Алтынньы 10 күнүгэр олохтоох култуура дьиэтигэр Мэҥэ нэһилиэгин баһылыга Габышев Ньургун Владимирович дуоһунаһыгар киириитин үөрүүлээх уонна 2015-2025 сс. баһылыгынан үлэлээбит Куприянов Александр Валерьевиһы саҥа дуоһунаска атаарыы тэрээһинэ буолан ааста.
Тэрээһин 1 чааһа, «Мэҥэ нэһилиэгэ» тыа сирин тэриллиитин баһылыгын быыбарыгар эрэллээхтик кыайыы өрөгөйүн билбит, эдэр кэскиллээх ыччаппыт Габышев Ньургун Владимирович үрдүк солотугар киирэр үөрүүлээх тэрээһинэ Россия, Саха сирин, Мэҥэ Хаҥалас улууһун гимнэриттэн саҕаланна.
Салгыы өбүгэ үгэһинэн алгыһынан анааран, тойугунан туойан, аал уоту оттон сиэрин-туомун толордо алгысчыт Денис Оконешников.
Бар дьонун иннигэр Ньургун Владимирович «Мэҥэ нэһилиэгэ» тыа сирин тэриллиитин баһылыга, нэһилиэгин дьонугар-сэргэтигэр андаҕар этэн мэктиэлээтэ.
281 нүөмэрдээх быыбардыыр хамыыһыйа бэрэссэдээтэлэ Андросова Жанна Иннокентьевна илии баттаһыннаах 2025 сыл, балаҕан ыйын 15 күнүгэр «Мэҥэ нэһилиэгэ» тыа сирин тэриллиитин баһылыгынан талыллыбытын туоһулуур удостоверениены 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үтүө суобастаахтык үлэлээбит Куприянов Александр Валерьевич дохсун ытыс тыаһын ортотугар туттарда.
Мэҥэ нэһилиэгин тыа сирин тэриллиитин баһылыгын солбуйааччыта Мохначевский Иван Егорович, «Доруобуйа» общественнай түмсүү салайааччыта Ноговицына Марфа Иннокентьевна, Ньургун Владимирович табаарыстарын аатыттан Иванов Егор Николаевич, Чурапчы улууһун И.М.Павлов аатынан Чурапчытааҕы орто оскуолатын 10 кылааһын үөрэнээччитэ Эрсан Макаров, 2015-2025 сс. баһылыгынан үлэлээбит Куприянов Александр Валерьевич, Ньургун Владимирович кылааһынньыктарын аатыттан Дьулустан Кычкин, Моорук нэһилиэгин тыа сирин тэриллиитин баһылыга Никитин Радомир Прокопьевич, Ньургун Владимирович хаан-уруу аймахтара истиҥ эҕэрдэлэрин тириэртилэр.
Салгыы Мэҥэ Хаҥалас улууһун депутаттарын сэбиэтин бэрэссэдээтэлэ Андросов Иннокентий Иннокентьевич «Мэҥэ нэһилиэгэ» тыа сирин тэриллиитин баһылыгар Ньургун Владимирович Габышевка бэйэтин эҕэрдэтин, «Мэҥэ Хаҥалас улууһа» муниципальнай тэриллии баһылыга Тихонов Д.И. эҕэрдэ суругун тириэртэ уонна нэһилиэк социальнай-экономическай туругун салгыы сайыннаран, дьон-сэргэ олоҕун уйгута бигэ туруктаах, инникигэ эрэллээх буоларын туһугар үлэлиэхтэрэ-хамсыахтара, бары сатабылларын ууруохтара диэн туран Мэҥэ нэһилиэгин 3 уокурук депутаттарынан талыллыбыт, ол курдук Кычкина Елена Кимовнаҕа, Кычкин Павел Петровичка, Иванов Егор Николаевичка удостоверениелары туттарда. Ону сэргэ 2015-2025 сс. баһылыгынан үлэлээбит Куприянов Александр Валерьевичка Мэҥэ Хаҥалас улууһун депутаттарын сэбиэтин бочуотунай грамотатын, анал хары чаһытын дохсун ытыс тыаһын ортотугар үөрүүлээх быһыыга-майгыга туттарда.
Тэрээһин 2 чааһа, 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үтүө суобастаахтык үлэлээбит, убаастабыллаах Александр Валерьевич Куприяновы саҥа дуоһунаска атаарар үөрүүлээх чааһа, 10 сыллаах үлэтин сырдатар видеосюжеттан саҕаланна.
2015-2025 сылларга «Мэҥэ нэһилиэгэ» тыа сирин тэриллиитин баһылыгынан үтүө суобастаахтык үлэлээбит Куприянов Александр Валерьевичка тэрилтэ салайааччылара ол курдук олохтоох дьаһалта (баһылык Габышев Н.В.), М.П.Габышев аатынан Балыктаах орто оскуола (директор Иванов Е.Н.), «Звездочка» оҕо уһуйаана (сэбиэдиссэй Кычкина А.С.), олохтоох олох-дьаһах коммунальнай хаһаайыстыба (салайааччы Харитонов С.С.), «Хаххах» потребительскай кооператив (салайааччы Скрябина М.И.), Балыктаахтааҕы ветеринарнай учаастак аатыттан Никитина Т.С., «Доруобуйа» общественнай түмсүү (салайааччы Ноговицына М.И.), нэһилиэкпит араас сылларга үлэлээбит уонна күн бүгүн айымньылаахтык үлэлиир түөлбэ салайааччыларын ааттарыттан «Аартык» уонна «Сүрэх тыа»түөлбэлэр салайааччылара Стручкова С.С. уонна Ноговицына Н.Г. махтал суруктарын, өйдөбүнньүк бэлэхтэрин дохсун ытыс тыаһын ортотугар туттардылар.
Түмүккэ, 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үтүө суобастаахтык үлэлээбит, билигин Маттатааҕы социальнай геронтологическай киин салайааччыта Куприянов Александр Валерьевич бу күн мустубут нэһилиэгин дьонугар-сэргэтигэр сылаас махтал тылын анаата.
Үөрүүлээх тэрээһини Рима Фадеева, «Сайдыына» вокальнай ансаамбыл, Дария Андросова ылбаҕай ырыаларынан ситэрэн-киэргэтэн биэрдилэр.
Убаастабыллаах салайааччыларбыт, саҥа талыллыбыт депутаттар, баҕарабыт эһиэхэ саҥаттан саҥа саҕахтары, сайдан, үүнэн, сарсыҥҥыга саргылана турун, өрүү бары бииргэ нэһилиэкпит, улууспут, республикабыт сайдарын туһугар үлэлиэҕин хамсыаҕын, айыаҕын тутуоҕун!
Эстрада чаҕылхай сулуһа Китджа, эстрада ырыаһыттара Ренат Иванов, Асколонидзе, Саина Кырамаана, Вадим Борисов уонна нэһилиэкпит бастыҥ ырыаһыттара Вера Михайловна Фадеева, Иван Николаевич Прибылых, Петр Владимирович Дохунаев үөрүүлээх тэрээһиҥҥэ мустубут нэһилиэкпит олохтоохторугар сэргэх кэнсиэрдэрин, бииртэн биир чаҕылхай нүөмэрдэрин бэлэх ууннулар.
