От ыйын 28 күнүгэр, ырыаҕа ылланар, хоһооҥҥо хоһуйуллар Балыктаах бөһүөлэгин Күөллэрики алааһыгар, «Хотуур хоһууна» бырайыак ааптара Дорҕоон Дохсун Ворогушин уонна нэһилиэкпит эдэр фермерэ Говоров Дьулустаан Геннадьевич көҕүлээһиннэринэн, оскуола оҕолоро уонна ыччат дьон кыттыылаах, илии хотуурунан оту охсуу төрүт дьарыгар, Манчаары аатынан «Уол оҕо-ыччат күүлэйэ» бастакынан тэриллэн ыытылынна.
Ыраахтан-чугастан кэлбит кыттааччылары, ыалдьыттары үөрэ-көтө көрсөн, күүлэй буолар сирин билиһиннэрэн, алгыс сиэрин-туомун толорон, күөн күрэһи саҕалаатылар. От охсуох иннинэ, биир интириэһинэй «Хотууру уулатыы» ураты сиэр-туом тэрилиннэ. «Доруобуйа», «Арчы» түмсүү Далбар Хотуттара сахалыы сиэринэн, арыылаах алаадьынан айах тутан көрүстүлэр. Уолаттарга суолларын Мэҥэ нэһилиэгин баһылыга Ньургун Габышев, Дорҕоон Дохсун уонна Амма Эмис нэһилиэгиттэн кэлбит 8 оҕолоох Далбар Хотун, хотуур күүлэйин хас да кыайыылааҕа Матрена Тимофеева охсон арыйдылар.
Кыттааччылар 4 бөлөххө арахсан, сэрэбиэйдэстилэр. Бэриллибит бириэмэҕэ саҥа саҕалааччылар, өр сыллаах охсооччулар бэйэлэрин кыахтарын, бэлэмнэрин, уопуттарын көрдөрдүлэр. Күрэс түмүгүнэн: бастакы бөлөххө, 9‒11 саастаахтарга 1-кы миэстэни Роберт Алексеев (Амма, Эмис) ылары ситистэ. 2-с миэстэҕэ Эрсан Окороков (Мэлдьэхси), 3-с миэстэҕэ Алгыс Анисимов (Дьокуускай) таҕыстылар. Иккис бөлөххө, 12‒14 саастаахтарга соҕотох кыттааччы Матвей Тимофеев (Амма, Эмис) кыайыылаах буолла. Үһүс бөлөххө,15‒17 саастаахтарга 1-кы миэстэҕэ Арчыл Данилов (Дьокуускай), 2-с миэстэҕэ Александр Дураев (Дьокуускай), 3-с миэстэҕэ Игорь Соловьев (Хаҥалас, Тиит Арыы) уонна Эрчим Федотов (Нам, Көбөкөн) ааттаннылар. Ыччаттарга, 18‒24 саастаахтарга 1-кы миэстэҕэ Тихон Тимофеев (Амма, Эмис), 2-с миэстэҕэ Александр Протопопов (Матта), 3-с миэстэҕэ Эрсан Сыроватскай (Майа) таҕыстылар.
Күүлэйгэ бириистэри туруоран күүс-көмө өйөбүл, тирэх буолбут дьоммутугар: улууспут баһылыгар Дмитрий Иванович Тихоновка, Мэҥэ нэһилиэгин баһылыгар Ньургун Владимирович Габышевка, «Хаххах» потребительскай кэпэрэтиип салайааччыларыгар Дьулустаан Говоровка, Илья Мохначевскайга, «Төлкө» түмсүүгэ, «Төрүт дьарык» бэдэрээссийэҕэ, «Тумус» оҕону сайыннарар кииҥҥэ уонна Дьокуускайтан СӨ норуотун маастара Александр Даниловка, мас ууһа Эдуард Кривошапкинҥа, «Хоту тент» тэрилтэ дириэктэригэр Афанасий Махатыровка, «Формула 32» стоматология киинигэр уонна тэрээһиҥҥэ кыттыспыт «Доруобуйа» (салайааччы Ноговицына М.И.), «Арчы» (салайааччы Рожина Н.Ф.) общественнай түмсүүлэр Далбар Хотуттарыгар махтал тылларын аныыбыт.
