Балаҕан ыйын 30 күнүгэр олохтоох култуура дьиэтигэр аан дойду үрдүнэн бэлиэтэнэр аҕам саастаахтар күннэригэр аналлаах «Махтал эһиэхэ, ытык көлүөнэ!» итии чэйдээх сандалы тула сынньалаҥ тэрээһин буолан ааста.
Бырааһынньыкпыт сарсыардаттан нэһилиэкпитигэр аан дойдутааҕы аҕам саастаахтарын күнүн көрсө үөрүүлээх түгэннэртэн саҕаланна. Бу күн, тэрээһиҥҥэ кыайан кыттыыны ылбатах нэһилиэкпит ытык олохтоохторугар, тыыл бэтэрээннэригэр Заровняева Вера Григорьевнаҕа, Черкашин Егор Николаевичка, Стручков Иван Егоровичка, сэрии сылын оҕолоругар Харитонова Марфа Петровнаҕа, Протодьяконов Афанасий Никифоровичка “Мэҥэ нэһилиэгэ” тыа сирин тэриллиитин баһылыга Габышев Ньургун Владимирович кыттыылаах, нэһилиэкпит бэтэрээннэрин сэбиэтин көҕүлээһининэн, дьиэлэригэр тиийэн эҕэрдэлээһин тэрилиннэ. Ытык дьоммут ылбаҕай ырыа доҕуһуоллаах истиҥ эҕэрдэ истэн, сэмэй бэлэх тутан, үөрүүлэрэ үксээтэ.
Ону сэргэ, Анна Христофоровна, Николай Семенович Винокуровтарга, Максимова Дария Архиповнаҕа, Ноговицына Елена Васильевнаҕа, Куприянова Розалия Николаевнаҕа анаммыт эҕэрдэлэри оҕолоругар, түөлбэ салаайааччытыгар ыкса ыалларыгар, дьүөгэлэригэр туттарылынна.
Бүгүҥҥү тэрээһин үөрүүлээх аһыллыытын “Арчыына” түмсүү, (салайааччы Надежда Рожина Федоровна), “Хаар түһэр” вальс үнкүүнэн, Михаил Прокопьевич Габышев аатынан орто оскуола учууталлара, “Балыктааҕым — бу мин дойдум” ылбаҕай ырыаларынан арыйдылар.
«Мэҥэ нэһилиэгэ» тыа сирин тэриллиитин баһылыга Габышев Ньургун Владимирович эҕэрдэ тылын, үбүлүөйдээх саастарын туолбут ытык-мааны бэтэрээннэргэ эҕэрдэ сурук, өйдөбүнньүк бэлиэ туттартаата.
Эҕэрдэ сурук, анал бэлиэ туттарылынна 85 үбүлүөйдээх сааһын туолбут ытык-мааны бэтэрээммитигэр:
Винокуров Николай Семеновичка — сэрии сылын оҕото, чэпчэки атлетикаҕа Саха Республикатын уонна Российскай Федерация спордун маастара, Саха Республикатын үөрэҕин туйгуна, Саха Республикатын физическай культуратын уонна спордун туйгуна, Мэҥэ нэһилиэгин бочуоттаах олохтооҕо, билигин бочуоттаах сынньалаҥҥа олорор нэһилиэкпит ытык-мааны бэтэрээнэ, амарах аҕа, эйэҕэс эһээ.
80 сааһын туолбут үбүлүөйдээх күнүнэн, эҕэрдэ сурук, анал бэлиэ туттарылынна:
Лихонди Варвара Михайловнаҕа — Үлэ бэтэрээнэ, бочуоттаах сынньалаҥҥа тахсыар дылы Балыктаах орто оскуолатыгар техническай үлэһитинэн үтүө суобастаахтык үлэлээбит, ытык-мааны бэтэрээммитигэр, “Медаль материнства”, Сыана бэтэрээнэ, “Ыччат Бүтүн Союзтааҕы Ленинскэй Коммунистическай Союһа- 100 сыла” уонна “Семейнай доблесть” анал бэлиэлэр хаһаайката, элбэх оҕо күн күбэй ийэтэ, эйэҕэс эбээтэ.
Эҕэрдэ сурук, анал бэлиэ туттарылыннылар 75 саастарыгар үктэммит ытык-мааны дьоһун дьоммутугар:
Гоголев Владимир Иннокентьевичка — үлэ бэтэрээнэ, Байкало-Амурскай магистраль тутуутун кыттыылааҕа, нэһилиэкпит ытык-мааны олохтооҕо.
Мохначевскай Руслан Ефимовичка — үлэ бэтэрээнэ, «Мэҥэ» нэһилиэгин, Мэҥэ — Хаҥалас улууһун бочуоттаах олохтооҕо, өр сылларга олох-дьаһах коммунальнай хаһаайыстыба коллективын салайбыт, Мэҥэ нэһилиэгэр баһылыгынан үлэлээн ааспыт ытык-мааны бэтэрээммит, Саха Республикатын култууратын уус-уран самодеятельноһын сайдыытыгар кылаатын иһин бэлиэ хаһаайына, Сыана бэтэрээнэ, амарах аҕа, эйэҕэс эһээ.
