Балаҕан ыйын 1 күнүгэр, олохтоох култуура дьиэтигэр Мэҥэ-Хаҥалас улууһун баһылыга Дмитрий Иванович Тихонов нэһилиэнньэни кытта көрсүһүүтэ тэриллэн ыытылынна. Көрсүһүүнү Мэҥэ нэһилиэгин тыа сирин тэриллиитин баһылыга Ньургун Владимирович Габышев киирии тылынан саҕалаата уонна кэлбит ыалдьыттары кытта билиһиннэрдэ.
Улуус баһылыга Дмитрий Иванович Тихонов улууспут уонна нэһилиэкпит бүгүҥҥү туруктарын, араас өрүттээх сайдыыларын тула кэпсээтэ, ону тэҥэ инники былааннары кэскиллээхтик ырытта уонна сырдатта.
Көрсүһүүгэ нэһилиэкпит олохтоохторун, Мэҥэ Хаҥалас улууһун депутаттарын сэбиэтин бэрэссэдээтэлэ Иннокентий Иннокентьевич Андросов, Маттатааҕы социальнай геронтологическай киин салайааччыта Александр Валерьевич Куприянов, урбаанньыт Ариян Русланович Мохначевскай, Майатааҕы «МУП Техкоммунсервис» салайааччыта Егор Иннокентьевич Трифонов буолаары турар быыбар бу кэмҥэ биһиги дойдубут туһугар үлэлиир, үөрэх хаачыстыбата тупсарыгар, кэлэр кэнчээри ыччаппыт сайдыылаах дьон буолан тахсалларыгар араас федеральнай программалары өйүүр «Биир ньыгыл Россия партиятын» өйүүргэ ыҥырдылар. Кинилэр бэйэлэрин хайысхаларынан үлэ-хамнас хаамыытын билиһиннэрдилэр, нэһилиэк олохтоохторун интэриэһиргэтэр боппуруостарыгар хоруйдаатылар.
Нэһилиэкпит ытык олохтоохторо Мохначевскай Егор Семенович, Мохначевскай Руслан Ефимович, Бродников Илья Николаевич, Мохначевскай Иван Иванович уонна да атыттар бэйэлэрин санааларын үллэһиннилэр. Кинилэр инники этиллибит кэскиллээх тыллары, былааннары уонна улуус салалтатын үлэтин толору өйүүллэрин биллэрдилэр, ону таһынан нэһилиэк сайдыытыгар бэйэлэрин туһааннаах баҕа санааларын, этиилэрин киллэрдилэр.
Көрсүһүү түмүгэр, олохтоохтор улуус баһылыгар уонна бөлөх кыттыылаахтарыгар аһаҕас, истиҥ кэпсэтии нэһилиэк кыһалҕаларыгар ураты болҕомтону уурбуттарын иһин махталларын тириэртилэр, инники үлэлэригэр ситиһиилэри баҕардылар. Ити курдук, көрсүһүү олус таһаарыылаахтык иллээх эйгэҕэ ааста.
Истиҥ кэпсэтии нэһилиэк олохтоохторугар «Биир ньыгыл Россия партиятын» өйүүргэ ыҥырыынан түмүктэннэ.
