Олунньу 13 күнүгэр төрөөбүт сахабыт тылын сайыннарыыга, чинчийиигэ олоҕун анаабыт, саха алфавитын төрүттээбит, бастакы лингвист Семен Андреевич Новгородов төрөөбүт күнэ, ону сэргэ төрөөбүт тыл, сурук-бичик күнүнэн бэлиэтэнэр. Онон салайтаран биһиги нэһилиэкпитигэр, олохтоох култуура дьиэтигэр Ийэ тыл, сурук-бичик күнүгэр аналлаах тэрээһин буолан ааста.
Тэрээһини музыкальнай нүөмэрдэринэн ситэрэн-хоторон киэргэттилэр:
«Күөрэгэй көрө» ырыа — Петр Дохунаев
Дария Андросова толоруутугар хомуска сахалыы матыыптар.
Ылбаҕай ырыанан Дария Андросова, Рима Фадеева
Дойдубут үрдүнэн төрөөбүт тыл уонна сурук-бичик күнүнэн, биһиги сахалар ураты дууһабыт, бараммат баараҕай талааммыт дьиэрэтэр эһиэкэйбитигэр арыллар, хамсаныылаах оһуохайбытын оройуттан тутан, эһиэкэйи эҥээриттэн ыламмыт бүгүҥҥү тэрээһини оһуохайынан түмүктээтибит. Оһуохайы таһаардылар эдэр эрчимнээх, кэскиллээх элбэҕи эрэннэрэр Дария Андросова, Петр Дохунаев уонна ытык — мааны ветерааммыт Надежда Федоровна Рожина.
Норуот олорбут олоҕо, тыына-дьылҕата тылыгар иҥэн сылдьар. Оҕо төрүөҕүттэн ийэ тылын эйгэтигэр иитилиннэҕинэ, омук кутун-сүрүн, өр үйэлэргэ муспут муудараһын этигэр- хааныгар иҥэринэр, төрөөбүт тылын, бэйэтин омугун харыстыыр киһи буола улаатар. Хайа да омук төрөөбүт тылын билэр, таптыыр сыаналыыр кэнчээри ыччаттаах буоллаҕына, тыыннаах буолар, салгыы сайдар. Тыл – бүтүн норуот национальнай баайа, кэлэр кэскилэ. Төрөөбүт тыл, сурук-бичик күнэ үтүө үгэскэ кубулуйан, сыллата бэлиэтэнэн, тэнийэн, сайдан истин!
