Олунньу 12 күнүгэр олохтоох култуура дьиэтигэр төрөөбүт төрүт тыл, сурук-бичик күнүн көрсө биир сомоҕо оҥорор оһуохай түһүлгэтэ тэрилиннэ. Саха бастакы лингвист – ученайа, сахалыы суругу – бичиги төрүттээбит Семен Андреевич Новгородов 1917 с. латинскай алфавикка олоҕуран, сахалыы маассабай алфавиты оҥорбут, сахалартан биир киэн туттар киһибитинэн буолар. Семен Андреевич Новгородов төрөөбүт тылын, литературатын, баай фольклорун анаан үөрэппитэ, чинчийбитэ, элбэх матырыйаалы, ыстатыйаны суруйбута. Кини барыта 25 омук тылларын үөрэппитэ биллэр, олортон 11 тылынан кини көҥүл кэпсэтэрэ, ааҕара-суруйара.
Төрөөбүт төрүт тыл, сурук-бичик күнүн көрсө тэриллэр оһуохай түһүлгэтин Петр Дохунаев ылбаҕай ырыатынан аста.
«Мүчүк» фольклорнай ансаамбыл (салайааччы Анисия Скрябина, ССРС култууратын туйгуна, СР култууратын үтүөлээх үлэһитэ) дьоро күҥҥэ мустубут нэһилиэкпит олохтоохторун фольклорнай композициянан эҕэрдэлээтилэр.
Дойдубут үрдүнэн төрөөбүт тыл уонна сурук-бичик күнүн көрсө, биһиги сахалар ураты дууһабыт, бараммат баараҕай талааммыт, дьиэрэтэр эһиэкэйбитигэр арыллар, хамсаныылаах оһуохайбытын оройуттан тутан, эһиэкэйи эҥээриттэн ыламмыт, бүгүҥҥү тэрээһини оһуохайынан түмүктээтибит. Оһуохайы таһаардылар быйыл 68 — с төгүлүн ыытыллар Василий Константинович Степанов аатынан култуура уонна успуорт эстафетатыгар нэһилиэкпит чиэһин көмүскүүр оһуохайдьыттарбыт: оһуокайы саҕалаата Санаайа Максимова — Балыктаах орто оскуолатын 10 кылааһын үөрэнээччитэ, оһуокайы сүрүннээтэ Мария Кычкина — нэһилиэкпит көхтөөх эдэр ыччата, оһуокайы түмүктээтэ Петр Дохунаев — нэһилиэкпит эрчимнээх эр бэрдэ.
Ийэ тылбыт, төрөөбүт тылбыт хаһан да уостубатын. Төрөөбүт тылгытынан саҥарыҥ, оҕолоргутун сахалыы саҥардыҥ. Кэлэн кынат буолан көхтөөх кыттыыны ылбыт нэһилиэкпит олохтоохторугар сылаас махтал тылларын аныыбыт. Бу курдук өрүү сомоҕолоһон, бары бииргэ түмсэммит, айа-тута сылдьыаҕын! Дьоллоох буолун, доруобай буолун!
