Бу ийэ сиргэ эйэлээх олоххо олорорбут туһугар, Аҕа дойду көмүскэлигэр туруммут эр хоһууттарбытын ахтан-санаан, кинилэр хорсун быһыыларын эдэр көлүөнэ ыччакка холобур оҥостон кэпсиир, биллэрэр, иһитиннэрэр сыаллаах олунньу ый 21 күнүгэр нэһилиэкпит ыччата, М.П. Габышев аатынан Балыктаах орто оскуолатыгар үөрэммит, барыга көхтөөх, талааннаах выпускникпыт, анал байыаннай дьайыыга сырдык тыынын толук уурбут Николай Владимирович Кычкин үтүө аатын үйэтитэр соруктаах стендэни арыйыы сиэрэ — туома үөрэммит оскуолатыгар ыытылынна.
Кычкин Николай Владимирович 1990 сыллаахха олунньу 5 күнүгэр Аида Николаевна, Владимир Васильевич Кычкиттар дьиэ кэргэҥҥэ иккис оҕонон күн сирин көрбүтэ. 5 сааһыттан «Звездочка» оҕо уһуйааныгар сылдьан, 7 сааһыгар 1997 сыллаахха Балыктаах орто оскуолатын үөрэнээччитэ буолбута. Коля кыра эрдэҕинэ элбэх саҥата-иҥэтэ суох, наһаа сэмэй, көрсүө оҕо этэ. Кыра кылаастарга бастаан фольклор куруһуогар, онтон «Ыллыкчаан» ансаамбылга дьаныардаахтык дьарыктаммыта. Араас тэрээһиннэргэ көхтөөхтүк кыттара, сценкаларга наһаа табыллан оонньуура, улахан кылаастарга тахсан ыллыыр, бэйэтэ хоһоон суруйар буолбута. 2008 сыллаахха оскуолатын ситиһиилээхтик бүтэрэн, атыы-эргиэн колледжыгар товаровед идэтигэр туттарсан киирбитэ, ол гынан баран дьиэ кэргэнигэр улахан иэдээн буолан, үөрэҕин тохтотон, дьонугар чугаһаан, дойдутугар тахсыбыта. 2009 сыллаахха күһүн армияҕа сулууспалыы барбыта. 1 сылынан ытык иэһин чиэстээхтик толорон, дойдутугар эргиллэн, олохтоох тыа хаһаайыстыбатын кооперативыгар үлэлээн барбыта. Ити кэмҥэ олоҕун аргыһын, Марияны көрсөн, ыал буолан, утуу-субуу 4 оҕоломмуттара. Коля анал үөрэҕэ суох да буоллар, бэйэтэ баһылаан, ыҥырыыга сылдьар сатабыллаах сварщик буолбута. Бэрт элбэх былааннардааҕа.
2023 сыл ыам ыйын 15 күнүгэр анал байыаннай дьайыыга кыттар соруктаах дойдутуттан барбыта. Куруук ийэтин, доҕотторун кытта сибээһи тута сылдьыбыта. Ол эрээри дьылҕа хаан ыйааҕа кытаанах эбит, күндү уолбут, ыччаппыт Николай Владимирович Кычкин 2023 сыл балаҕан ыйын 13 күнүгэр сырдык тыына быстыбыта.
Дьиҥнээх дьоруой дьон хаһан да биллэ-көстө сатаабат үгэстээхтэр, ол гынан баран, эппиэттээх түгэҥҥэ кинилэр инники күөҥҥэ тахсан, хабыр хапсыһыыны, хорсун быһыыны көрдөрөллөр. Биһиги Колябыт дьиҥ чахчы кинилэр кэккэлэригэр киирсэр.
Нэһилиэкпит ыччатын, Балыктаах орто оскуолатын выпускнигын, анал байыаннай дьайыы кыттыылааҕын туһунан ахтан санаан аастылар:
Балыктаах орто оскуолатын директора Иванов Егор Николаевич.
«Мэҥэ нэһилиэгэ» тыа сирин тэриллиитин баһылыгын солбуйааччы Мохначевскай Иван Егорович.
Николай Владимирович кылааһын салайааччыта Молукова Сардана Степановна стендэ ис хоһоонун киэҥник сырдатан кэпсээтэ.
Коля күн күбэй ийэтэ Аида Николаевна үөрэнээччилэргэ туһаайан баҕа санаатын эттэ, анал стендэ Аҕа дойдуну көмүскээччилэр күннэрин көрсө аһыллыбытын долгуйа, астына бэлиэтээтэ.
«Өлбүттэр тустарынан үтүө өйдөбүлү иҥэриммэт буоллахпытына, тыыннаах дьону таптыырга үөрэнэр кыахпыт суох», — диэн кынаттаах тылларынан, дойдугутун таптааҥ, киэн туттуҥ, геройдар ааттарын билэргэ кыһаныҥ, киинэтэ көрүҥ, кинигэтэ ааҕыҥ, хорсун быһыылары күннээҕи да олоххо оҥорорго кыһаныҥ, ким да, туох да хаһан да умнуллубатын, маннык кутурҕан хаһан да хатыламматын! – диэн тылларынан тэрээһин түмүктэннэ.
Нэһилиэкпит ыччата, Балыктаах орто оскуолатын выпускнига Николай Владимирович Кычкин сырдык мичээрэ, элэккэй майгыта, эр санаата, хорсун быһыыта, сырдык аата үйэлэргэ ахтылла туруо!
