Олунньу 7 күнүгэр, «В.К.Степанов аатынан култуура уонна спорт эстафетата» 69-с төгүлүн ыытыллар фестиваль уус-уран оҥоһук быыстапкатыгар бэлэмнэнии чэрчитинэн, «Звездочка» оҕо уһуйааныгар туой оҥоһукка маастар кылаас буолан ааста. Оҕо уһуйаанын коллективыгар маастар кылааһы, туой кистэлэҥин кэпсии, туойтан оҥоһук таһаарар ньымаларга үөрэтиини иилээн-саҕалаан тэрийэн ыытта Лебедева Прасковья Егоровна.
Бу күн тэриллибит маастар кылааһы бары сэргээн иһиттилэр, Прасковья Егоровна алгыс тылы анаан, туой түҥэтэн практическай чаас бириэмэтэ биллибэккэ ааста. Оҕо уһуйаанын коллектива бары араас оҥоһуктары өр олорон оҥордулар, билбэттэрин биллилэр, сатаабаттарын сатаатылар. Ол курдук туойтан хомпуор, көһүйэ, чуораан, кытыйа, чороон, көмүлүөк оһох, балаҕан скульптурнай үлэлэри оҥорорго холоннулар.
Түгэнинэн туһанан, «Звездочка» оҕо уһуйаанын коллектива туойтан маастар кылааһы ыыппыт Прасковья Егоровнаҕа сылаас махтал тылларын тиэрдэллэр. Өрүү маннык дьоҥҥо-сэргэҕэ сатабылгын тарҕата сырыт, дьон махталын ыла тур диэн баҕа санаа бастыҥын аныыллар.
