Атырдьах ыйын 3 күнүгэр Балыктаах орто оскуолатыгар биир умнуллубат долгутуулаах тэрээһин буолан ааста.
50 сыл анараа өттүгэр оскуоланы бүтэрбит выпускниктар көрүстүлэр уонна үөрэммит оскуолаларыгар махталларын биллэрэн, «Мэник-тэник оҕо саас» диэн ааттаах мастан оҥоһугу бэлэхтээтилэр. Эҕэрдэ тылы «Мэҥэ нэһилиэгэ» тыа сирин түөлбэтин баһылыгын солбуйааччы Иван Егорович Мохначевскай уонна М.П.Габышев аатынан Балыктаах орто оскуолатын директорын солбуйааччы Надежда Михайловна Осипова тириэртилэр, Балыктаах бөһүөлэгэ төрүттэммитэ 70 сылынан, «М.Горькай», «Мэҥэ» совхозтарга эдэр саастарыгар күүстээхтик үлэлээбит суоппардарга: Артемьев Никитаҕа, Баишев Дмитрийга, Кычкин Семеҥҥа, оскуола кэнниттэн дояркалаабыт Щукина Марфаҕа, өйдөбүнньүк бэлэх авторыгар Мохначевскай Иваҥҥа нэһилиэк, оскуола Махтал суруктарын туттардылар. Ону сэргэ Мөҥүрүөн нэһилиэгин администрациятын эҕэрдэ суруктарынан Кычкина Мария, Марков Михаил, Захаров Михаил наҕараадаланнылар.
Выпускниктар саҥа оскуолаҕа киирэн экскурциялаатылар, Ия Васильевна Кычкина музейга нэһилиэк, оскуола историятын сырдатан кэпсээтэ. Музей стендэлэригэр бэйэлэрин төрөппүттэрин, Балыктаах олохтоохторун, хас биирдиилэрин үөрэ-көтө көрөн, өйдөөн-санаан аастылар.
Салгыы ыытыллыбыт кылаас чааһыгар выпускниктар, 50 сыл анараа өттүгэр маҥнайгы кылааска курдук сананан, бөрүөлээх уруучуканан чэрниилэҕэ уга-уга тэтэрээттэргэ суруйдулар. Бу выпусктарга 10 кылааска кылаас салайааччытынан үлэлээбит учууталлара Марфа Иннокентьевна Ноговицына эҕэрдэ тылын долгуйан туран эттэ.
Балыктаах орто оскуолатын 9 выпуһун туһунан кэпсиир «Умнуллубат кэрэ кэмнэрбит» диэн бары көмөлөөн ахтыы хомуйан таһаарбыт саҥа кинигэлэрин Кычкина Марфа презентациялаата.
Салгыы, уопсай хаартыскаҕа түһүү, кэпсэтии, уруккуну хойуккуну санаһыы салҕанна.
Юбилей үөрүүлээх чааһа бэрт өрө көтөҕүллүүлээхтик, үөрүүлээхтик ааста. Оскуола 50 сыллаах выпускниктара наһаа үчүгэй оскуолаҕа сылдьан, астынан, махтал тылларын анаан туран, дойдубут дьонугар чэгиэн доруобуйаны, баай тот олоҕу баҕарабыт диэн истиҥ санааларын тиэрдэллэр.
