Сэтинньи 26 күнүгэр олохтоох култуура дьиэтигэр 5 киһилээх, нэһилиэк 6 тэрилтэлэрин сүүмэрдэммит хамаандаларын икки ардыларыгар садуоба күрэхтэһиитэ буолан ааста.
Ол курдук Ветераннар, ОДьКХ-Детсад, Тыа хаһаайыстыбата, Оскуола -1, Олохтоох дьаһалта – Балыыһа – Кулууп уонна Оскуола — 2 хамаандалара сирэй көрсөн олорон саахымат, дуобат, баарыс көрүҥнэригэр күрэхтэстилэр.
Өйү сытыылыыр күрэхтэһии олус сытыытык баран, күрэхтэһии түмүгэ маннык буолла:
32.5 очколаах бастакы миэстэни Тыа хаһаайыстыба холбоһуктаах хамаандата ылары ситиһэн кыайыы өрөгөйүн биллилэр, күрэхтэһии чемпионнарынан буоллулар.
30 очкону ситиһэн, иккис миэстэни Оскуола — 2 хамаандата ылары ситиһэн үөрүүлэрэ муҥура суох.
26 очколаах үһүс миэстэни эрэллээхтик ылла Оскуола — 1 хамаандата.
Төрдүс миэстэ – нэһилиэкпит ветераннарын сүүмэрдэммит хамаандата, бэһис миэстэ – одькх, детсад үлэһиттэрин холбоһуктаах хамаандата, алтыс миэстэ — олохтоох дьаһалта, балыыһа, кулууп үлэһиттэрин сүүмэрдэммит хамаандалара буоллулар.
Хамаандалар, ыалдьааччылар түмсэн, бука бары бэрт сэргэх күрэхтэһии буолла диэн астынан, сэргэхсийэн, ыалдьан, күрэхтэһэн, үөрэн – көтөн тарҕастылар. Бу курдук нэһилиэкпит дьонугар — сэргэтигэр өрүү түмсүүлээх, чөл олоҕу өрө тутан, чэгиэн чэбдик сылдьыаххайын диэн баҕа санаа бастыҥын тиэрдэбит! Күрэхтэһии көхтөөх бары кыттыылаахтарын, сэргэх көрөөччүлэрин нэһилиэк тэрилтэлэрин икки ардыларыгар 2025 сыллаах спартакиада 5 көрүҥэ түмүктэммитинэн эҕэрдэлиибит. Инникитин да үрдүктэн үрдүк ситиһиилэри баҕарабыт.
