Алтынньы 11 күнүгэр, Дмитрий Ходулов аатынан норуот айымньытын дьиэтигэр улууспут кынаттаах култууратын үлэһиттэрин алтынньы ыйдааҕы сүбэ мунньаҕа буолан ааста. Манна нэһилиэктэртэн култуура кииннэрин, бибилэтиэкэлэрин, түмэллэрин үлэһиттэрэ, оҕо ускуустубатын оскуолатын кэлэктиибэ, барыта 182 киһи кыттыыны ылла. Быйылгы мунньах «Тыа сиригэр айар үлэ – норуоту түмэр сүдү күүс» диэн ааттанан тэрилиннэ. Аһаҕас кэпсэтиини улуустааҕы култуура уонна духуобунай сайдыы салалтатын салайааччытын солбуйааччы Александр Кулешов иилээн-саҕалаан ыытта. Сүбэ мунньахха СӨ култууратын уонна духуобунаһын миниистирэ Афанасий Ноев эҕэрдэ уонна сүбэ тылын куйаар ситимин нөҥүө иһиттибит. Мунньах пленарнай чааһыгар улуус баһылыгын социальнай уонна имиджевэй бэлиитикэҕэ солбуйааччы Альбина Григорьева, култуура уонна духуобунай сайдыы салалтатын информационнай-методическай киинин салайааччыта Галия Сосина, өрөспүүбүлүкэтээҕи норуот айымньытын уонна социальнай технологияларын дьиэтин информационнай-методическай салаатын салайааччыта Анастасия Кутугутова, методиһа Сардаана Егорова, СӨ национальнай бибилэтиэкэтин научнай-методическай киинин методиһа Любовь Боярская, СӨ геокультурнай сайдыы институтун сүрүн методистара Инна Донская уонна Анжелика Бережнева тиэмэлэринэн иһитиннэриилэри оҥордулар.
Мунньах иккис чааһыгар 2025 сылга улуус култууратын салалтатын сыллааҕы былааныгар киллэриллэр сыаллаах, онно үп көрүллэн, олоххо киирэригэр олук буолуохтаах солун идеялардаах көрүүлэри торумнуур күрэх тэриллэн ыытылынна. Бу күрэххэ биһиги нэһилиэк «Балыктаах телестудия үлэтин нөҥүө нэһилиэк историятын үйэтитии» диэн теманан телестудиябыт тахсыбыта 5 сылыгар аналлаах улуустааҕы семинар тэрийэн ыытарбыт туһунан бырайыагынан кытынныбыт. Уопсайа 18 бырайыак дьүүллүүр сүбэ иннигэр көмүскэннэ. Түмүккэ 5 бастыҥ бырайыак биһирэнэн кыайыылааҕынан ааттаннылар уонна эһиилги 2025 сылга бу 5 кыайыылаахтар бырайыактарын үлэҕэ киллэрэргэ улуустааҕы култуура уонна духуобунай сайдыы салалтата үбүлээһиннэрин мэктиэлээн сертификаттары туттарда. «Балыктаах телестудия үлэтин нөҥүө нэһилиэк историятын үйэтитии» бырайыакпыт 5 сыл устата ситимнээх үлэни тэрийэн, оҥорон дьон-сэргэ биһирэбилин ылан, дьоһун ситиһиилэнэн, республика таһымыгар семинар форматынан үлэ опытын тарҕатыыга 2025 сылга былааҥҥа киирдэ
Улуустааҕы култуура эйгэтин үлэһиттэрин алтынньытааҕы сүбэ мунньах үөрүүлээх чааһа улууспут култууратын эйгэтигэр өр сылларга үлэлээбит бэтэрээннэрин “Көмүс күһүнү айхаллыах” эҕэрдэ кэнсиэрдэринэн түмүктэннэ. Бу үөрүүлээх күҥҥэ өрөспүүбүлүкэтээҕи норуот айымньытын уонна социальнай технологияларын дьиэтин иһинэн 2024 сыллаахха саҥа айыллыбыт “СӨ уус-уран самодеятельноһын бэтэрээнэ” анал ааты улууспут култууратын сайдыытыгар сүҥкэн кылааттарын киллэрбит киэн туттар дьоммутугар Павел Павлович Егоровка, Анисия Даниловна Скрябинаҕа, Светлана Степановна Турчинаҕа өрөспүүбүлүкэтээҕи норуот айымньытын уонна социальнай технологияларын дьиэтин информационнай-методическай отделын салайааччыта Анастасия Кутугутова ытыс дохсун тыаһыгар доҕуһуоллатан туттарда. Түгэнинэн туһанан, убаастабыллаах Анисия Даниловнаҕа нэһилиэк дьонун-сэргэтин аатыттан итии-истин эҕэрдэбитин тиэрдэбит.
“Көмүс күһүнү айхаллыах” эҕэрдэ кэнсиэргэ биһиги нэһилиэктэн Дмитрий Наумов анал бирииһин хаһаайката, улуустааҕы «Таммахтар» литературнай холбоһук чилиэнэ, Мэҥэ-Хаҥалас, Мэҥэ нэһилиэгин бочуоттаах олохтооҕо, СР культуратын үтүөлээх үлэһитэ Скрябина Анисия Даниловна «Тобуруокаптыын сайдыахха» суруйбут авторскай чабырҕаҕынан уонна улуустааҕы Василий Константинович Степанов аатынан култуура уонна спорт эстафетатын фестивалын хас да төгүллээх лауреаттара, элбэх республиканскай, улуустааҕы ырыа конкурс кыттыылаахтара, кыайыылаахтара Антонина Петровна, Иван Николаевич Прибылыхтар ырыаларынан кыттыыны ыллылар.
