«Тохсунньу ый — Таҥха Хаан ыйа».

Таҥха ааспыты аттаран, былыргыны ырытан, билиҥҥи олоҕу кытта тэҥнии тутан, кэнэҕэски кэлэр кэмнэри кэскиллээн көрөр үгүс элбэх ньымалаах үгэс буолар. Өбүгэлэрбит тохсунньу ыйга билгэ билгэлээн, таҥха таҥхалаан инникилэрин тымтыктанан көрөн таайтарар үгэстээхтэрэ, айылҕаттан айдарыылаах ытык идэлээх дьонтон сүбэ-ама ылан таҥха күннэрин аһараллара.

Тохсунньу 14 күнүгэр олохтоох култуура дьиэтигэр нэһилиэк олохтоохторугар анаан алгысчыт, эмчит, сиэри-туому тарҕатааччы Оконешников Денис Викторович үлэлээтэ. Күн аҥара интэриэһиргээн кэлбит дьону-сэргэни кытта көрсөн, хаартынан сэрэбиэй, киртэн-дьайтан ыраастааһын, арчылааһын оҥордо, сүбэ-ама биэрдэ. Күн иккис аҥарыгар Үс дойду улууларын Айыылар, Иччилэр, Абааһылар, айылҕаттан айдарыылаах тимир уустарын, ойууттар, удаҕаттар, тыл күүһүн иҥэриммит идэлээхтэр тустарынан аһаҕас кэпсэтиини тэрийэн сиһилии кэпсээтэ.

Нэһилиэк олохтоохторугар анаан, быыс булан көрсүһүүнү тэрийбит Денис Викторовичка, сэҥээрэн кэлэн кыттыыны ылбыт дьоммутугар- сэргэбитигэр махтал сылаас тылларын аныыбыт, бука барыгытыгар чэгиэн доруобуйаны, этэҥҥэ буолууну баҕарабыт. Мэлдьитин бу курдук түмсүүлээх буолуоҕуҥ, иннибит диэки эрэллээхтик хардыылаан иһиэҕиҥ!

Добавить комментарий

Ваш адрес email не будет опубликован. Обязательные поля помечены *