Олунньу 11 күнүгэр Мэҥэ нэһилиэгэр Саха Өрөспүүбүлүкэтин Судаарыстыбаннай былааһын толорор уорганнарын отчуоттуур мунньаҕа буолан ааста.
Биһиги нэһилиэкпитигэр Саха Өрөспүүбүлүкэтин ситэриилээх былааһын ааспыт сыллааҕы үлэтин отчуоттуур көрсүһүүгэ Саха Өрөспүүбүлүкэтин тыа хаһаайыстыбатын миниистирин солбуйааччы Николай Степанович Афанасьев салайааччылаах иккис бөлөх, ону тэҥэ Мэҥэ Хаҥалас улууһун баһылыгын бастакы солбуйааччы Василий Васильевич Михайлов, оройуон дьокутааттарын Сэбиэттэрин бэрэссэдээтэлэ Иннокентий Иннокентьевич Андросов кыттыыны ыллылар. Мунньаҕы нэһилиэк баһылыга Александр Валерьевич Куприянов иилээн-саҕалаан ыытта.
Олохтоохтор үүтү тутуу сыанатын, гаас ситимэ хаһан тардылларын, социальнай хантараах, саҥа култуура дьиэтин тутуу хаамыытын, хаарбах дьиэттэн көһөрүү бырагырааматын, улуус иһинэн хас оҕо уһуйаана уонна оскуола хапытаалынай өрөмүөн бырайыагар киирбитин о.д.а. ыйыталастылар.
Федеральнай тыраассаҕа сэрэтэр суол бэлиэлэрин, сырдатыы, сайыҥҥы быылын утары ньыманы, «Юпитер» хочуолунайа ОДьКХ көрүүтүгэр киирэрэ, бөҕү хомуйар тэрилтэни күүстээх хонтуруолга ылар наадатын эттилэр.
