Алтынньы 23 күнүгэр олохтоох култуура дьиэтигэр «Мэҥэ нэһилиэгэ» тыа сирин тэриллиитин дьаһалтатын көҕүлээһининэн, кэлэр 2026 сылга Республикаҕа «Олохтоох дьон көҕүлээһинин өйүүр программа» (ППМИ-2026) бырайыагынан конкурска кыттыы саҕаламмытынан, нэһилиэк уопсай мунньаҕа буолан ааста.
Мунньаҕы «Мэҥэ нэһилиэгэ» тыа сирин түөлбэтин баһылыга Габышев Ньургун Владимирович иилээн-саҕалаан ыытта. «Олохтоох дьон көҕүлээһинин өйүүр программа» (ППМИ-2026) туһунан баһылыгы солбуйааччы Мохначевский Иван Егорович билиһиннэрдэ, ону тэҥэ эрдэ олохтоох дьаһалта специалистара бэлэмнээн ватсап ситим нөҥүө ыыппыт опростарын түмүгүн иһитиннэрдэ. Иннинээҕи сылларга ППМИ-нан ылыллыбыты, оҥоһуллубуту, толору туһанылла сылдьалларын туһунан сиһилии слайдаларынан сирдэтэн кэпсээтэ. Мунньах кыттыылаахтара эһиилги сылга ППМИ -2026 конкурсугар туруорсар бырайыактарын тула аһаҕас кэпсэтиигэ кыттан, санаа атастаһыыта көхтөөхтүк тэрилиннэ. Ситим нөҥүө эрдэ ыытыллыбыт опроска барыта 352 нэһилиэк олохтооҕо кыттыбытыттан, баһыйар элбэх куолаһы ылбыт 2 бырайыак куоластааһыҥҥа бу мунньахха киирдэ. Ол курдук бастакы бырайыак «Вода массыына», иккис бырайыак «Кылабыыһа территориятын күрүөлээһин».
Түмүккэ баһыйар куолаһы ситиһэн, «Вода массыына» бырайыак талылынна. Ону тэҥэ балаһыанньа быһыытынан, үлэлээбэт пенсионердар 500 солкуобайы, үлэлиир пенсионердар уонна хас биирдии үлэлиир киһи аҕыс 800 солкуобайы утары үбүлээһиҥҥэ биэрэрин куоластааһынынан быһаарылынна.
Онон 2026 сыллаахха Республикаҕа ыытыллар «Олохтоох дьон көҕүлээһинин өйүүр программа» (ППМИ-2026) бырайыагынан конкурска Балыктаах бөһүөлэгэ «Вода массыынаны ылыныы» бырайыагынан кыттар буолла.
