Бүгүн, бэс ыйын 28 күнүгэр Саха сирин норуоттарын VIII спортивнай оонньууларын уота нэһилиэктэринэн айаннаан биһиги бөһүөлэкпитигэр тиийэн кэлбитин үөрүүлээх быһыыга-майгыга уруйдаан-айхаллаан көрүстүбүт. Биллиилээх экстремал — сүүрүүк СР физическай култуураҕа уонна спортка үтүөлээх үлэһитэ Дмитрий Горохов салайааччылаах эстэпиэтэ кыттыылаахтара Саха сирин норуоттарын VIII спорт оонньууларын уотун күөрэччи көтөҕөн сүүрэн аҕаллылар. Күндү ыалдьыттарбытын үгүс үтүө дьоннор үөскээн — төрөөн ааспыт, үүнэр- сайдар кэскиллээх, үтүмэн үгүс ыччаттаах үтүөкэннээх дойдубутугар үктэммиттэринэн эҕэрдэлээн туран арыылаах алаадьынан айах тутан күндүлээтибит. Нэһилиэк олохтоохторун ааттарыттан «Мэҥэ» нэһилиэгэ тыа сирин дьаһалтатын баһылыга Куприянов Александр Валерьевич эҕэрдэ тылын, сүүрүү эстэпиэтэтин кыттыылаахтарыгар ситиһиилээхтик уоту тириэрдэллэригэр, бары спортсменнарга ситиһиилээх кыттыыны баҕарда, чуолаан Мэҥэ-Хаҥалас сүүмэрдэммит хамаандатын спортсменнара кыайыы көтөллөөх кытталларыгар баҕа санаатын тириэртэ.
Түгэнинэн туһанан, Мэҥэ-Хаҥалас улууһун сүүмэрдэммит хамаандатыгар талыллан киирбит улууспут чиэһин көмүскүүр нэһилиэкпит ыччаттарыгар ситиһиини, кыайыыны-хотууну, табыллыыны баҕарабыт!!!
