Күнтэн күөх халлаан мичээрэр, күнтэн күөл үрдэ мичээрэр, күнтэн сир сирэм мичээрэр, күнтэн сибэкки тэтэрэр. Ойор-тэбэр оҕо саас, омун-төлөн оҕо саас, мэник-тэник санаалаах дьиктилээхэй оҕо саас.
Олох кыра сааһыттан кырачаан киһини тулалыыллар иһирэх ийэ, амарах аҕа таптала, истиҥ эбээ, дьоһун эһээ сылаас сыһыаннара, уһуйаан истиҥ иитээччилэрэ, үлэһиттэрэ уостубат сыралара, уҕараабат кыһамньылара. Кинилэр баар буоланнар кырачааннар дьоллоохтор, үөрүүлэрэ-көтүүлэрэ үксүүр, кэрэҕэ-сырдыкка тардыһаллара күүһүрэр.
Олунньу 27 күнүгэр олохтоох култуура дьиэтигэр Балыктаахтааҕы кустовой методическай холбоһук уһуйааннарын үлэһиттэрэ дьоһун үбүлүөйү бары бииргэ бэлиэтиир дьоро тэрээһинэ буолан ааста.
Дьоро күн үөрүүлээх тэрээһин кыттыылаахтарын парадынан саҕаланна.
Степан Федорович Попов аатынан Дойду оскуола-сад үтүө санаалаах үлэһиттэрэ. Киэҥ историялаах, улууспутугар, республикабытыгар биллиилээх дьону иитэн-үөрэтэн таһаарбыт үөрэх кыһата. Директор Корякин Антон Кузьмич.
Саргылана Гаврильевна Олесова аатынан Тарат сүрүн уопсай үөрэхтээһин оскуолатын “Сулусчаан” уһуйаан иһирэх сыһыаннаах үлэһиттэрэ. Сахабыт концепциятыгар аан маҥнайгынан сүрүн кылаатын киллэрсибит, олоҥхону өрө туппут, улуус, республика таһымыгар тахсыбыт биир биллэр көстөр уһуйаан буолар. Директор Петров Петр Николаевич.
Маттатааҕы “Ньургуһун” уһуйаан амарах санаалаах үлэһиттэрэ. Уһуйаан 1977 сылтан аһыллан элбэх кырачаан оҕолору иитэн-көрөн, үлэлээн кэллэ. Биир туспа суоллаах- хайысхалаах, эйгэлээх уһуйаан. Араас таһымнаах көрүү кыайыылаахтара. 2024-2025 үөрэх сылын түмүгүнэн 3 бөлөххө 1 миэстэни ылан, 300 тыһыынчалаах улуус Баһылыгын гранынан наҕараадаламмыта. Сэбиэдиссэй — «Саха Өрөспүүбүлүкэтин Үөрэҕириитин туйгуна», «Российскай Федерация уопсай үөрэхтээһинин бочуоттаах үлэһитэ» Ченянова Марианна Семеновна.
Балыктаахтааҕы “Звездочка” уһуйаанын дьулуурдаах үлэһиттэрэ. Дириҥ историялаах, дьоһун үлэһиттэрдээх, олох хаамыытынан тэҥҥэ хардыылаан иһэр улууска, республикаҕа биллэр-көстөр уһуйаанынан буолар. 2021-2022-2023-2024 үөрэх сылларын бастыҥ көрдөрүүлэрин ситиһэн, Баһылык гранынан наҕараадаламмыта. 2025 сыл түмүгүнэн улуустааҕы методическай марафон кыайыылааҕа, 50 тыһыынчалаах сертификат хаһаайына. Сэбиэдиссэй: “РСФСР үөрэҕириитин туйгуна”, «Российскай Федерация уопсай үөрэхтээһинин бочуоттаах үлэһитэ» Кычкина Антонина Сергеевна.
Күнү кытта тэҥҥэ күнүн аайы кэлээччи, эдэрдии эрчимнээх, эйэҕэс мичээрдээх , элэккэй майгылаах уһуйааннарбыт бары үлэһиттэригэр итии-истиҥ эҕэрдэ буолуохтун!
