Балаҕан ыйын 23 күнүгэр олохтоох култуура дьиэтигэр ырыаҕа ылланар, хоһооҥҥо хоһуйуллар Мэҥэ сирин бастыҥа Балыктаахпыт бөһүөлэгин ытык-мааны олохтоохторугар, ыалдьыттарыгар аналлаах «Көмүс күһүн-2025» күһүҥҥү атыы-тутуу дьаарбаҥката буолан ааста.
Кылгас самаан сайыммыт устата араас дьэрэкээн сибэккилэри, оттору-мастары, битэмииннэх оҕуруот астары бүөбэйдээн үүннэрэн улаатыннаран, буспут-хаппыт көлөһүн түмүгэ күһүн көстөр. Бу күһүҥҥү күлүмнэс күҥҥэ оҕуруот аһын арааһын, олортон кэнсиэрбэлэри, тыа, хонуу бэлэхтээбит сиэнэр, тума буолар үүнээйилэринэн, сибэкки эгэлгэтинэн биирдиилээн нэһилиэкпит олохтоохторо, ону сэргэ М.П.Габышев аатынан оскуола пришкольнай учаастага (директор Иванов Е.Н.) уонна «Звездочка» оҕо уһуйаанын (сэбиэдиссэй Кычкина А.С.) иитиллээччилэрин төрөппүттэрэ араас ас көрүҥнэринэн атыы-тутуу дьаарбаҥкатыгар көхтөөх кыттыыны ыллылар.
Биhиги тыйыс айылҕалаах Саха сиригэр олоробут. Сахабыт сирэ олус кэрэ айылҕалаах. Айылҕабыт барахсан биhигини араас эгэлгэ үүнээйилэринэн, отунан-маhынан, дьикти бэйэлээх сир симэхтэринэн дьэрэкээн сибэккилэринэн, минньигэс отоннорунан сыллата манньытар, сөхтөрөр. «Быйаҥнаах тэлгэһэ — 2025» диэн быйылгы өлгөм үүнүүлээх тиэргэннээх нэһилиэкпит ыаллара сыралаах үлэлэрин түмүктэрин видео ыытаннар, экран нөҥүө сырдаттаппыттарын сөҕө-махтайа, астына-дуоһуйа көрдүбүт.
Быйылгы быйаҥнаах тэлгэһитин экран нөҥүө билиһиннэрдэ бөһүөлэкпит ытык-мааны ветерана Марфа Николаевна Габышева.
Александра Николаевна, Павел Васильевич Габышевтар дьиэ кэргэн быйаҥнаах тиэргэннэрэ.
Сэргээн сэҥээрэн көрдүбүт Лариса Лаврентьевна Кычкина тиэргэнин.
Экраҥҥа Саргылана Васильевна, Яков Константинович Стручковтар дьиэ кэргэн тиэргэнэ.
Кэрэ көстүүлээх дьэрэкээн тиэргэнин экран нөҥүө сырдатта Надежда Михайловна, Павел Павлович Осиповтар дьиэ кэргэн.
Экраҥҥа Ньургуйаана Ивановна, Петр Васильевич Стручковтар дьиэ кэргэн быйылгы өлгөм үүнүүлээх тиэргэннэрэ.
«Быйаҥнаах тэлгэһэ — 2025» быйылгы өлгөм үүнүүлээх тиэргэннээх ыалларбытыгар көхтөөх кыттыыны ылбыттарыгар сылаас махтал тылларбытын анаан тураммыт туоһу суругу уонна сэмэй бирииһи туттарда Кычкина Любовь Васильевна. «Быйаҥнаах тэлгэһэ — 2025» кыттыылаахтарыгар бириистэри спонсордаатылар биир дойдулаахтарбыт, эдэр кэскиллээх уолаттарбыт Ноговицын Иван Николаевич уонна Винокуров Павел Андреевич.
Улахан дьоҥҥо аналлаах «Көмүс күһүн» тематыгар айылҕа матырыйаалыттан композиция күрэҕэ ыытылынна. Бу күрэххэ Христина Иннокентьевна Мохначевская кыайыылааҕынан ааттанан, анал грамотанан уонна урбаанньыт Стручков Игорь Васильевич олохтообут анал бириистэринэн наҕараадаланна.
