Тохсунньу 22 күнүгэр Михаил Прокопьевич Габышев аатынан Балыктаах орто оскуолатын иһинэн үлэлиир нэһилиэк музейыгар «Тыа хаһаайыстыбатын сайдыыта – нэһилиэк историятын кэрдиис кэмнэригэр» стендэ үөрүүлээх аһыллыытыгар аналлаах линейка буолан ааста.
Үөрүүлээх тэрээһин орто сүһүөх үөрэнээччилэрэ, маршынан хааман киирэн, уус – уран ааҕыыларыттан саҕаланна.
Салгыы, «Тыа хаһаайыстыбатын сайдыыта – нэһилиэк историятын кэрдиис кэмнэригэр» стендэни салайан оҥорторбут краевед, ветеран учуутал Ия Васильевна Кычкина стендэ ис хоһоонун сиһилии билиһиннэрдэ.
«Тыа хаһаайыстыбатын сайдыыта – нэһилиэк историятын кэрдиис кэмнэригэр» стендэ үбүлээһинин «Мэҥэ нэһилиэгэ» тыа сирин тэриллиитин дьаһалтата толору уйунна (баһылык Габышев Нь.В.).
Түгэнинэн туһанан, «Мэҥэ нэһилиэгэ» тыа сирин тэриллиитин баһылыга Ньургун Владимирович Габышев бэйэтин эҕэрдэтин тириэртэ уонна Сардана Афанасьевна Дьяконоваҕа – Михаил Прокопьевич Габышев аатынан Балыктаах орто оскуолатын библиотекарыгар, Наина Александровна Слободчиковаҕа — Михаил Прокопьевич Габышев аатынан Балыктаах орто оскуолатын информатика учууталыгар, Хаарчаана Дьол Алексееваҕа — Михаил Прокопьевич Габышев аатынан Балыктаах орто оскуолатын нуучча тылын уонна литературатын учууталыгар, Жанна Иннокентьевна Андросоваҕа — Михаил Прокопьевич Габышев аатынан Балыктаах орто оскуолатын социальнай педагогар, Галина Дмитриевна Сотниковаҕа — Михаил Прокопьевич Габышев аатынан Балыктаах орто оскуолатын математика учууталыгар олохтоох дьаһалта махтал суругун туттарда.
Ону сэргэ бу бырайыак үлэҕэ киирэригэр сыралаах үлэлэрин иһин Мэҥэ – Хаҥалас улууһун депутаттарын сэбиэтин бэрэссэдээтэлэ Андросов Иннокентий Иннокетьевич бочуотунай грамотата Светлана Антоновна Габышеваҕа — Михаил Прокопьевич Габышев аатынан Балыктаах орто оскуолатын математика учууталыгар, Ия Васильевна Кычкинаҕа — Михаил Прокопьевич Габышев аатынан Балыктаах орто оскуолатын краевед учууталыгар туттарылынна.
Музей экскурсоводтара үөрэнээччилэр Габышев Эрсан, Михайлова Милена, Макарова Диана, Трифонов Кеша, Чалкин Айтал, Артемьев Тит, Прохорова Сайаана, Слепцова Ира, Иванова Кларена, Максимова Айыына олус интэриэһинэй ис хоһоонноох, история кэрдиис кэмнэриттэн быһа тардан, кэпсээбит иһитиннэриилэрин мустубут нэһилиэкпит олохтоохторо болҕойон, сэргии иһиттилэр.
Нэһилиэкпит музейын саҥа стендэтин аһыллыытыгар аналлаах үөрүүлээх линейкаҕа нэһилиэкпит ветераннара, олохтоохторо «Тыа хаһаайыстыбатын сайдыыта – нэһилиэк историятын кэрдиис кэмнэригэр» уонна эрдэ оҥоһуллубут «Кинилэр Кыайыыны уһансыбыттара» стендэлэри сиһилии, сирийэн, сэргии көрөн, биир дойдулаахтарын олорон, үлэлээн ааспыт кэрдиис кэмнэрин, ахтан – санаан, дуоһуйа кэпсэтэн, астынан тарҕастылар.
Бу курдук араас сылларга олорон, үлэлээн ааспыт уонна күн бүгүн тыа хаһаайыстыбатын эйгэтигэр үлэлиир биир дойдулаахтарбытыгар аналлаах «Тыа хаһаайыстыбатын сайдыыта – нэһилиэк историятын кэрдиис кэмнэригэр» бырайыагы толкуйдаан олоххо киллэрбит уонна стендэ үөрүүлээх аһыллыытын тэрийбит М.П.Габышев аатынан олохтоох оскуола коллективыгар (директор Иванов Е.Н.) уонна нэһилиэкпит олохтоохторо көхтөөх кыттыыны ылбыккытыгар, сэргээбиккитигэр барҕа махтал буолуохтун! Олорон ааспыт уонна билиҥҥи историяны билэр, үөрэтэр нэһилиэк хаһан баҕарар инникилээх буолар. Уруккуну умнумуоҕуҥ, саҥаны кэрэхсиэҕин!
