Ахсынньы 14 күнүгэр олохтоох култуура дьиэтигэр Харитонов Семен Николаевич төрөөбүтэ 100, Улуу Кыайыы 80 сылларын көрсө, бу орто дойдуга олорон ааспыт олоҕун, үлэтин көрдөрөр «Мөҥүрүөнтэн удьуордаах Харитоновтар утумнара салҕанар» уонна Харитоновтар аймах төрүччүлэрин сырдатар «Бархагар Текесев удьуордара буолабыт» күүтүүлээх, кэтэһиилээх кинигэлэр сүрэхтэниилэрин дьоро түһүлгэтэ буолан ааста.
Кинигэлэр сүрэхтэниилэрин үөрүүлээх чааһа «Ыллыкчаан» оҕо образцовай уҥкүү ансаамбыла «Саха кыыһа» үҥкүүнэн саҕаланна (салайааччы Алина Говорова).
Кинигэ сүрэхтэниитин дьоро түгэнинэн, «Мэҥэ нэһилиэгэ» тыа сирин түөлбэтин баһылыга Габышев Ньургун Владимирович эҕэрдэ тылын тириэртэ уонна кинигэлэр тахсалларыгар үлэлэспит биир дойдулаахтарбытыгар Харитонова Клавдия Семеновнаҕа, Харитонов Николай Семеновичка, Борисов Федор Михайловичка махтал суруктары туттартаата.
«Мөҥүрүөнтэн төрүттээх Харитоновтар утумнара салҕанар» кинигэ сүрэхтэниитин кинигэ ааптара, үлэ бэтэрээнэ Клавдия Семеновна Харитонова аан тылынан аста.
«Мөҥүрүөнтэн төрүттээх Харитоновтар утумнара салҕанар» уонна «Бархагар Текесев удьуордара буолабыт» кинигэлэргэ анаан оҥоһуллубут презентцияны көрдөрөн, сиһилии сырдатан кэпсээтэ Анастасия Макаровна, Семен Николаевич Харитоновтар улахан сиэннэрэ Федор Михайлович Борисов.
Бу күн күндүтүк саныыр, ытыктыыр дьоннорун Анастасия Макаровна, Семен Николаевич Харитоновтар дьиэ кэргэни кытта алтыспыт, ыаллыы олорбут, эдэр саастарыттан атас-доҕор, күндү дьүөгэ, бииргэ үлэлээбит дьонноро уонна аймахтара, Балыктаах бөһүөлэгин олохтоохторо истиҥ санаанан кэлэн кыттыыны ылан, ахтыы оҥорон санааларын үллэһиннилэр:
САССР үтүөлээх учуутала Егор Александрович Захаров «Мөҥүрүөннэр» архивнай улахан кинигэни таһаарбыт, ытык киһибит кыыһа Захарова Валентина Егоровна – үлэ ветерана, СР култууратын туйгуна, Мөҥүрүөн нэһилиэгин бочуоттаах олохтооҕо.
Харитонов Николай Семенович таһаарбыт «Бархагар Текесев удьуордара буолабыт» кинигэтин туһунан ахтыы оҥордо Харитонова Оксана Николаевна уонна сэмэй бэлэхтэрин туттарда.
Мохначевскай Егор Семенович – 60 сыл массыына уруулуттан илиитин араарбакка үтүө суобастаахтык үлэлээбит ветеран суоппар, «СР автотранспорын бочуоттаах үлэһитэ» анал бэлиэ, 10 төгүл «Пятилетка ударнига» бэлиэтин хаһаайына, 1985, 1986, 1987 сылларга үс сыл субуруччу «Оройуон чемпион суоппара» анал аат хаһаайына, 1985 сыл Саха Өрөспүүбүлүкэтин агропромун чемпион суоппара, 1987 сылга Үлэ Албан аата кинигэҕэ киллэриллибит, Егор Цыпандин, чекист Петров бириэмийэлэрин хас да төгүллээх лауреата, нэһилиэккэ «Булчут кутаата» бырайыак төрүттээччитэ, билигин бочуоттаах сынньалаҥҥа олорор ытык мааны бэтэрээммит.
