Бэс ыйын 21 күнүгэр Майа сэлиэнньэтин Ураһалаах алааһыгар Арассыыйаҕа Аҕа дойдуну, Саха Өрөспүүбүлүкэтигэр Ийэ дойдуну көмүскээччилэр, Улуу Кыайыы үбүлүөйдээх 80, Мэҥэ Хаҥалас улууһа төрүттэммитэ 95, Баһылай Манчаары төрөөбүтэ 220, улууспутугар тыа хаһаайыстыбатын сылларыгар аналлаах «Улуу Кыайыынан кынаттанан, эйэлээх олоҕу тутабыт!» улууспут ыһыаҕар нэһилиэкпит аатыттан көхтөөх кыттыыны ыллыбыт.
Ыһыах үөрүүлээх аһыллыытыгар улууспут салалтата, ыҥырыылаах ыалдьыттар, улуус дьокутааттара, тэрилтэ, салалта салайааччылара, нэһилиэк баһылыктара, үтүө үлэһит дьоммут, «Манчаары оонньуулара» спорт национальнай көрүҥнэригэр 22-с спартакиадаҕа улууспут сүүмэрдэммит хамаандата, сарсыҥҥыга эрэллээх эрэнэр ыччаттарбыт, улууспут бастыҥ үөрэнээччилэрэ сэлэлээн хаамыыларыттан саҕаланна.
Ыһыах бэлиэтин — Ытык Дуоҕаны улууспут баһылыга Дмитрий Тихонов күөрэччи тутан ытыс тыаһын доҕуһуолунан ытык сэргэҕэ туруорда. Дмитрий Иванович Тихоновы арыаллаатылар: улууспут үс бастыҥ ситиһиилээх үөрэнээччилэрэ — М.П.Габышев аатынан Балыктаах орто оскуолатын выпускнига Сайдам Винокуров, Бэдьимэ орто оскуолатын выпускнига Роман Соловьев, И.Г.Тимофеев аатынан Майатааҕы лицей выпускнига Вячеслав Назаров уонна улуус сайдыытыгар кылааттарын киллэрэр туруу үлэһит ыаллара — Хорообут хааччахтаммыт эппиэтинэстээх хаһаайыстыба салайааччылара Наталья Анатольевна, Григорий Прокопьевич Плотниковтар, Россияҕа доруобуйа харыстабылын туйгуннара Айталина Викторовна, Дмитрий Дмитриевич Макаровтар. Үтүө түһүлгэҕэ мустубут бар дьоҥҥо улуус баһылыга Дмитрий Тихонов, СӨ тырааныспар уонна суол-иис хаһаайыстыбатын миниистирэ Владимир Сивцев, улуус дьокутааттарын Сэбиэтин бэрэссэдээтэлэ Иннокентий Андросов Үрдүк Айыыларбытыттан алгыс ылынар Үрүҥ Тунах Ыһыаҕынан истиҥ эҕэрдэлэрин эттилэр.
Ыһыах үөрүүлээх аһыллыытыгар «Улуу Кыайыынан кынаттанан, эйэлээх олоҕу тутабыт!» театрализованнай дьүһүйүүгэ, биһиги нэһилиэкпититтэн кыттыыны ылан, ырыа-тойук, үҥкүү-битии оройуттан тутулунна, оһуохай үтүө түһүлгэтэ түстэннэ.
Салгыы күнүскү омурҕан кэнниттэн улуус ыһыаҕар араас тэрээһиннэр, күрэхтэр, спортивнай күрэхтэһиилэр киэҥ далааһыннаахтык тэриллэн ыытылыннылар. Ол курдук фольклор түһүлгэтигэр ырыа куттаах дьоммут олохтоох ааптардар ырыаларынан «Мэҥэ Хит» эҕэрдэ кэнсиэригэр Петр Дохунаев Иван Аргунов хоһоонугар уонна дьүрүлүгэр «Ырыа ыллаары» ырыанан кыттан биир чаҕылхай тэрээһинини ситэрэн-киэргэтэн биэрдэ.
Сиэр-туом түһүлгэтигэр Мэҥэлии оһуохайы илдьэ сылдьааччы, Саха сирин үтүөлээх оһуохай этээччитэ, «Мэҥэ Хаҥалас улууһугар култуура уонна искусство сайдыытыгар кылаатын иһин» анал бэлиэ хаһаайына, сэрии сылын оҕото Василий Никифорович Протодьяконов сырдык аатыгар “Или-эйэни туойуохха – оһуокайдаан ойуохха” улахан дьоҥҥо оһуохай күөн-күрэһигэр барыта 13 киһи кыттыыны ылла. Талан ылбыт тиэмэлэргэ тута хоһуйан оһуохайы оройуттан туттулар, эһиэхэйи эҥээриттэн сиэттилэр. Кылаан чыпчаал кыайыылааҕынан Аксиния Степанова (Аллараа Бэстээх бөһүөлэгэ) тахсан Василий Никифорович Протодьяконов оҕолоро, сиэттэрэ олохтообут 100 000 солкуобай уу харчынан наҕараадаланна, ону сэргэ Ороссолуодаттан сылдьар Айаал Аммосов 10 000 солкуобай уу харчылаах анал бирииһинэн бэлиэтэннэ.
Улууспут ыһыаҕар «Мэҥэ нэһилиэгэ» тыа сирин түөлбэтин баһылыга Куприянов Александр Валерьевич Саха Өрөспүүбүлүкэтин олохтоох бэйэни салайыныы органнарын сайдыытыгар үтүө суобастаах үлэтин уонна тус кылаатын иһин Саха Өрөспүүбүлүкэтин Ил Дарханын уонна Правительствотын дьаһалтатын олохтоох салайыныы боппуруостарыгар департаменын махтал суругунан наҕараадаламмытынан нэһилиэкпит олохтоохторун ааттарыттан истиҥ эҕэрдэбитин тиэрдэбит.
Быйылгы улууспут ыһыаҕын тэрээһиннэригэр кыттыбыт нэһилиэкпит аатын ааттаппыт дьоммутугар, ыччаттарбытыгар истиҥ махталбытын тиэрдэбит, мэлдьи бу курдук түмсүүлээх, куруутун инники күөҥҥэ буолуоҕуҥ!