Андросов Николай Ильичка — үлэ бэтэрээнэ, “Максим Горькай” «Мэҥэ» совхозтарга эҥкилэ суох суоппарынан үлэлээбит ытык-мааны бэтэрээммит, Мэҥэ нэһилиэгин бочуоттаах олохтооҕо, «Саха Республикатын автотранспордын үтүөлээх үлэһитэ» анал аат хаһаайына, амарах аҕа, эйэҕэс эһээ.
Ноговицын Александр Николаевичка — Нэһилиэкпитигэр солбуллубат водовоз суоппарынан үгүс сылларга үтүө суобастаахтык үлэлээбит ытык-мааны бэтэрээммит, «Саха Республикатын автотранспордын үтүөлээх улэһитэ» анал аат хаһаайына, элбэх оҕо амарах аҕата, элбэх сиэн эйэҕэс эһээтэ.
Чалкин Семен Семеновичка — үлэ бэтэрээнэ, Мэҥэ нэһилиэгин Бочуоттаах олохтооҕо, “Максим Горькай” уонна “Мэҥэ” сопхуостарга механигынан, “Балыктаах” коллективнай предприятиеҕа директоры солбуйааччынан, хонуу биригэдьииринээн үтүө суобастаахтык үлэлээбит, ытык-мааны бэтэрээммит, “Саха Өрөспүүбүлүкэтин олох-дьаһах коммунальнай хаһаайыстыба” бочуоттаах үлэһитэ, «Ытык ыал», «Семейная доблесть» анал бэлиэлэр хаһаайына, элбэх оҕо амарах аҕата, эйэҕэс эһээтэ.
70 саастарын туолбут үбүлүөйдээх күннэринэн эҕэрдэ сурук, анал бэлиэ туттарылынна:
Катакинова Маргарита Васильевнаҕа — Үлэ бэтэрээнэ, «Саха Республикатын тыатын хаһаайыстыбатын туйгуна», анал бэлиэ хаһаайына, Скрябиннар дьиэ-кэргэҥҥэ 2024 сыллаахха “Саха Республикатын ветеринарнай сулууспатын бастыҥ үлэ династията” анал аат иҥэриллибитэ, ветеринар идэтигэр уопсай стажтара 154 сыл, күн күбэй ийэ, эйэҕэс эбээ.
Осипов Роман Павловичка — үлэ бэтэрээнэ, өр сылларга «Мэҥэ» совхозка автопарка5а завгарынан, механигынан үтүө суобастаахтык үлэлээбит ытык- мааны бэтэрээммит, “Сыана бэтэрээнэ”, амарах аҕа, эйэ5эс эһээ.
Ноговицына Екатерина Андреевнаҕа — үлэ бэтэрээнэ, Мэҥэ нэһилиэгин Бочуотун кинигэтигэр киллэриллибитэ, “Максим Горькай”, “Мэҥэ” совхозтарга, “Хаххах” кооперативка тыа хаһаайыстыбатын сайдыытыгар, производство көдьүүһүн үрдэтиигэ үгүс сылларга, эҥкилэ суох үлэлээбит ытык-мааны бэтэрээммит, «Мэҥэ-Хаҥалас улууһун тыа хаһаайыстыбатын эйгэтэ сайдыытыгар кылаатын иһин» анал бэлиэ хаһаайката, элбэх оҕо күн күбэй ийэтэ, эйэҕэс эбээтэ.
Черкашина Августа Владимировнаҕа — үлэ бэтэрээнэ, «Доруобуйа» түмсүү чилиэнэ, бочуоттаах сынньалаҥҥа тахсыар дылы «Мэҥэ» сопхуоска, «Хоту» СХПК собуотун маастарын көмөлөһөөччүтүнэн үтүө суобастаахтык үлэлээбит, ытык мааны бэтэрээммит элбэх оҕо күбэй ийэтэ, эйэҕэс эбээтэ.
Никитина Татьяна Николаевнаҕа — доруобуйа харыстабылын бэтэрээнэ, бочуоттаах сынньалаҥҥа тахсыар дылы Балыктаах участковай балыыһаҕа медицинскэй сиэстэрэнэн үлэлээбитэ. Элбэх оҕо күн күбэй ийэтэ, элбэх сиэн эйэҕэс эбээтэ.
Тихонова Парасковья Афанасьевнаҕа — үлэ бэтэрээнэ, нэһилиэкпит ытык-мааны олохтооҕо, элбэх оҕо күн күбэй ийэтэ, элбэх сиэн эйэҕэс эбээтэ.
Эҕэрдэ бастыҥа 60 саастарын томточчу туолбут дьоммутугар-сэргэбитигэр, үбүлүөйдээх күннэринэн, эҕэрдэ сурук, анал бэлиэ туттарыллар:
Цыпандина Варвара Михайловнаҕа — үлэ бэтэрээнэ, бочуоттаах сынньалаҥҥа тахсыар дылы Михаил Прокопьевич Габышев аатынан Балыктаах орто оскуолатыгар агрономунан үлэлээбит ытык-мааны бэтэрээммит, күн күбэй ийэ, эйэҕэс эбээ.