Скрябина Анисия Даниловна – ССРС култууратын туйгуна, СР култууратын үтүөлээх үлэһитэ, Мэҥэ нэһилиэгин уонна Мэҥэ Хаҥалас улууһун Бочуоттаах олохтооҕо.
Харитонов Тихон Николаевич оҕолорун ааттарыттан: Харитонова Марфа Петровна – педагогическай үлэ ветерана, Учууталлар учууталлара, «Мэҥэ Хаҥалас улууһугар үөрэхтээһин сайдыытыгар кылаатын иһин», «Мэҥэ Хаҥалас улууһугар култуура уонна искусство сайдыытыгар кылаатын иһин» анал бэлиэлэрдээх, СР уус уран самодеятельноһын бочуоттаах бэтэрээнэ, Мэҥэ нэһилиэгин бочуоттаах олохтооҕо уонна Колосова Любовь Тихоновна — СР үөрэҕин туйгуна, Учууталлар учууталлара, РФ уопсай үөрэхтээһинин бочуоттаах үлэһитэ.
Шишигин Илья Егорович – СР үөрэҕириитин бочуоттаах бэтэрээнэ, «Сахаада» спорт национальнай көрүҥэр маастара, М.П.Габышев аатынан Балыктаах орто оскуолатын учуутала.
Шишигина Любовь Егоровна – Өксөкүлээх Өлөксөй аатынан норуоттар доҕордоһууларын дьиэтин сүрүннүүр методиһа, култуура бэтэрээнэ, СР култууратын туйгуна.
Дьяконова Татьяна Васильевна – педагогическай үлэ бэтэрээнэ, сыана бэтэрээнэ, нэһилиэк уус-уран самодеятельноһын активнай кыттыылааҕа, Клавдия Семеновна истиҥ дьүөгэтэ уонна Гоголев Роман Иннокентьевич – үлэ бэтэрээнэ, «М.Горькай», «Мэҥэ» совхоз биир бастыҥ чемпион суоппара, Мэҥэ-Хаҥалас улууһун норуотун маастара, Мэҥэ нэһилиэгин бочуоттаах олохтооҕо.
Алексей Николаевич Харитонов оҕолорун ааттарыттан Харитонова Марианна Алексеевна.
Роман Макарович Скрябин оҕолорун ааттарыттан Евсеева Марфа Романовна.
Харитоновтар күн күбэй ийэлэрэ, эбээлэрэ Анастасия Макаровна бииргэ төрөөбүт Роман Макарович Скрябин сиэннэрин аатыттан Скрябин Спиридон Романович.
Харитонов Николай Семеновиһы алын кылаастарга үөрэппит учуутала Бурцева Зинаида Михайловна.
Анастасия Макаровна, Семен Николаевич Харитоновтар улахан сиэн кыыстара Борисова Анастасия Михайловна, эдьиийдэрэ Клавдия Семеновна көҕүлээһининэн толкуйдаммыт кинигэлэрэ күн сирин көрбүтүнэн истиҥник махтанан туран, эдьиийдэригэр оҕолор, сиэттэр ааттарыттан тыыннаах сибэкки дьөрбөтүн бэлэх уунна, ону сэргэ Харитоновтар ааттарын ааттатар, элбэх кэнчээри ыччакка күн сирин көрдөрбүт мааны кийииттэригэр Марта Антоновна Харитоноваҕа сэмэй бэлэхтэрин туттардылар.
