Республикабыт үрдүнэн сылын аайы тэриллэн ыытыллар «Кыһын Саха Сириттэн саҕаланар» бэстибээл чэрчитинэн, ахсынньы ый 1 күнүгэр нэһилиэкпитигэр «Сандаара киэргэйдэ лаглайбыт күөх харыйа!» үөрүүлээх түгэнэ буолан ааста.
Харыйабыт уота чаҕылыйа сандаарыан иннинэ, бэйэ илиитинэн оҥоһуллубут оонньуурдары ис сүрэхтэн оҥорон аҕалан, ыйыырга акция биллэриллибитэ. Ол курдук кыралыын-улаханныын акцияҕа кыттыһан, «Звездочка» оҕо уһуйаанын иитиллээччилэрэ, төрөппүттэрэ, оскуола алын кылааһын үөрэнээччилэрэ уонна биирдиилээн нэһилиэкпит олохтоохторо сүрдээҕин кыһаллан, оҥорон аҕалбыт үгүс элбэх оонньуурдарынан, киэргэллэринэн лаглайбыт харыйабытын, сылын аайы буоларын курдук, симээтилэр. Акцияҕа кыттыбыт бары көхтөөх оҕолорбутугар, дьоммутугар сылаас махтал тылларын аныыбыт. Эһиил эмиэ көхтөөх кыттыыны ылыаххыт диэн эрэнэбит!
Тымныы кыһын оҕонньор сиэн кыыһынаан Хаарчааналыын, доҕотторунаан Ээчэ, Бээчэ, Тооку буолан бу күн, аан бастаан «Звездочка» оҕо уһуйааныгар ыалдьыттаатылар. Түннүк нөҥүө кырачаан оҕолору кытта алтыстылар, уһуйаан иитиллээччилэрэ Тымныы кыһын оҕонньорго, сиэн кыыһыгар Хаарчаанаҕа анаан кэмбиэргэ угуллубут саҥа дьыллааҕы уруһуйдарын бэлэх ууннулар. Тымныы кыһын оҕонньор кырачаан оҕолорго махтанан минньигэс бэлэҕин утары уунна.
Салгыы Тымныы кыһын оҕонньор сиэн кыыһа Хаарчааналыын дьон-сэргэ, оскуолабыт оҕолоро тоҕуоруһа мустубут сиригэр сыарҕалаах атынан айаннатан тиийэн кэллилэр. Тымныы кыһын оҕонньор кэлэн иһэр саҥа дьылынан бэйэтин эҕэрдэтин тириэртэ уонна саҥа 2026 сылы көрсө аҕалбыт сорудаҕын — саҥа дьыллааҕы: саҥа сыл бэлиэтэ «Дьөһөгөй — 2026» объемнай оҥоһукка, саҥа дьылга улахан дьоҥҥо, оҕолорго маскараад көстүүмнэригэр, саҥа дьыллааҕы дьиэ кэргэнинэн тэлгэһэни киэргэтиигэ, «Саҥа дьыл — 2026» таһырдьа түөлбэнэн саҥа дьыллааҕы фотозона оҥоруутун күрэхтэрин балаһыанньаларын түөлбэлэринэн нэһилиэкпит депутаттарыгар, представитэллэригэр, үөрэ-көтө бэлэмнэниэххит диэн, эрэлин биллэрэн туран туттарда. Сиэн кыыс Хаарчаана саҥа дьыллааҕы кэрэ ырыатыгар оҕо аймах тэҥҥэ кыттыһан ылллаһан, үҥкүүлэһэн дуоһуйа астыннылар. «Сандаара киэргэйдэ лаглайбыт күөх харыйа!» үөрүүлээх түгэнин Ээчэ, Бээчэ уонна Тооку ыллаан, үҥкүүлээн, ситэрэн-хоторон, тэрээһини киэргэтэн биэрдилэр.
Үөрүүлээх тэрээһин бэлиэтин, Тымныы кыһын оҕонньор сиэн кыыһынаан Хаарчааналыын уонна бүгүҥҥү доҕотторун кытта, бары бииргэ көхтөөхтүк күргүөмүнэн күөх харыйа уотун уматтылар. Харыйа уота чаҕылыйа араас уотунан оонньоон, кыралыын – улаханныын барыбыт сүргэтин көтөхтө.
Кэрэчээн харыйабыт уота сандаарыччы умайан, Саргылаах Саҥа дьыл салаллан иһэрин биллэрэн, барыбытыгар Саҥа дьыл тыына билиннэ, сүргэбит көтөҕүлүннэ.
«Сандаара киэргэйдэ лаглайбыт күөх харыйа!» саҥа дьыллааҕы күөх харыйабыт уота күлүмнүүр, сандаарар үөрүүлээх түгэнигэр кэлэн кыттыыны ылбыт нэһилиэкпит олохтоохторугар, бары оҕолорго ис сүрэхтэн махтал сылаас тылларын аныыбыт. Баҕарабыт бука барыгытыгар доруобуйаны, үлэҕэ, үөрэххэ үрдүктэн үрдүк ситиһиилэри, тус олоххутугар, чугас дьоҥҥутугар этэҥҥэ буолууну! Күндү доҕоттоор! Тымныы кыһын оҕонньорбут, сиэн кыыһынаан Хаарчааналыын Дьокуускай куоракка салгыы айаннаатылар. Кинилэр биэрбит сорудахтарын толорон, үөрэ-көтө ахсынньы 31 күнүгэр кулуупка көрсүөхпүт, көрү – нары көҕүлүттэн тутуохпут диэн эрэннэрэн туран Тымныы кыһын оҕонньору, сиэн кыыһа Хаарчаананы салгыы айаннарыгар атаардыбыт!