Быйылгы өлгөм үүнүүттэн нэһилиэк олохтоохторун икки ардыгар «Саамай саамай» диэн хаппыыста, моркуоп, хортуоппуй, сүбүөкүлэ, кабачок көрүҥнэригэр күрэх тэрилиннэ. Түмүккэ кыайыылаахтарга анал грамота уонна биир дойдулаахпыт, билигин Майа сэлиэнньэтигэр олорор, «Мичээр» протез тииһи оҥорор киин салайааччыта Ян Егорович Мохначевскай олохтообут анал бириистэрэ туттарылыннылар:
«Саамай улахан кабачок» күрэх кыайыылааҕынан буолла Захарова А.Г. (3кг954).
«Саамай улахан хаппыыста» күрэх кыайыылааҕынан таҕыста Шарина А.И. (4кг012).
«Саамай улахан сүбүөкүлэ» күрэх кыайыылааҕынан ааттанна Кычкина А.С. (1кг744).
«Саамай улахан моркуоп» күрэх кыайыылааҕынан буолла Шарина А.И. (0,326гр).
«Саамай улахан хортуоппуй» күрэх кыайыылааҕынан таҕыста Долгунова Л.В. (0,926).
Түмүккэ, бу күн «Саамай элбэх дохуоду киллэрбит кыттааччы» анал аат туттарылынна Анна Гаврильевна, Михаил Ларионович Захаровтар дьиэ кэргэҥҥэ. Бирииһи спонсордаата биир дойдулаахпыт, урбаанньыт Павел Андреевич Винокуров.
«Көмүс күһүн-2025» күһүҥҥү атыы-тутуу, дьаарбаҥка тэрээһини музыкальнай нүөмэрдэринэн киэргэтэн, ситэрэн биэрдилэр:
«Дапсы» бөлөх репертуарыттан «Көмүс күһүн» ырыанан эҕэрдэлэрин тириэртилэр «Сайдыына» ырыа бөлөҕүн кэрэ нарын кыргыттара, салайааччы Рима Фадеева.
Самаан сайыммыт сылаас тыынын ахтан-санаан, Ника репертуарыттан «Күөрэгэй көрө» ырыаны бэлэх уунна Рима Фадеева.
Көмүс күһүн кэлбитинэн, «Дойдум сарсыардата» ылбаҕай ырыатынан ситэрэн-киэргэтэн биэрдэ Петр Дохунаев.
Бу күн үтүө үгэскэ кубулуйбут сылын аайы ытык-мааны дьоммутугар — тыыл ветераннарыгар, сэрии сылын оҕолоругар анаан тэриллибит «Полка добра» акцияҕа нэһилиэк олохтоохторо, буоларын курдук, көхтөөх кыттыыны ыллылар. Бу акцияҕа үтүө санаанан түмүллүбүт оҕуруот астарын, оҕуруот аһыттан оҥоһуллубут бородууксуйалары ытык-мааны дьоммутугар тиксэриэхпит. Бу акцияҕа эбии көхтөөхтүк кыттыһыахтара олохтоох орто оскуола 1-11 кылаастар үөрэнээччилэрэ.
Маны сэргэ олохтоох дьаһалта (баһылык Габышев Нь.В.) көҕүлээһиннэринэн, күһүҥҥү киһи күлбүтүнэн диэн туран, тэрээһин кыттыылаахтарын, көрөөччүлэрин сибиэһэй собо миининэн, буспут собонон күндүлээтилэр. Итии сибиэһэй собо миинин астаатылар Барабанов М.Р., Михайлов Д.Д.
«Көмүс күһүн-2025» күһүҥҥү атыы-тутуу дьаарбаҥка тэрээһин бириистэрин спонсордаабыт урбаанньыт уолаттарбытыгар Стручков Игорь Васильевичка, Мохначевский Ян Егоровичка, Ноговицын Иван Николаевичка, Винокуров Павел Андпеевичка олохтоох култуура дьиэтин коллективын аатыттан директор Кычкина Л.В. махтал суруктары туттарда.
«Көмүс күһүн — 2025» тэрээһиммит кыттыылаахтарыгар, кыайыылаахтарыгар, көрөөччүлэригэр, ыалдьыттарыгар активнайдык кыттыбыккыт иһин уонна бириистэри олохтообут спонсордарбытыгар барҕа махтал тылларын аныыбыт. Бу курдук, активнай позицияҕытын ыһыктыбакка, куруутун ыытыллар тэрээһиннэргэ көхтөөхтүк кыттыаххыт диэн эрэнэбит. Баҕарабыт күһүҥҥүлүү күүстээх санааны, хас биирдии дьиэ кэргэҥҥэ дьоллоох олоҕу, этэҥҥэ буолууну.