Сотникова Акулина Федоровнаҕа — «Саха Өрөспүүбүлүкэтин доруобуйа харыстабылын туйгуна» анал бэлиэ хаһаайына, Мэҥэ-Хаҥалас улууһун доруобуйа харыстабылын сайдыытыгар киллэрбит кылаатын, өр сылларга үтүө суобастаах үлэтин иһин, «Мэҥэ-Хаҥалас» улууһа муниципальнай оройуон баһылыга Дмитрий Иванович Тихонов Грамотатынан уонна “Оройуон иннигэр өҥөтүн иһин” остуолга уурар бэлиэнэн наҕараадаламмыт ытык-мааны бэтэрээммит, Александр Георгиевич Семенов аатынан Балыктаахтааҕы быраас амбулаториятын медицинскэй сиэстэрэтэ.
Күндү үбүлүөйдээх бар дьоммутун өссө төгүл итиитик-истиҥник эҕэрдэлиибит. Баҕарабыт эһиэхэ чэгиэн чэбдик доруобуйаны, баҕа санаа бастыҥын, үтүө санаа үтүмэнин, дьоллоох соргулаах олоҕу!
Нэһилиэкпит бэтэрээннэрин сэбиэтин бэрэссэдээтэлэ Елена Кимовна Кычкина бэйэтин эҕэрдэтин тириэртэ уонна сэрии сылын оҕотугар, ытык-мааны бэтэрээммитигэр Габышева Марфа Николаевнаҕа, “Саха Өрөспүүбүлүкэтин бочуоттаах бэтэрээнэ” анал бэлиэ хаһаайыныгар Рожина Надежда Федоровнаҕа сэмэй бэлэхтэрин туттартаата.
Вера Фадеева «Кэрэ Куо» ырыанан тэрээһин үөрүүлээх чааһын ситэрэн-хоторон киэргэттэ.
Бырааһынньыктааҕы минньигэс астаах сандалы тула олорон, ирэ-хоро кэпсэтэн, бэйэлэрин алгыс тылларын, эҕэрдэлэрин, музыкальнай ырыаларын тириэртилэр:
Бу дьоро күҥҥэ кэлбит ыалдьыттар тэриллэн ыытыллыбыт араас оонньууларга көхтөөхтүк кыттан сэргэхсийдилэр:
Урукку кэминээҕи музыканан, ону сэргэ аныгы ырыаларга доҕуһуоллатан үҥкүүлээн, ирэ-хоро кэпсэтэн, астына сынньаннылар:
1995 сыллаахха ыытыллыбыт Аан дойду дьахталларын күнүгэр аналлаах тэрээһини, Павел Васильевич Габышев видеоҕа устуутун көрөн, ытык мааны бэтэрээн дьоммутун ахтан — санаан аастыбыт.
Бырааһынньыкпыт түгэнинэн сөп түбэһиннэрэн, Габышев Павел Васильевичка нэһилиэкпит историятын үйэтитиигэ көмөтүн иһин махтал сурук, сэмэй бэлэх уонна Рожина Надежда Федоровнаны “Саха Өрөспүүбүлүкэтин Бочуоттаах ветерана” үрдүк бэлиэнэн наҕараадаламмытын эҕэрдэлээн, олохтоох култуура коллективын аатыттан сэмэй бэлэхпитин туттардыбыт.
Бу курдук, «Махтал эһиэхэ, ытык көлүөнэ!» тэрээһиммит сэргэхтик ааста. Нэһилиэкпит аҕам саастаах дьоммут куруук биһиэхэ холобур, сүбэ-ама буоларгытынан киэн туттабыт уонна истиҥник махтанабыт! Ытык-мааны бэтэрээннэрбит, күн-дьыл өксүөнүн билиммэккэ, эдэрдии эрчиминэн, сэргэхтик туттан-хаптан, чугас дьоҥҥут, оҕолоргут, сиэттэргит сылаас тапталларынан кынаттаныҥ, мэлдьи үөрэ-көтө сылдьыҥ!
Тэрээһиммит сэргэхтик барарыгар күүс-көмө буолбут “Доруобуйа”, “Арчыына” түмсүүлэр коллективтарыгар (салайааччылар Ноговицына Марфа Иннокетьевна, Рожина Надежда Федоровна) нэһилиэкпит бэтэрээннэрин сэбиэтигэр (салайааччы Кычкина Елена Кимовна) минньигэс тордунан, сахалыы мааны астарынан, быырпаҕынан, саламаатынан күндүлээбит Рожина Надежда Федоровнаҕа, урукку кэминээҕи тэрээһини устубутун, аныгылыы сиэринэн оцифровкалаан, 31 сыл анараа өттүнээҕи кэмнэри долгуйа, уйадыйа ахтан-санаан ааспыппытыгар Павел Васильевич, Александра Николаевна Габышевтар дьиэ-кэргэҥҥэ махтал сылаас тылларын аныыбыт. Бу курдук бары бииргэ түмсүүлээхтик иннибит диэки баран иһиэҕиҥ.
