Н.
««Өлбүттэр тустарынан үтүө өйдөбүлү иҥэриммэт буоллахпытына, тыыннаах дьону таптыырга үөрэнэр кыахпыт суох» диэн кынаттаах тыллары оскуола үөрэнээччилэригэр анаан туран, оҕолорго, ыччат дьоҥҥо дойдугутун таптааҥ, киэн туттуҥ, геройдар ааттарын билэргэ кыһаныҥ. Киинэтэ көрүҥ, кинигэтэ ааҕыҥ, хорсун быһыылары күннээҕи да олоххо оҥорорго кыһаныҥ» диэн тылларынан тэрээһин түмүктэннэ.
