Ахсынньы 30 күнүгэр Тымныы кыһын оҕонньор, сиэн кыыһынаан Хаарчааналыын нэһилиэкпит кырачаан оҕолорун дьиэлэригэр тиийэннэр кэлэн иһэр Саҥа дьылынан эҕэрдэлээтилэр уонна үөрдэ-көтүтэ сэмэй бэлэхтэрин туттардылар.
Ахсынньы 31 күнүгэр олохтоох култуура дьиэтигэр Саргылаах саҥа дьылы көрсө «Саҥа дьыллааҕы күлүм түгэн» бырааһынньыктааҕы тэрээһиҥҥэ нэһилиэкпит тэрилтэлэрин үлэһиттэрэ уонна олохтоохторо үөрэ-көтө кэлэн көхтөөх кыттыыны ыллылар. Олохтоох администрация коллектива кыра тэрилтэлэри кытта «Синей иней» ырыанан, ОДьКХ коллектива «Тус хоту» ырыанан, М.П.Габышев аатынан Балыктаах орто оскуолатын коллектива Надежда Кадышева и «Золотое кольцо» ырыатынан, «Звездочка» оҕо уһуйаанын коллектива «Стрелки» бөлөх ырыатынан, олохтоох култуура дьиэтин коллектива эстрада сулустарын ырыаларынан пародиялааннар, нэһилиэкпит эдэр ыаллара эҕэрдэ ырыаларынан, Дария Андросова, Рима Фадеева, Мотрена Монастырева трио, Дмитрий Иванов, Петр Никитин соло ырыаларынан, Айыллаана Максимова индийскэй, Ньургун Гоголев, Лилия Долгунова вальс уонна Алена Желобцова, Рима Фадеева, Лилия Долгунова севернай үҥкүүлэринэн эҕэрдэлээннэр саҥа дьыллааҕы шоу-программаны сэргэхситтилэр, үөрүүнү үксэттилэр.
Нэһилиэк баһылыга Александр Валерьевич Куприянов Балыктаах бөһүөлэгин олохтоохторугар Саҥа үүммүт сылга алгыс тылын анаата уонна нэһилиэкпит ытык-мааны дьонугар үбүлүөйдээх сылларынан эҕэрдэ суруктарын, өйдөбүнньүк бэлэхтэрин үөрүүлээх быһыыга туттарда. Ол курдук Наталья Петровна, Валерий Ефимович Мохначевскайдар ыал буолан олорбуттара 50 сылларынан Ил Дархан эҕэрдэ суругун, Мэҥэ-Хаҥалас улууһун «Ытык ыал» анал аат бэлиэтин туттарылынна. Үбүлүөйнэй саастарын туолбут ытык-мааны дьоммутугар Свинобоева Татьяна Петровнаҕа, Дьяконова Татьяна Васильевнаҕа, Прибылых Афанасий Николаевичка, Кычкин Валентин Семеновичка, Мохначевская Людмила Михайловнаҕа, Колесова Степанида Ивановнаҕа, Баишева Евдокия Ефремовнаҕа, Цыпандина Людмила Николаевнаҕа, Захаров Егор Михайловичка, Харитонов Петр Алексеевичка, Баишев Михаил Иннокентьевичка, Ноговицын Александр Прокопьевичка, Захаров Дмитрий Михайловичка эҕэрдэ сурук, сэмэй бэлэх туттарылынна. Саха Республикатын ветераннарын сэбиэтин аатыттан махтал суругу уонна улуустааҕы ветераннар сэбиэттэрин эҕэрдэ суругун Рожина Надежда Федоровнаҕа туттарда.
Сайын баһаары умулларыыга биир киһи курдук турунан, сомоҕолоһон үлэлэспит биир дойдулаахтарбытыгар Винокуров Андрей Николаевичка, Молуков Иван Николаевичка, Мохначевский Игорь Ильичка, Кычкин Петр Павловичка, Харитонов Сергей Семеновичка, Лихонди Егор Анатольевичка республикаттан, улуустан кэлбит махтал суруктары, анал бэлиэлэри туттарыы түгэнэ буолан ааста.
Тымныы кыһын оҕонньор, сиэн кыыһынаан Хаарчааналыын, сиэн уола 2022 сыл кыттыылаах үүммүт Саҥа дьылынан эҕэрдэлээн, эрдэ ыытыллыбыт саҥа дьыллааҕы «Түөлбэлэр икки ардыларыгар хаартан оҥоһук», «Снежинка хрустальная, серебристая…», «Новогодняя фотосессия всей семьей у себя дома», «Саҥа сылы көрсө симэммит харыйабыт таһыгар турар объемнай оҥоһук», «Саҥа дьылы көрсө тэлгэһэбитин киэргэтиэххэ», «Дорообо Саҥа дьыл» күрэхтэр кыайыылаахтарыгар уонна кыттыылаахтарыгар эҕэрдэ суруктарын, сэмэй бэлэхтэрин туттардылар. Күрэхтэр кыайыылаахтарын кытта сиһилии https://balyktakh.ru/саҥа-дьыллааҕы-күрэхтэр-түмүктэрэ/ билсиэххитин сөп.
Тохсунньу 1 күнүгэр нэһилиэкпит олохтоохторугар «Саҥа дьылынан! Саҥа дьолунан!» маассабай оонньууларынан көр-нар киэһэтэ буолла.
Тохсунньу 7 күнүгэр үүммүт 2022 сылга оскуоланы бүтэрбит юбилейнай сыллаах выпусктар икки ардыларыгар көлүөнэлэр «Доҕоттордуун ороһуоспатааҕы истиҥ көрсүһүү» саҥа дьыллааҕы күөн көрсүһүүлэрэ буолан ааста. Быйыл оскуоланы бүтэрбиттэрэ 50 уонна 10 сылларын бэлиэтиир выпускниктар кэлэн ыалдьыттаатылар.