Харитонова Клавдия Семеновна аҕалара, эһээлэрэ Харитонов Семен Николаевич төрөөбүтэ 100, Улуу Кыайыы 80 сылларын көрсө, бу орто дойдуга олорон ааспыт олоҕун, үлэтин көрдөрөр «Мөҥүрүөнтэн удьуордаах Харитоновтар утумнара салҕанар» уонна Харитоновтар аймах төрүччүлэрин сырдатар «Бархагар Текесев удьуордара буолабыт» кинигэлэр сүрэхтэниилэригэр кыттыыны ылбыт аймах билэ дьонугар-сэргэтигэр, биир дойдулаахтарыгар уонна күүс-көмө буолбут дьонноругар махтал тылларын тириэртэ, өйдөбүнньүк бэлэхтэри, нэһилиэк библиотекатыгар «Мөҥүрүөнтэн удьуордаах Харитоновтар утумнара салҕанар», нэһилиэк музейыгар «Тыыл, үлэ бэтэрээнэ Харитонов Семен Николаевич» кинигэлэрин бэлэх уунна.
Кинигэлэр сүрэхтэниитин тэрээһинин музыкальнай эҕэрдэлэр ситэрэн, киэргэтэн биэрдилэр:
Олох-дьаьах коммунальнай хаһаайыстыба үлэһиттэрин ансаамбылын толоруутугар ырыа, Анастасия Варламава тыла уонна дьүрүлэ «Аҕам алааһа».
Петр Дохунаев толоруутугар «Дойдум сарсыардата» ырыа.
М.П.Габышев аатынан Балыктаах орто оскуолатын учууталларын толорууларыгар ырыа, Василий Гоголев-Уйулҕан тыла, Күннэйэ Цыпандина дьүрүлэ «Балыктааҕым – мин дойдум».
Дария Андросова толоруутугар «Норуот ырыаларынан попурри».
Кинигэлэр сүрэхтэниилэрин дьоро күнүн иилээн-саҕалаан ыытта Сардана Степановна Стручкова.
Салгыы бүгүҥҥү дьоро күн ыалдьыттара, нэһилиэк олохтоохторо сылаас астаах, итии чэйдээх, минньигэс торт кэһиилээх сандалы тула олорон, ирэ-хоро кэпсэтэн, санаа атастаһан, кинигэлэр сүрэхтэниилэрин дьоро күнэ бэрт сэргэхтик түмүктэннэ.
Сандалы тула олорон Шишигина Любовь Егоровна, Шишигин Илья Егорович, Бурцева Зинаида Михайловна, Захарова Валентина Егоровна, Харитонов Петр Алексеевич, Харитонов Алексей Алексеевич, Кычкин Семен Павлович, Скрябина Анисия Даниловна, Харитонова Светлана Семеновна, Харитонова Клавдия Семеновна бэйэлэрин истиҥ ахтыыларын оҥорон, сырдык санааларын тириэртилэр.
Харитонов Семен Николаевич төрөөбүтэ 100, Улуу Кыайыы 80 сылларын көрсө бу орто дойдуга олорон ааспыт олоҕун, үлэтин көрдөрөр «Мөҥүрүөнтэн удьуордаах Харитоновтар утумнара салҕанар» уонна Харитоновтар аймах төрүччүлэрин сырдатар «Бархагар Текесев удьуордара буолабыт» кинигэлэр сүрэхтэниитин тэрээһинин сэргээн – сэҥээрэн, үтүө тылларынан ахтан-санаан ааспыккытыгар Анастасия Макаровна, Семен Николаевич Харитоновтар оҕолорун, сиэннэрин, хос сиэннэрин уонна олохтоох култуура дьиэтин коллективын аатыттан нэһилиэкпит олохтоохторугар, ыалдьыттарбытыгар сылаас махтал тылларын аныыбыт. Анастасия Макаровна, Семен Николаевич аатын ааттатар ыччаттара сырдык ыраас санаалаах, эйэҕэс-сайаҕас майгылаах, үгүс үөрүү үктэллээх үлэһит үтүөтэ буолуҥ диэн баҕа санаа бастыҥын тиэрдэбит. Дьоллоох буолуҥ, этэҥҥэ буолуҥ!
