Тохсунньу 27 күнүгэр олохтоох култуура дьиэтигэр устудьуон күнүн чэрчитинэн Аграфена Дмитриевна Макарова аатынан Дьокуускайдааҕы культура уонна искусство колледжын 2 курсун устудьуона Михаил Рожин, олохтоох култуура дьиэтэ уонна ыччат лидера Нарыйа Докторова көҕүлээһиннэринэн Төҥүлү, Дойду, Балыктаах бөһүөлэгин эдэр ыччаттарыгар аналлаах сынньалаҥ биэчэрэ буолан ааста. Бу күн бары мустубут эдэр ыччаттарга көрдөөх эстафеталары, истиҥ-иһирэх кэпсэтиилэри, ырыалары-үҥкүүлэри Михаил Рожин иилээн-саҕалаан тэрийэн ыытта ону тэҥэ бэйэтин ылбаҕай ырыатынан доҕоро Юрий Барабанский сынньалаҥ киэһэни киэргэттэ.
