Дьээрэ эрэ, доҕоттоор! Алтынньы 18 күнүгэр киэһэ 19:00 чаастан ыаллыы сытар Мөҥүрүөн нэһилиэгэр, Матта бөһүөлэгэр Я.П. Кычкин аатынан култуура киинигэр Аркадий Новиков «Көөчөөн Көрө» народнай мини тыйаатырын салайааччыта Анна Охлопкова көҕүлээһининэн «Көрсүбүччэ күлсүөххэ» Мэҥэ көрдөөхтөрүн кэнсиэрэ буолан ааста.
«Көрсүбүччэ күлсүөххэ» Мэҥэ көрдөөхтөрүн кэнсиэригэр кыттыыны ыллылар: Майатааҕы «Көөчөөн Көрө» народнай мини тыйаатырын артыыстара уонна ыаллыы сытар Дойду, Нуораҕана, Балыктаах, Тарат, Тумул бөһүөлэктэрин көрдөөх, талааннаах дьоно — сэргэтэ.
Биһиги нэһилиэктэн «Бэтиэхэлээх Балыктаахтар» көр – күлүү бөлөхтөн Яна Васильева, Саргылаана Степанова, Дария Андросова, Анна Гаврильева, Егор Васильевич Афанасьев уонна Татьяна Иванова «Три Клавы» уонна «Золушка» сыанкаларынан кыттан, дьон сэҥээриитин ылыан ыллылар.
Ону сэргэ ыаллыы сытар нэһилиэктэрбит үгүс, көрүдьүөс бииртэн биир сэргэх нүөмэрдэринэн көхтөөх кыттыыны ылан, тэрээһин үрдүк таһымҥа тэриллэн, бэрт солун, сэргэх кэнсиэр буолла.
Бу «Көрсүбүччэ күлсүөххэ» Мэҥэ көрдөөхтөрүн кэнсиэригэр күннээҕи үлэттэн быыс булан, көхтөөх кыттыыны ылбыккытыгар махтал, таптал сылаас тылларын аныыбыт. Күндү көрөөччүлэрбит, бэрт сэргэх кэнсиэри көрөн, дуоһуйа астынан, бэһиэлэйдик үөрэн — күлэн, сэргэхсийэн барбыккыт буолуо диэн эрэнэбит уонна барыгытыгар махтанабыт.
