Ыам ыйын 23 күнүгэр Төҥүлү нэһилиэгэр, «Эйгэ» Төҥүлүтээҕи социальнай култуурнай информационнай киин профсоюһун көҕүлээһининэн тэриллибит, профсоюз чилиэнин көҕүлээһинин бэлиэ күнүн чэрчитинэн, «Вместе мы сила!» — үтүө үгэскэ кубулуйбут хоту эҥэр култуура үлэһиттэрин спартакиадата буолан ааста. Бу күн Мэҥэ, Араҥас, Мөҥүрүөн, 3-с Мэлдьэхси уонна дьиэлээх хаһаайыттар, Төҥүлү нэһилиэктэрин култуура үлэһиттэрэ мустаннар, араас күрэхтэһиилэргэ күрэхтэстилэр, үөрэ-көтө, дуоһуйа астына оонньоотулар, бириэмэлэрин олус сэргэхтик, туһалаахтык атаардылар.
Спартакиада 1-кы чааһыгар, «Сайдам» түмсүү дьиэтигэр, эрдэ биллэриллибит «Профсоюз» стенгазетатын көмүскээһин күрэҕэ буолла. Ол курдук Томтор, Балыктаах, Матта тэрилтэлэрэ оҥорбут стенгазеталарын көмүскээбиттэрин түмүгэр:
1-кы миэстэҕэ Балыктаах кулуубун үлэһиттэрэ тахсан, кыайыылааҕынан ааттанан, харчынан бириэмийэлэнэн үөрүүлэрэ үксээтэ.
2-с миэстэни Томтор кулуубун үлэһиттэрэ ылары ситиһэн, харчынан бириэмийэ туттулар.
3-с бочуоттаах миэстэҕэ Матта кулуубун үлэһиттэрэ тахсаннар, харчынан бириэмийэлэннилэр.
Салгыы 3 хамаандаҕа арахсан, профсоюзка сыһыаннаах олус интэриэһинэй ыйытыыларга хоруйдааннар, «СУП, СУП!» хамаанда кыайыылаах, 2-с миэстэ «Сайдам», 3-с миэстэ «Күн өркөн оҕолоро» хамаандалар ааттанан, анал мэтээлинэн наҕараадаланнылар.
Салгыы, спорткомплекса бары кыттааччылар 3 хамаандаҕа арахсан волейбол, «Көрдөөх стартар», сүүрүүгэ эстафета уонна канат тардыһыы күрэхтэһиилэргэ илин-кэлин түһүстүлэр.
Түмүккэ ыһыылаах-хаһыылаах, олус көхтөөх, сэргэх, тыҥааһыннаах, өрө көтөҕүүлээх күрэхтэһиилэр кэннилэриттэн волейбол күрэҕэр 1 миэстэни «Сулустар» сүүмэрдэммит хамаанда ылары ситиһэн – кыайыылаах, 2 миэстэҕэ «Сайдам» сүүмэрдэммит хамаанда, 3 бочуоттаах миэстэҕэ «СУП, СУП!» сүүмэрдэммит хамаанда тахсаннар, анал мэтээллэринэн, грамоталарынан наҕараадаланнылар.
«Көрдөөх стартар» күрэхтэһиитигэр 1-кы миэстэ — «Сулустар» хамаанда, 2-с миэстэ — «Сайдам» хамаанда, 3-с миэстэ — «СУП,СУП!» хамаанда ылары ситиһэн, анал мэтээллэринэн, грамоталарынан наҕараадаланнылар.
«Сүүрүүгэ эстафета» күрэхтэһиигэ 1-кы миэстэни «Сулустар», 2-с миэстэни «СУП, СУП!», 3-с миэстэни «Сайдам» сүүмэрдэммит хамаандалара ылары ситиһэн, анал мэтээллэринэн, грамоталарынан наҕараадаланнылар.
Канат тардыһыытыгар 1-кы миэстэ – «СУП, СУП!», 2-с миэстэ – «Сулустар», 3-с миэстэ – «Сайдам» хамаандалара буоланнар, анал мэтээллэринэн, грамоталарынан наҕараадаланнылар.
Маны сэргэ, түмсүбүччэ, биир идэлээхтэр күүстээх күрэхтэһии кэнниттэн сылаас соккуой, минньигэс алаадьы, шашлык амсайан, дэлэй астаах сандалы тула олорон ирэ-хоро кэпсэтэн, үөрэн-көтөн, сынньанан, оонньоон-көрүлээн, үҥкүүлээн, сэргэхсийэн, эһиил Тарат кулуубугар түмсүөх буолан тарҕастыбыт.
Бэс ыйын 4 күнүгэр ыытыллар улуустааҕы култуура үлэһиттэрин спартакиадатыгар «Хоту эҥэрдэр» КМО сүүмэрдэммит хамаандата сүрүннээн талылынна, бары кыттааччыларга ситиһиилэри баҕарабыт!
