Сэтинньи ый 2 күнүгэр Мэҥэ нэһилиэгэр үөрүүлээх бэлиэ түгэн буолан ааста. Ол курдук ытык олоҕу олорбут, олоҕун үлэҕэ анаабыт, ытык мааны аҕам саастаах киһибит, үлэ тыыл ветерана, сэрии сылын оҕото, коммунистическай үлэ ударнига, «Килбиэннээх үлэтин иһин» мэтээл бэлиэ хаһаайына, Мэҥэ нэһилиэгин бочуоттаах олохтооҕо Стручков Иван Егорович 90 үбүлүөйдээх сааһын туолар үөрүүлээх күнүгэр, ыраахтан-чугастан уруу-аймах дьоно, ыалдьыттар мустан, эҕэрдэ эриэккэһин анаатылар. 90 саас диэн ылбычча киһи тиийбэт сааһа, дьоллоох, дьоһуннаах саас.
Иван Егорович сэтинньи ый 2 күнүгэр 1935 сыллаахха «Атах алаас» диэн дьонун кыстык сиригэр күн сирин көрбүтэ. Иван Егорович олох кыра сааһыттан тулаайах хаалан, холкуос ыарахан үлэтигэр миккиллэн буспута-хаппыта. Сэрии ыар тыынын этинэн-хаанынан билэн, олоҕун бастакы кэрчигэ саҕаламмыта. Ол курдук убайын Гаврил Прокопьевиһы батыһан, эдьиийдэригэр Александра Прокопьевнаҕа эҥэрдэһэн, ас-таҥас тиийбэтин, ыар сүтүк аһыытын, кыһалҕатын барытын билэн, үчүгэй олоххо кэрэҕэ тардыһыылаах күүстээх санаалаах буола улааппыта, улахан дьону кытта тэҥҥэ кыайыыны уһансарга күүс-көмө буолбута. 1953 с. трактористар курстарыгар 3 ый үөрэнэн, права ылан, МТСка тракториһынан үлэтин саҕалаабыта. МТС ыһыллыбытын кэннэ “Октябрь” колхозка, “М.Горькай” совхозка тракториһынан үлэлиир. Үлэтигэр ирдэбиллээх, эппиэтинэстээх үлэһит бииргэ үлэлиир дьонугар убаастабылынан туһанар. Хараҕын дэҥнэтэн, 3 группалаах инбэлиит буолар. Онтон тутуу биригээдэтигэр, үлэҕэ көхтөөх, дьаныардаах, туппуттарын ыhыктыбат, айар-тутар мындыр, уус дьону кытта үлэлээбитэ. Балыктаах бөһүөлэгэ сайдарын, тупсарын туһугар сэмэй кылаатын киллэрсэн элбэх саҥа дьиэлэри, обьектары тутуһар. Салгыы сүөһү көрүүтүгэр пенсияҕа тахсыар диэри үтүө суобастаахтык үлэлээбит буолан, элбэх бочуотунай грамоталарынан, махтал суруктарынан, түөскэ кэтиллэр бэлиэлэринэн наҕараадаламмыта. 1958 сыллаахха төрдү-ууһу салгыыр олох сокуонунан, таптыыр кыыһын, Полина Яковлевнаны кэргэн ылан, кыыстаах уол оҕону иитэн аҕа буолар дьолломмута. Дьиэ-уот туттан, оҕолорун үөрэттэрэн, үлэһит дьон оҥортоон, ыал буолалларыгар көмө — тирэх буолан, билигин 4 сиэн, 2 хос сиэн эйэҕэс эһээтэ.
Нэһилиэкпит дьонун-сэргэтин аатыттан эҕэрдэ тылы тириэртэ «Мэҥэ нэһилиэгэ» тыа сирин түөлбэтин баһылыга Габышев Ньургун Владимирович.
Мэҥэ-Хаҥалас улууһун администрациятын, улуус баһылыга Тихонов Дмитрий Иванович аатыттан улуус депутаттарын Сэбиэтин председателэ, депутатпыт Андросов Иннокентий Иннокентьевич истиҥ эҕэрдэ тылын тириэртэ уонна Россия Президенин Владимир Владимирович Путин уонна Ил Дархан Айсен Сергеевич Николаев эҕэрдэ суруктарын үөрүүлээх быһыыга-майгыга туттарда.
«Эн бэйэҥ күүскүн, өйгүн-санааҕын ууран, дьонум-сэргэм туһа диэн колхуос, сопхуос күүрэннээх кэмнэригэр үтүө суобастаахтык үлэлээбит үтүөлэриҥ иһин барҕа махталбытын тиэрдэбит! Баҕарабыт эйиэхэ, ытык мааны кырдьаҕаспытыгар чэгиэн доруобуйаны, үгүс үөрүүлээх, дьоллоох-соргулаах уһун үйэни, нус-хас байылыат олоҕу, этэҥҥэ буолууну!» — диэн Мэҥэ-Хаҥалас улууһун нэһилиэнньэ социальнай көмүскэлин биир кэлим киинин аатыттан Маттатааҕы социальнай геронтологическай киин салайааччыта Куприянов Александр Валерьевич эҕэрдэ үтүөтүн ыпсаран биэрдэ.
Салгыы «Лесной» түөлбэ салайааччыта Кычкина Мария Спиридоновна, чугас аймах-билэ дьонноро дьоһун түгэнинэн үөрэ-көтө тыл эттилэр, эҕэрдэ бастыҥын анаатылар. Иван Прибылых баянынан доҕуһуоллаан, ылбаҕай ырыатынан бэлиэ түгэни киэргэттэ.
Иван Егорович үлэни өрө тутан, уһун сыллар усталарыгар тыа хаһаайыстыбата сайдарын туһугар сэмэй кылаатын киллэрсэн үлэлээбитэ-хамсаабыта. Билигин Майаҕа кыыһын Ульяна Ивановна, күтүөтүн Степан Иннокентьевич, сиэннэрин көрүүтүгэр, кинилэр сылаас тапталларыгар бигэнэн, нус бааччы олорор. 90-с хаарын үктээтэр да, ытык-мааны киһибит олох-дьаһах хаамыытын хаһыаты ааҕан, телевизоры көрөн билсэ олорор.
Ытыктабыллаах Иван Егорович, өссө төгүл өрөгөйдөөх үбүлүөйгүнэн итиитик-истиҥник эҕэрдэлиибит. Эйиигин кытта кэрэ санаа кэккэлэстин, сэргэхтик туттан-хаптан уһун сылларга сүһүөҕүн үрдүгэр, чэгиэн-чэбдик, ыалдьыбакка сылдьаргар баҕарабыт!
