Бүгүн, сэтинньи 11 күнүгэр биһиги нэһилиэкпитигэр “Күн киһитэ көмүскэс, айыы киһитэ аһыныгас” аһымал кэнсиэр буолан ааста. Нэһилиэкпит биир активист ыччаппыт, эдэр ыал тапталлаах аҕата Борис Цыпандин сиһин тоноҕоһугар ыарахан эчэйиини ылан, ол онтон илиитэ, атаҕа улэлээбэт буолбут диэн диагноз туруоруллан Дьокуускай куоракка от ыйыгар суьал операцияны этэҥҥэ ааһан, күн бүгүн Москва куоракка доруобуйатын чөлүгэр түһэрэр реабилитацияҕа эмтэнэр. Билигин арыый буолан, дьарыктанан, бэйэтэ олорор, аһыыр буолла диэн үөрүүлээх сонуну истэбит. Борис салгыы эмтэнэригэр үп – харчы өттүнэн күүс – көмө буолаары Балыктаахпыт эдэр ыччата уонна ыаллыы сытар чугас Төҥүлү, Дьабыыл, Дойдуунускай, Мөҥүрүөн нэһилиэктэрин ыччаттара бөҕө тирэх буолар санаалаах аһымал кэнсиэргэ кыттыыны ыллылар.
Акцияҕа үп киирэрин ааҕар анал комиссияҕа үлэлээтилэр:
1.Куприянов Александр Валерьевич, « Мэҥэ нэһилиэгэ» тыа сирин тэриллиитин баһылыга
2. Ноговицына Евдокия Семеновна, « Почта России « Балыктаахтааҕы отделениетын салайааччыта.
3. «Мэҥэ нэһилиэгэ» тыа сирин тэриллиитин тыа хаһаайыстыбатын специалиһа Чалкина Анастасия Ивановна.
Бу күн саалаҕа элбэх көрөөччү кэлэн, сылаас ытыстарын тыаһынан доҕуһуоллаан биир дойдулаахпытыгар Бориска анаан үтүө санааларын , түмсүүлээхтэрин ис сүрэхтэриттэн анаатылар.
Ону сэргэ көрөөччүлэргэ аукцион тэриллэн Анна Мохначевская астаабыт минньигэс тордун , Екатерина Андреевна Ноговицына тикпит үтүлүктэрин , олохтоох маҕаһыыннар бэлэмнээбит үрүҥ астан набордарын , нэһилиэкпит эдэр фермердэрин быйылгы идэһэттэн сибиинньэ , ынах этиттэн , ынах иьиттэн оҥоһуллубут набордарын , олохтоох администрация туруорбут биир куул сибиэһэй собо балыгы көрөөччүлэр хамаҕатык сыана быһан атыылаһаннар , киирбит үптэрэ эмиэ аһымал акцияҕа ананна.
Бүгүҥҥү акция-кэнсиэргэ кыттыыны ылбыт бары айар коллективтарга барҕа махталбытын тиэрдэбит. Эһиги үтүө санааларгыт биһиги Бориспытын кытаанах санааҕа кынаттаатын!
Бүгүҥҥү акция-кэнсиэргэ үтүө санаабытынан Бориска уопсайа 60 000 тыһ. солкуобай көмө харчыны кэргэнигэр Христина Афанасьевнаҕа «Мэҥэ нэһилиэгэ» тыа сирин тэриллиитин баһылыга Куприянов Александр Валерьевич туттарда.
Биһиги нэһилиэкпит эдэр ыала Христина Афанасьевна, Борис Михайлович Цыпандиннар дьиэ кэргэн ыарахан кэмнэригэр күүс – көмө буолаары , күннээҕи түбүктэри умнан туран бу киэһэни биһигинниин бииргэ атаарбыт уонна сэҥээрэн көрө кэлбит бар дьоммутугар , эһиги сылаас ытыскыт тыаһыгар ис сүрэхтэн махталбытын тиэрдэбит . Үтүө санаабытынан бар дьоммутун өрүү үөрдэ туруоҕуҥ!
Биһиги Бориспыт доруобуйата этэҥҥэ буолан Балыктааҕар кэлэригэр олус диэн баҕарабыт уонна эрэнэбит!
