Ахсынньы 18 күнүгэр Балыктаах бөһүөлэгэр Мэҥэ-Хаҥалас улууһун Аҕа баһылыга Тихонов Дмитрий Иванович, отчуоттуур бөлөҕө кыттыылаах, 2024 сыллаах үлэтин отчуота буолан ааста.
Олохтоох култуура дьиэтигэр киэһэ биэс чаастан саҕаламмыт 2024 сыллааҕы үлэ отчуотун мунньаҕар нэһилиэкпит 78 олохтооҕо кыттыыны ылла. Мэҥэ-Хаҥалас улууһун баһылыгын сыллааҕы отчуота улууспут гимнынан саҕаланна.
Баһылык Дмитрий Иванович отчуоту туруорар бөлөх састаабын билиһиннэрдэ, ол курдук оройуон дьокутааттарын Сэбиэтин бэрэссэдээтэлэ Иннокентий Андросов, Ил Түмэн дьокутаата Андрей Находкин, улуус управлениеларын, тэрилтэлэрин салайааччылара кыттыыны ыллылар, мунньаҕы нэһилиэк баһылыга Александр Валерьевич Куприянов иилээн-саҕалаан ыытта.
Отчуоту билиһиннэриэн иннинэ, Дмитрий Иванович үөрүүлээх наҕараадалары туттартаата. Ол курдук, улууспутугар норуот маастардарын өйүүр программаҕа олоҕуран, Саха Республикатын уус-уран оҥоһуктарын маастарыгар Валентина Борисовна Березкинаҕа 60 000 солкуобай суумалаах туоһу суругу, ону сэргэ бэрт соторутааҕыта Москва куоракка ыытыллыбыт «Бастыҥ тиэргэн» бүтүн Арассыыйатааҕы дьиэ таһынааҕы сири-уоту тупсарыы бырайыактарын конкурсугар ситиһиилээхтик кыттан кэлбит Сайнаара Стручковаҕа махтал суругу, сэмэй бэлэҕи дохсун ытыс тыаһыгар туттарда.
Салгыы 2024 сылга барбыт үлэ сүнньүнэн, нэһилиэк олохтоохторугар иһитиннэрии оҥордо, 2022, 2023 сылларга тэҥнээн отчуоту сиһилии сырдатта. Дмитрий Иванович отчуотун истэн баран, олохтоохтор долгутар сүрүн ыйытыылары туруорустулар.
Ол курдук, Сүрэх-тыа түөлбэҕэ турар Юпитер котельнай 2024-2025 оттук сылыгар кылгас кэмҥэ ГУП ЖКХ хааччыйыытыгар бэриллэн, аны сааска диэри үлэлии турарынан, салгыы котельнай үлэтэ хайдах буоларын, туттуллар уу төлөбүрүн боппуруостарынан, «Мараҕа» сайылыгар уот линиятын остуолбаларын бөҕөргөтүү өрөмүөннэрэ ыытыллыахтарын наадатын, «Хаарбах дьиэттэн көһөрүү» программа биһиги нэһилиэкпитигэр хайдах үлэлиирин, Төҥүлүттэн Балыктаахха дылы кэлэр суолу «Төҥүлү – Бороҕон суолун өрөмүөнэ» проекка киллэрии, үрдүк күүрүүлээх уотунан бөһүөлэги толору хааччыйыы, 2025 сылга саҥа кулууп тутулларын инвестиционнай программаҕа киллэрии, Төҥүлү нэһилиэгэр бытовой гааһы заправкалыыр тэрилтэ үлэтин сөргүтэрэ наадалааҕын, дэриэбинэ таһынан ааһар трасса суолугар сүөһүлэргэ, сылгыларга суолу туоруур кутталлааҕын иһин, суол знактарын туруорарга, 35 саастарыгар дылы эдэр ыалларга дьиэ тутталларыгар ипотекаҕа анал программа уочаратын туһунан уо. д.а. ыйытыктары биэрэннэр улуус баһылыга Дмитрий Иванович Тихонов, туһааннаах управлениелар салайааччылара хас биирдии киирбит боппуруоска чопчу, толору эппиэттэри биэрдилэр.
«Хоту» Төҥүлүтээҕи тыа хаһаайыстыбатын потребительскай кооператив салайааччыта Иван Максимов «Хаххах» подстанционнай объект буоларынан, нэһилиэккэ үүт туттарыытыгар үлэлэр баралларын, сайылык уотун өрөмүөнүгэр Төҥүлүтээҕи РЭС-тэри кытта тэҥҥэ үлэлэһэргэ интэриэстээҕин уонна тэҥҥэ үлэлэһэргэбэлэмин туһунан баҕа санаатын тиэртэ.
Ил Түмэн дьокутаата Андрей Находкин дойдубут таһымыгар киириэхтээх олохтоох бэйэни салайыныыга туһуламмыт “КлиКра” сокуон барылын, итиэннэ, бу сокуон ахсынньы ыйга көрүллүөхтээх этэ, ол эрэн кэккэ биричиинэлэринэн көспүтүн дьоҥҥо-сэргэҕэ билиһиннэрдэ.
Отчуот сүнньүнэн саҥа соруктар турдулар, сонун этиилэр киирдилэр. Нэһилиэк олохтоохторо көрсүһүү түмүгүнэн улууска ыытыллар үлэни биһирииллэрин биллэрдилэр.
Түмүккэ, баһылык Дмитрий Тихонов ааспыт сылга отчуокка 54 киһи сылдьыбыт эбит буоллаҕына, бүгүн 78 киһи сырытта, бу сүрдээх үчүгэй көстүү, дьон-сэргэ улууспут, нэһилиэк сарсыҥҥытын туһугар көхтөөх көрүүгүтүн көрдөрөр диэн отчуоттуур мунньахха кыттыыны ыла кэлбит нэһилиэк олохтоохторугар, ону сэргэ билигин хас киһини барытын долгутар анал байыаннай дьайыыга сылдьар уолаттарга, нэһилиэк туора турбакка, улахан көмөлөрүн иһин истиҥ махталын тириэртэ. Кэлэн иһэр саҥа 2025 сыл барыбытыгар үчүгэй солуну, ситиһиилэри аҕаллын диэн баҕа санаа бастыҥын анаан, истиҥ-иһирэх кэпсэтиилээх мунньах түмүктэннэ.
