Сэтинньи 14 күнүгэр Мэҥэ нэһилиэгин туонатыгар, Балыктаах ытык мааны сиригэр, олохтоох култуура дьиэтигэр улуустааҕы олоҥхо декадатын чэрчитинэн, «ТӨРҮТ ТЫЫНЫ УҺУГУННАРЫЫ» (эти — хааны эрчийии, кылыһах уһугуннарыыта, норуот уус-уран айымньыларыгар: олоҥхо, тойук, хомус, норуот ырыата, оһуохай) көрүҥнэринэн маастар-кылаас түһүлгэтэ тэриллэн ыытылынна.
Күн бүгүн, саха норуотун айымньыта уус-уран өттүнэн кэрэтинэн, үчүгэйинэн уонна ис хоһооно, биэрэр өйө-санаата, идеята дириҥинэн, киэҥинэн биллиэн билиннэ, аатырыан аатырда.
Маастар кылааһы сэргээн, саха төрүт тойугун сэҥээрээччилэр, хомоҕой тыллаах , чуор кылыһахтаах , туойар дьаныардаах дьоммут , ону сэргэ чугастыы сытар нэһилиэктэртэн ыалдьыттарбыт үөрэ – көтө муһуннулар.
Мустубут бар дьоммутун сахалыы кылыһахтаах норуот ырыатынан эҕэрдэлээтэ Дария Андросова.
«ТӨРҮТ ТЫЫНЫ УҺУГУННАРЫЫ» маастар кылааһы иилээн – саҕалаан ыытта «Олонхо Баттл — 2024 сыл», Бүтүн Аан Дойдутааҕы «Бахши» фольклор күрэҕин кыайыылааҕа, Саха Сирин үтүөлээх оһуохай этээччитэ, Саха Өрөспүүбүлүкэтин култууратын туйгуна Аксиния Степанова.
Сылаас махтал тылларын аныыбыт «ТӨРҮТ ТЫЫНЫ УҺУГУННАРЫЫ» маастар кылаас кыттыылаахтарыгар, «ТӨРҮТ ТЫЫНЫ УҺУГУННАРЫЫ» маастар кылааһы иилээн – саҕалаан ыыппыт уһуйааччыбытыгар Аксиния Степановаҕа.
«ТӨРҮТ ТЫЫНЫ УҺУГУННАРЫЫ» маастар кылаастан элбэх саҥаны, бэйэҕитигэр туһалааҕы билэн – көрөн, үгүс билиини, сатабылы иҥэриммиккит буолуо диэн бигэ эрэллээхпит
Маннык сэргэх, туһалаах маастар кылаастар, дьарыктар тиһигин быспакка буола турдуннар, бука барыгытыгар саха алмааһыныы кытаанах доруобуйаны, этэҥҥэ буолууну баҕарабыт.