Быйыл Мэҥэ-Хаҥалас улууһугар оскуола саастаах оҕолору уһуйар оҕо садтара төрүттэммитэ 100 сылыгар анаммыт үөрүүлээх тэрээһин бэлиэтин — вымпелы өрө көтөҕөргө үрдүк чиэс бэриллэн ыҥырылыннылар:
Прибылых Марина Семеновна, бастыҥ иитээччи, туох баар билиитин-көрүүтүн, сүрэҕин сылааһын кырачааннарга анаабыт, 30 сыл устата Балыктаах детсадыгар эҥкилэ суох үлэлээбит, оҕо-аймах кутун туппут, таптыыр иитээччилэрэ, педагогическай үлэ бэтэрээнэ, Максимова Антонина Прокопьевна, Мөҥүрүөн нэһилиэгин депутата, 36 сыл Маттатааҕы “Ньургуһун” оҕо уһуйааныгар иитээччинэн үлэлээн кэллэ. Бастыҥ наставник, эдэр иитээччилэр үтүө сүбэһиттэрэ, Саха Өрөспүүбүлүкэтин Үөрэҕириитин туйгуна, педагогическай үлэ бэтэрээнэ, Соловьева Анна Аксентьевна, Тарат «Сулусчаан» уһуйаан иитээччитэ, педагогическай үлэ ветерана, Араҥас нэһилиэгин бочуоттаах олохтооҕо, Саха Өрөспүүбүлүкэтин үөрэҕириитин туйгуна. “Саха Өрөспүүбүлүкэтигэр оскуола саастаах оҕолору иитиигэ кылаатын иһин” бэлиэ хаһаайката, бастыҥ иитээччи, наставник уонна эдэр педагог Степан Федорович Попов аатынан оскуола–сад эдэр эрчимнээх иитээччитэ Борисова Алена Петровна.
Мэҥэ-Хаҥалас улууһугар кыра саастаах оҕолору иитэр-үөрэтэр тэрилтэлэр аһыллыбыттара 100 сылыгар анаммыт үөрүүлээх тэрээһини кырачаан оҕолор иитээччилэринээн уус ураннык хоһоон ааҕан киэргэттилэр.
Үтүмэн элбэх оҕону сүрэххит сылааһынан бүөбэйдээн, ийэлии истиҥ сыһыаҥҥытынан, тапталгытынан угуттаан, иитэн-үөрэтэн таһаардыгыт, үөрэххэ-билиигэ, кэрэҕэ-сырдыкка сирдээтигит. Ол иһин бүгүн биһиги эһиэхэ барҕа-махтал тылларын аныыбыт. Бэйэлэрин эҕэрдэ тылларын тириэртилэр Мэҥэ нэһилиэгин баһылыгын солбуйааччыта Иван Егорович Мохначевскай, Мөҥүрүөн нэһилиэгин баһылыга Александров Юрий Николаевич, Араҥас нэһилиэгин баһылыга Кычкин Андрей Никитич.
Оҕо туһа диэн, кини киһи буоллун диэн сурэхтэрин сылааһын, дууһаларын иэйиитин, иҥэриммит билиилэрин, мунньуммут уоппуттарын ахсаабакка биэрбит күндү дьоммутугар, ытыктабыллаах бэтэрээннэрбитигэр мэлдьитин күүскүтүн-уоххутун, сатабылгытын барытын уурбуккутун, үлэҕит-хамнаскыт ситиһиилээх буоларыгар мэлдьи туруулаһан үлэлээбиккитин үрдүктүк сыаналыыр, киэн туттар уһуйааннар сэбиэдиссэйдэрэ иэйиилээх эҕэрдэлэрин тириэртилэр.
Балыктаах “Звездочка” уьуйаан ытыктабыллаах ветераннарыгар Прибылых Марина Семеновнаҕа, Дьяконова Татьяна Васильевнаҕа, Габышева Марфа Николаевнаҕа, Сотникова Марфа Васильевнаҕа,Мохначевская Александра Ильичнаҕа,Никитина Мария Иннокентьевнаҕа, Шишигина Людмила Егоровнаҕа,Кычкин Валентин Семеновичка Балыктаахтааҕы “Звездочка” уһуйаан сэбиэдиссэйэ Кычкина Антонина Сергеевна эҕэрдэлэри, сэмэй бэлэхтэри,тыыннаах сибэкки дьөрбөтүнтуттарда.
Маттатааҕы “Ньургуһун” уһуйаан ытыктабыллаах ветераннарыгар Гоголева Марфа Николаевнаҕа, Маркова Татьяна Петровнаҕа,Гурьева Людмила Егоровнаҕа, Кычкина Александра Петровнаҕа, Скрябина Александра Дмитриевнаҕа, Турантаева Евдокия Ефимовнаҕа Маркова Марианна Афанасьевнаҕа, Маркова Людмила Егоровнаҕа,. Егорова Анна Семеновнаҕа,Местникова Анна Николаевнаҕа эҕэрдэ эриэккэһин тириэртэ, сэмэй бэлэхтэри,тыыннаах сибэкки дьөрбөтүн туттарда Маттатааҕы “Ньургуһун” уһуйаан сэбиэдиссэйэ Ченянова Марианна Семеновна.
