Тыа сирин биир сүрүн тэрилтэтинэн олох-дьаһах коммунальнай хаһаайыстыба буолар. Бу тэрилтэ 9 ый устата үлэлээн нэһилиэк олохтоохторун сылааһынан хааччыйан, олох тыын боппуруостарын быһаарар. Быйылгы оттук сезона саҕаланан тэрилтэлэр, чааһынай дьиэлэр сылааһынан толору хааччылыннылар. Балаҕан ыйын 23 күнүгэр теплотрассаны оцинкованнай илииһинэн (ньалбаанынан) бүрүйүүгэ олох-дьаһах коммунальнай хаһаайыстыба үлэһиттэрэ, олохтоох оскуола, дьаһалта эр дьонноро, эдэр фермердэр кыттыылаах уопсай субуотунньук ыытылынна. Субуотунньугунан «Аартык» уонна «Сайдыс» түөлбэлэр теплотрассаларын уонна проблемнай миэстэлэригэр баар сирдэрин бүрүйүү ыытылынна.
Субуотунньук кыттыылаахтарыгар олохтоох дьаһалта итии аһынан, казаҥҥа плов астаан уонна минньигэс утаҕынан, күнүскү эбиэти тэрийдэ.
Аныгыс сырыыга маннык субуотунньук «Сүрэх-тыа» түөлбэтигэр тэриллэн, теплотрасса олорчу оцинкованнай илииһинэн (ньалбаанынан) бүрүллэрэ былааннанар.
Бу курдук, бары күүһү холбоон, кыстыкка бэлэмнэниигэ уопсай субуотунньуктар тэриллэн, нэһилиэнньэ 9 ыйдаах тымныыны этэҥҥэ туорууругар усулуобуйа тэриллэн истин.
