Нэһилиэкпитигэр субуота, өрөбүл күннэргэ, Саха сиригэр бэлиэтэнэр Ийэ күнүнэн, күн күбэй ийэлэри эҕэрдэлээһин салҕанан барда. Элбэх ыччаппыт аныгы сиэринэн, ыраахтан олорон дьиэлэригэр доставка оҥорон, күн күбэй ийэлэригэр Ийэ күнүнэн эҕэрдэлээн, тыыннаах сибэкки дьөрбөтүн бэлэх уунан долгуттулар, уйадыттылар, үөртүлэр, дьоллоох түгэни бэлэхтээтилэр. Сылын аайы тэриллэр бырайыакпыт үтүө үгэскэ кубулуйан, салҕанан, күн күбэй ийэлэрбитин сыллата үөрдэ турдун!
Күндүттэн күндү дьоммут — Күн-күбэй ийэлэрбит! Эһигини Ийэлэр күннэринэн өссө төгүл итиитик-истиҥник эҕэрдэлиибит. Баҕарабыт эһиэхэ Сир үрдүгэр баар бары кэрэни, үчүгэйи, үлэҕитигэр ситиһиини! Ыарыы эһигинниин ыалласпатын, олоххут үөрүүнэн туоллун. Оҕолоргут тустарыгар ахсаабат кыһамньыгыт, сылаас тапталгыт, муударай сүбэҕит иһин барҕа махтал, уруй-айхал буоллун!