Саргылана Гаврильевна Олесова аатынан Тарат сүрүн уопсай үөрэхтээһин оскуолатын “Сулусчаан” уһуйаан ытыктабыллаах ветераннарыгар Иванова Елена Титовнаҕа, Герасимова Антонина Васильевнаҕа, Кычкина Екатерина Петровнаҕа,Ноговицына Лариса Михайловнаҕа, Олесова Александра Степановнаҕа эҕэрдэ тириэртэ , сэмэй бэлэхтэри, тыыннаах сибэкки дьөрбөтүн туттарда Саргылана Гаврильевна Олесова аатынан Тарат сүрүн уопсай үөрэхтээһин оскуолатын оскуола иннинээҕи үэрэхтээһиннэ директоры солбуйааччы, “Сулусчаан” уһуйаан иитээччитэ Кычкина Анастасия Иннокентьевна.
Ытык-мааны дьоммут, өссө да үһун сылларга биһиги аттыбытыгар сылдьан үтүө сүбэһит буолун, куруутун эдэрдии эрчимнээхтик сылдьын, ыарыы диэни билимэҥ, уһун дьоллоох олохтонун!
Ыллыктаах эҕэрдэлэрин тириэртилэр ытыктабыллаах бэтэрээннэрбит:
Гоголева Марфа Николаевна – педагогическай үлэ бэтэрээнэ, “Саха Өрөспүүбүлүкэтигэр оскуола саастаах оҕолору иитиигэ кылаатын иһин” бэлиэ хаһаайката уонна Балыктаах оҕо уһуйааныгар уһун сылларга үтүө суобастаахтык, айымньылаахтык иитээччинэн, сэбиэдиссэйинэн үлэлээбит педагогическай үлэ бэтэрээнэ, сыана бэтэрээнэ Дьяконова Татьяна Васильевна.
Уһуйааҥҥа сылдьан оҕолоро ахсаан суоттуурга, буукубалары билэргэ, уруһуйдуурга, ыллыырга, үҥкүүлүүргэ уонна да атын сатабылларга үөрэ-көтө үөрэммиттэригэр, уһуйаан бары үлэһиттэрэ кырачаан оҕолор барахсаттарга күннэтэ үтүөҕэ үөрэтэллэригэр, минньигэс аһынан күндүлүүллэригэр, ыраас таҥаска утуталларыгар, ыарыйдахтарына эмтээбиттэригэр, эһиги уҕараабат кыһамньыгытыгар, истиҥ-иһирэх сыһыаҥҥытыгар махталларын аҕаллылар төрөппүттэр.
Төрөппүттэр ааттарыттан эҕэрдэ тыл анаата элбэх оҕо кун кубэй ийэтэ Артемьева Сарана Бимбаевна.
Үөрүүлээх тэрээһини музыкальнай нүөмэрдэр ситэрэн, киэргэтэн биэрдилэр:
Балыктаахтааҕы «Звездочка»уһуйаан үлэһиттэрин, төрөппүттэрин толоруутугар эҕэрдэ үҥкүүтэ.
“Сайдыына” ансаамбыл толоруутугар Милена Борисова репертуарыттан «Эҕэрдэ ырыата»
Холбоһуктаах хор толоруутугар “Оҕо саас чуораана”. Марта Петрова тыллара, Егор Неустроев – Уйулҕан мелодията.
“Ньургуһуннар” Василий Никифоров тыла, мелодията , толорор Маттатааҕы “Ньургуһун” оҕо уһуйаанын коллектива.
Чугдаарар чуорааннарын, оҥой-соҥой көрбүттэрин, күннэтэ үөрэтэр-такайар, ыраас эйгэлээх, айар-тутар аналлаах иитээччи үрдүк аатын үйэлэргэ ааттатар истиҥ иитээччилэргэ, оҕо сыттаах, амарах санаалаах бары үлэһиттэргэ эҕэрдэ эриэккэһин, махтал бастыҥын аныыбыт диэн туран бырааһынньыктааҕы минньигэс торт киллэрии чаҕылхай түгэнэ барыбытын долгутта, үөртэ.
Күндү дьоммутугар саха алмааһын курдук кытаанах доруобуйаны, туох баар үтүөнү, кэрэни, дьоллоох олоҕу баҕарабыт! Эһиги халлааҥҥыт куруутун ыраас, күҥҥүт чэмэлкэй буолуохтун, эһиги олоххутун дьол-соргу арыаллаатын!
Кэрэни кэрэһэлээн, үтүөнү үксэтиҥ, элбэҕи ситиһиҥ, үрдүктэн үрдүккэ дабайыҥ! Айыллыбыт аналгытынан уҕараабат уйгуну уһаҥсыҥ, саргылаах сарсыҥҥыны салайсыҥ, саха омук кэскилин түстэһиҥ! Баҕарабыт бука барыгытыгар чэгиэн-чэбдик туругу, аҕыс үйэ тухары алла турар быйаҥы, илин өттүттэн ибири билимэҥ, кэлин өттүттэн кэбири билимэҥ, үөһээ өттүттэн үргүөр үргүйбэтин, аллараа өттүттэн аргыар аргыйбатын диэн алҕаатахпыт буолуохтун!
