Олунньу 10 күнүгэр олохтоох култуура дьиэтигэр, бастыҥ туруу үлэһит дьоннордоох, чаҕылхай дьоҕурдаах ыччаттардаах, баай остуоруйалаах төрөөбүт-үөскээбит Мэҥэ — Хаҥалас улууһа бу күн тэриллибитэ 96 сылын көрсө, нэһилиэкпит тэрилтэлэрин, ветераннарын, оскуола үөрэнээччилэрин икки ардыларыгар «Кини кимий?» интеллектуальнай оонньуу буолан ааста.
«Кини кимий?» Мэҥэ Хаҥалас улууһун күнүгэр аналлаах «Республика, улуус уонна нэһилиэк сирэйдэринэн» күрэх Мэҥэ Хаҥалас өрөгөй ырыатынан саҕаланна.
Республикабыт, улууспут, нэһилиэкпит историятын төһө билэҕин диэн өйү мускуйар «Улууспут уонна нэһилиэкпит сирэйдэринэн» күрэххэ олохтоох дьаһалта, «Звездочка» оҕо уһуйаанын, олох-дьаһах коммунальнай хаһаайыстыба, М.П.Габышев аатынан Балыктаах орто оскуола коллективтара, нэһилиэкпит ветераннара уонна оскуола үөрэнээччилэрэ 5-тии киһилээх уопсайа 6 хамаанда кыттыыны ыллылар.
Ол курдук «Кини кимий?» интеллектуальнай оонньуу 5 түһүмэҕинэн барда:
I түһүмэх – Нэһилиэкпититтэн тахсыбыт, биллиилээх ытык — мааны биир дойдулаахтарбыт.
II түһүмэх – Улууспут биллиилээх дьоно.
III түһүмэх — Республикабыт биллиилээх дьоно.
IV түһүмэх – Россиябыт биллиилээх дьоно.
V түһүмэх – «Доҕордоһуу түһүлгэтэ» араас дойду биллиилээх дьоно.
«Кини кимий?» Мэҥэ Хаҥалас улууһун күнүгэр аналлаах «Улуус уонна нэһилиэк сирэйдэринэн» күрэх бэрт сэргэхтик, олус интэриэһинэй буолан, бириэмэ биллибэккэ ааста. Ол курдук түмүк маннык буолла:
1-кы миэстэҕэ 750 очколаах М.П.Габышев аатынан Балыктаах орто оскуолатын коллективын «Мэҥэбил» хамаандата (капитан Николаев Н.Н.) тахсан, күрэх кыайыылааҕынан ааттанна.
2-с миэстэни 650 очколаах «Звездочка» оҕо уһуйаанын коллективын «Звездочка» хамаандата (капитан Стручкова С.В.) ылары ситистилэр.
3-с миэстэни 550 очколаах нэһилиэкпит ветераннарын «Мэҥэ аат» хамаандата (капитан Винокуров А.Н.) ситиһэн, үөрүүлэрэ үксээтэ.
Кыайыылаахтар грамотанан наҕараадаланнылар.
Ону сэргэ 450 очколаах олохтоох дьаһалта «Дьулуур» хамаандата (капитан Барабанов М.Р.), 350 очколаах олох-дьаһах коммунальнай хаһаайыстыба «Аал уот» хамаандата (капитан Цыпандин Н.М.) уонна 50 очколаах М.П.Габышев аатынан Балыктаах орто оскуолатын үөрэнээччилэрин «Кэскиллэр» хамаандата (капитан Стручкова Надя) көхтөөх кыттыыларын иһин туоһу суругунан бэлиэтэннилэр.
«Кини кимий?» Мэҥэ Хаҥалас улууһун күнүгэр аналлаах интеллектуальнай оонньууну иилээн-саҕалаан ыытта Татьяна Иванова.
Тэрээһини Петр Дохунаев ылбаҕай ырыатынан ситэрэн-хоторон биэрдэ.
Бу курдук «Кини кимий?» Мэҥэ Хаҥалас улууһун күнүгэр аналлаах интеллектуальнай оонньууга кэлэн көхтөөх кыттыыны ылбыт нэһилиэкпит тэрилтэлэрин, ветераннарын, оскуола үөрэнээччилэрин хамаандаларыгар сылаас махтал тылларын аныыбыт. Төрөөбүт улууспут ,Мэҥэ Хаҥалас улууһа тэриллибит күнүнэн өссө төгүл истиҥник эҕэрдэлиибит! Хас биирдиигитигэр олоххут дьоллоох-соргулаах, үүнэр ыччаккыт үтүө кэскиллээх, хотоойу өйдөөх-санаалаах, олоххо булгуруйбат модун дьулуурдаах буолуҥ диэн баҕа санаабыт бастыҥын аныыбыт.
