Олунньу 21 күнүгэр «Түмсүөҕүҥ, сомоҕолоһуоҕуҥ — эйэлээх олоҕу тутуотуҥ!» диэн девизтаах 68-с төгүлүн ыытыллар «В.К.Степанов аатынан култуура уонна спорт эстафета» фестивалын кыттыылааҕа — Мэҥэ нэһилиэгэ Аллараа Бэстээх бөһүөлэгэр ыалдьыттаата.
Бу күн эстафета балаһыанньатынан Балыктаах, Аллараа Бэстээх бөһүөлэктэрин сүүмэрдэммит хамаандалара Роман Иванович Брызгалов аатынан транспортнай техникумҥа күөн көрсөн уопсайа 10 көрүҥҥэ эрбии тииһин курдук тэҥҥэ кииристилэр. Биһиги нэһилиэкпит кэскиллээх ыччаттара мас тардыһыытыгар, хапсаҕайга, канаат тардыһыытыгар күүскэ бэлэмнэнэн кэлбиттэрин көрдөрдүлэр. Түмүккэ 18-17 очкону ылан 1 очконан баһыйан олохтоохтор инники таҕыстылар.
Киэһэ 19:00 чаастан Аллараа Бэстээх култууратын дьиэтигэр лып курдук саалга мустубут көрөөччүлэргэ, дьүүллүүр сүбэҕэ «Түмсүөҕүҥ, сомоҕолоһуоҕуҥ – эйэлээх олоҕу тутуоҕуҥ!» диэн девизтээх 68-с төгүлүн ыытыллар Василий Константинович Степанов аатынан култуура уонна спорт эстафетатын бэстибээлин кыттыылааҕа, ырыаҕа ылламмыт, хоһооҥҥо хоһуйуллубут сүүһүнэн уот лаампалаах Балыктаах бөһүөлэгин уус-уран самодеятельноһын кэнсиэрэ буолла.
Мэҥэ нэһилиэгин уус-уран самодетяельноһын кэнсиэрин түмүгэ маннык буолла:
Дипломант аатын сүктүлэр:
“Ситим” эр дьон вокальнай ансаамбылын толоруутугар Тимофей Сметанин тыла, Ольга Иванова матыыба “Манчаары туһунан ырыа”, салайааччы СР култууратын туйгуна Иван Прибылых.
Хор толоруутугар Иннокентий Сосин тыла, Виктор Жирков матыыба «Мэҥэлэр өрөгөй ырыалара» ырыа, салайааччы СР култууратын туйгуна Иван Прибылых.
“Мичээр” үҥкүү бөлөҕүн толоруутугар “Дьиэрэҥкэй” үҥкүү, үҥкүүнү бэлэмнээтилэр Мария, Дьулустаан Кычкиннар, Лилия Долгунова.
Рима Фадеева толоруутугар Анна Барашкова тыла уонна матыыба “Сахам сирэ” ырыа.
Уолаттар толорууларыгар үҥкүү «Уран», үҥкүүнү туруорда Дьулустаан Кычкин.
Илья Шишигин, Иван Молуков толорууларыгар оригинальнай жанр.
“Сайдыына” кыргыттар вокальнай ансаамбыл толоруутугар Любовь Бакуменко репертуарыттан «Сахам сирэ», салайааччы Рима Фадеева.
Ыччат түмүктүүр блога.
Лауреат үрдүк аатын ыллылар:
Хор толоруутугар Петр Одорусов тыла, Николай Бойлохов матыыба “Тыыннаахтар умнубат сыллара” ырыа, салайааччы СР култууратын туйгуна Иван Прибылых.
Елена Владимирова толоруутугар Расул Гамзатов тыла, Ян Френкель матыыба “Журавли” ырыа.
Квартет толоруутугар Марфа Куличкина тыла, Аркадий Алексеев матыыба “Герой Попов туһунан ырыа”, салайааччы СР култууратын туйгуна Иван Прибылых.
Маны таһынан бииртэн биир ирдэнэр нүөмэрдэри ситиһиилээхтик көрдөрөн, көрөөччүлэр сылаас ытыс тыаһынан астына-дуоһуйа көрүстүлэр:
«Мүчүк» фольклорнай ансаамбыл толоруутугар «Фольклорнай композиция», салайааччы СР култууратын үтүөлээх үлэһитэ Анисия Даниловна Скрябина.
Икки көлүөнэ үҥкүүһүттэрин толоруутугар «Синий платочек», үҥкүүнү бэлэмнээтилэр СР култууратын үтүөлээх үлэһитэ Сардана Стручкова, Мария Кычкина, Лилия Долгунова.
Сардана Стручкова суруйуутунан сценка «Көрсүһүү», оруолларга: Илья Владимиров, Владимир Габышев, Яна Васильева.
Саха суруйааччылара Ийэ дойду көмүскэлигэр анаммыт айымньыларыттан таҥыллыбыт уус-уран ааҕыы «Аналбыт — эрэнэ кэтэһии».
«Бэтиэхэлээх Балыктаахтар» толорууларыгар сценка «Автобуска», оруолларга: Владимир Габышев, Саргылаана Степанова, Егор Афанасьев, Татьяна Иванова, Яна Васильева, Лилия Долгунова, салайааччы Татьяна Иванова.
«Ай-Тыас» фольклорнай бөлөх толоруутугар чабырҕах «Сайылык кыргыттара», салайааччы Дария Андросова.
Вадим Шепелев, Гаврил Дьяконов толорууларыгар Анна Барашкова тыла уонна матыыба «Мин дойдум».
«Түмсүөҕүҥ, сомоҕолоһуоҕуҥ – эйэлээх олоҕу тутуоҕуҥ!» диэн девизтээх уус-уран самодеятельноһын кэнсиэрин иилээн-саҕалаан ыыттылар Татьяна Стручкова, Александр Куприянов.
Мэҥэ нэһилиэгин уус-уран кэнсиэрин дьүүллүүр сүбэ 4,0 баалынан сыаналаата.
Уус-уран кэнсиэрин тэрээһин үлэтигэр күүс-көмө буолбут дьоммутугар СР култууратын үтүөлээх үлэһитэ Скрябина А.Д., СР култууратын туйгуна Прибылых И.Н., олохтоох олох-дьаһах коммунальнай хаһаайыстыба начальнигар Ноговицын И.Н., М.П.Габышев аатынан Балыктаах орто оскуолатын директорыгар Иванов Е.Н., Кычкин Дь.В., Кычкина М.В. дьүүллүүр сүбэ грамота туттартаата.
68-с төгүлүн ыытыллар «В.К.Степанов аатынан култуура уонна спорт эстафета» фестивалыгар нэһилиэкпит чиэһин көмүскээбит спортсменнарбытыгар, эстафета уус-уран самодеятельноһын кыттыылаахтарыгар, күүс-көмө, сүбэ-ама буолбут, биһиги туспутугар «ыалдьыбыт» бар дьоммутугар олохтоох култуура дьиэтин коллективын аатыттан улахан махталбытын тиэрдэбит. Бу курдук куруутун маннык биир санаанан, көхтөөхтүк кыттан, нэһилиэкпит туһугар үлэлии-хамсыы сылдьыаҕыҥ.
