Алтынньы 28 күнүгэр олохтоох култуура дьиэтигэр комсомол күнүн көрсө уонна «Мындыр саас – көхтөөх уһун үйэлэнии култуурата» бырайыак чэрчитинэн итии чэйдээх сандалы тула истиҥ көрсүһүү буолан ааста.
Тэрээһини комсомол күнүн көрсө эҕэрдэлээн Вера Фадеева ылбаҕай ырыатынан саҕалаата.
Бу күн кэлбит тэрээһин кыттыылаахтарыгар, олохтоох библиотекарь Сардана Трифонова, «Комсомол – мин сүрэхпэр» комсомол күнүгэр аналлаах викторинаны тэрийэн ыытта. Түмүккэ саамай элбэх сөптөөх эппиэти биэрэн 1-кы миэстэҕэ Габышева Светлана Антоновна, 2-с миэстэҕэ Катакинова Маргарита Васильевна, 3-с миэстэҕэ Захарова Людмила Кирилловна тахсаннар, биир дойдулаахпыт Василий Иннокентьевич Гоголев – Уйулҕан «Хамначчыт кыыс дьылҕата» автор тус бэйэтэ автографтаах кинигэтин бэлэх ыланнар үөрүүлэрэ үксээтэ.
Салгыы Решетникова Евдокия Саввична салайааччылаах улуустааҕы бэтэрээннэр сүбэлэрин «Мындыр саас» бырайыак десанын кыттыылаахтара нэһилиэк олохтоохторугар «Уһун үйэлэнии – киһи саамай улахан дьоло» программаларын иилээн-саҕалаан ыыттылар. Ол курдук, Климентова Анна Иннокентьевна — «Уһун үйэлэнии эдэр саастан саҕаланар» аһаҕас кэпсэтии, санаа атастаһыы, Скрябина Татьяна Николаевна – «Мэйии үйэҥ тухары сайдар, мэйиини эрчийии», Дмитриева Лариса Ефремовна — «Үҥкүүлүөҕүҥ!» күргүөмүнэн үҥкүүнү (флешмоб), Заровняева-Стручкова Людмила Ивановна – «Нейробика дьарыга уонна толкуй тобуллар, өй эрчиллэр оонньуулара» дьарыктары ыытаннар, кэлбит дьон астынан, дуоһуйан, тэҥҥэ дьарыктанан, үҥкүүлэһэн, санаа атастаһан сэргэхсийэн тарҕастылар.
Убаастабыллаах нэһилиэкпит олохтоохторо, улуустааҕы бэтэрээннэр сүбэлэрин «Мындыр саас» бырайыак десанын кыттыылаахтара! Комсомол күнүн көрсө сэргэх тэрээһиммитигэр кэлэн көхтөөх кыттыыны ылбыккытыгар сылаас махтал тылларын аныыбыт. Баҕарабыт энчирээбэт эрчими, уҕараабат уйгуну. Төлөннөөх сүрэххит кырдьары билиммэккэ, өрүүтүн сырдыгынан сыдьаайа, үлэни көҕүлүү, сайдыыга ыҥыра сырыттын диэн баҕа санаабыт бастыҥын тиэрдэбит. Мэлдьи инники күөҥҥэ сылдьыҥ, чэгиэн чэбдик, этэҥҥэ буолуҥ!
