Алтынньы 2 күнүгэр Мэҥэ нэһилиэгин дьоллоох туонатыгар, ырыаҕа ылланар, хоһооҥҥо хоһуйуллар Мэҥэ сирэ бастыҥа Балыктаахпыт ытык мааны сиригэр дьоро күн буолан ааста. Ол курдук «Сайдыс» түөлбэҕэ саҥа муоста аһыллыытын үөрүүлээх тэрээһинэ буолла.
Сыллата биһиги нэһилиэкпит үүнэр-сайдар, саҥа тутууларынан киэргэйэр. Ол онтон биирдэстэрэ олох сайдыытын тэтиминэн олохтоохторбут сырыыларыгар харгыстары көрсөллөрүн туоратар сыаллаах сыллата олохпутугар тупсарыы үлэлэр былааннанан ыытыллаллар. Олорор сиринэн бэйэни салайыныы уопсастыбаннай тэрээһин (о.э ТОС) уонна олохтоох дьаһалта, чуолаан Александр Валерьевич Куприянов көҕүлээһиннэринэн, муоста тутуута былааҥҥа ылыллыбыта. Бу бырайыак үбүлээһинин буларга «Сайдыс» түөлбэ депутата Чалкина Анастасия Ивановна, түөлбэ салайааччыта Макарова Мария Ивановна бырайыак суруйан, олохтоох дьаһалтаны кытта ыкса үлэлэһэн, социальнай бэлиитикэни олоххо киллэрии муниципальнай бырагыраамма нөҥүө, Ил Дархан граныгар кыттан, 195000 солкуобайы ылары ситиһэн уонна нэһилиэк дьаһалтата 205000 солкуобай суумманы эбии үбүлээһин (софинансирование) оҥорон, уопсайа 400000 солкуобай сууммаҕа, «Сайдыс» түөлбэ муостатын саҥардан үлэтэ түмүгүн ситэн, саҥа муоста үлэҕэ киирдэ. Үгүс сыралаах үлэ түмүгэр бэдэрээтчитинэн «Аллея света» чааһынай тэрилтэ (салайааччы Куркутов Петр Сергеевич) сөбүлэһэн, күүскэ үлэлээн, кылгас болдьохтоох, былааннаммыт үлэни кыайа тутан, түмүгэр кэрэ бэйэлээх, сырдык уоттаах үйэлээх муоста тутулунна.
Саҥа муоста уһун үйэлэргэ туһалаатын, бигэ тирэхтээх буоларын туһугар аал уоту оттон, арыылаах алаадьынан, саламаатынан, быырпаҕынан күндүлээн, арчылаан, Петр Дохунаев тэрээһини алгыһынан арыйда.
«Мэҥэ нэһилиэгэ» тыа сирин тэриллиитин баһылыга Габышев Ньургун Владимирович, «Аллея света» чааһынай тэрилтэ салайааччыта, бэдэрээтчит Куркутов Петр Сергеевич, “Сайдыс” түөлбэ салайааччыта Макарова Мария Ивановна аалай лиэнтэни дохсун ытыс тыаһынан быһан, саҥа муостаны үөрүүлээхтик арыйдылар.
Бу күн мустубут нэһилиэк олохтоохторугар «Мэҥэ нэһилиэгэ» тыа сирин тэриллиитин баһылыга Габышев Ньургун Владимирович эҕэрдэ тылын тириэртэ уонна муостаны туппут «Аллея света» чааһынай тэрилтэ салайааччытыгар Куркутов Петр Сергеевичка махтал суругу туттарда.
Бэйэтин эҕэрдэтин, баҕа санаатын тириэртэ «Аллея света» чааһынай тэрилтэ салайааччыта, бэдэрээччит Куркутов Петр Сергеевич.
«Сайдыс» түөлбэҕэ саҥа муоста аһыллыбыт үөрүүлээх түгэнинэн бэйэтин ылбаҕай ырыатын бэлэх уунна култуура уонна спорт эстафетатын, уус – уран самодеятельность, араас таһымнаах ырыа конкурстарын хас да төгүллээх лауреата, дипломана Вера Михайловна Фадеева, баяҥҥа доҕуһуоллаата СР култууратын туйгуна Иван Николаевич Прибылых.
Убаастабыллаах «Сайдыс» түөлбэ уонна нэһилиэкпит олохтоохторун саҥа муоста үлэҕэ киирбит күнүнэн истиҥник эҕэрдэлиибит! Эдэрдии эрчимнээх, чэгиэн-чэбдик бэйэлээх, үөрүү-көтүү үктэллээх, дьол-саргы тосхоллоох, инникитин да толкуйдаабыккыт тобулуннун, санаабыккыт сатаннын диэн алгыс бастыҥын аныыбыт, эҕэрдэ эриэккэһин этэбит.
