Алтынньы 17 күнүгэр Саха сиригэр бэлиэтэнэр Ийэ күнүгэр сөп түбэһиннэрэн ырыаҕа ылланар, хоһооҥҥо хоһуйуллар, Мэҥэ сирин бастыҥа Балыктаахпыт бөһүөлэгэр күн күбэй ийэлэрбитигэр ананан тутуллубут Ийэ скверин үөрүүлээх аһыллыытын тэрээһинэ буолан ааста.
2024 сыллаахха балаҕан ыйын 25 күнүгэр «Мэҥэ нэһилиэгэ» тыа сирин түөлбэтин дьаһалтатын көҕүлээһининэн, нэһилиэкпит дьоно-сэргэтэ олохтоох култуура дьиэтигэр мустан, бу 2025 сылга Республикаҕа «Олохтоох дьон көҕүлээһинин өйүүр программа» конкурсугар Ийэ скверин тутуу бырайыагын уопсай куоластааһынынан быһааран, ону тэҥэ утары үбүлээһин суумматын 300 солкуобайы хас биирдии нэһилиэкпит олохтооҕо биэрэн, самаан сайыммыт кылгас кэмин устатыгар үтүө бырайыак үлэтэ күөстүү оргуйан, сырдык санаа күүһүнэн тутулунна. Нэһилиэкпит көстөр сиригэр кэрэ көстүүлээх, уотунан симэммит биир ытык миэстэбитинэн буолла.
«Мэҥэ нэһилиэгэ» тыа сирин түөлбэтин баһылыга Габышев Ньургун Владимирович, «Ийэ скверэ» бырайыак сүрүн көҕүлээччитэ, Маттатааҕы социальнай геронтологическай киин салайааччыта, 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үтүө суобастаахтык үлэлээбит Куприянов Александр Валерьевич, нэһилиэкпит бастыҥ, элбэх оҕо күн күбэй ийэтэ, элбэх сиэн эйэҕэс эбээтэ Сотникова Мария Егоровна аалай кыһыл лентаны дохсун ытыс тыаһынан быһан, саҥа Ийэ сквери үөрүүлээхтик арыйдылар.
Саха киһитин сиэринэн, өбүгэбит үгэһинэн саҥа сквер аһыллыытын сиэрин-туомун, Аал уоту оттон, айах тутан, алгыс тылынан тѳлкѳтүн төрүттээн, алгыһы оҥордо Дохунаев Петр Владимирович. Арыылаах алаадьынан айах туттулар «Доруобуйа» түмсүү далбар хотуттара (салайааччы Ноговицына Марфа Иннокентьевна)
Бу үөрүүлээх күҥҥэ мустубут нэһилиэк олохтоохторугар, күн күбэй ийэлэригэр эҕэрдэ тылларын тириэртилэр:
«Мэҥэ нэһилиэгэ» тыа сирин тэриллиитин баһылыга Габышев Ньургун Владимирович.
Маттатааҕы социально геронтологическай киин салайааччыта, 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үлэлээбит, бырайыак сүрүн көҕүлээччитэ Куприянов Александр Валерьевич.
М.П. Габышев аатынан Балыктаах орто оскуолатын директора Иванов Егор Николаевич бэйэтин эҕэрдэтин тириэртэ, наҕараада туттарда.
«Мэҥэ Хаҥалас улууһугар үөрэҕирии сайдыытыгар кылаатын иһин» анал бэлиэнэн наҕараадаланна – Габышева Александра Николаевна — Мэҥэ-Хаҥалас улууһун норуотун маастара, «Үлэ албан аата» III-с степеннээх орден кавалера, РФ уопсай үөрэхтээһинин бочуоттаах үлэһитэ, «Үөрэҕириини сайыннарыыга кылаатын иһин» РФ мэтээлин кавалера, «Саха-Азия оҕолоро» фонда стипендиата, «Старшай учуутал», «Педагог-маастар», СР үөрэхтээһинин үтүөлээх үлэһитэ.
Ийэ скверин стендэлэрин ис хоһоонун кылгастык билиһиннэрдэххэ: 1 – «Кыайыы ытык ийэлэрэ» стендэҕэ Аҕа дойду улуу сэриитигэр икки уонна үс уолаттарын сэриигэ атаарбыт сэттэ ытык ийэлэрбит, 2 – «Кыайыыны уһансыбыт хорсун ийэлэр» стендэҕэ Аҕа дойду улуу сэриитин кэмигэр тыылга үлэлээбит уонна кыайыыны уһансыбыт тракторист ийэлэр, барыта 154 ытык-мааны күн-күбэй ийэлэр, 4 – «Элбэх оҕолоох эйэҕэс ийэлэр» стендэҕэ нэһилиэкпит биэстэн элбэх оҕолоох 59 күн күбэй ийэлэрбит, 5 – ««Үлэ-чиэс, хайҕал» — орденнаах уонна үтүөлээх үлэһит ийэлэр» стендэҕэ нэһилиэкпит сайдыытыгар улахан кылааттарын киллэрбит, үтүө суобастаахтык үлэлээн кэлбит орденнаах уонна үтүөлээх анал аатынан бэлиэтэммит үлэһит күн күбэй ийэлэрбит сырдык, үтүө ааттара киирдилэр. Ийэбит скверин саамай килбэйэр киинигэр турар «Албан ааттаах Герой ийэлэр» стендэҕэ нэһилиэкпит ытык мааны, күн күбэй Герой Ийэлэрбит ааттара уонна кинилэр сырдык мөссүөннэрэ киирдэ. Киэн тутта, сүгүрүйэ ааттыыбыт ытык-мааны албан ааттаах Герой Ийэлирбитин: Гоголева Екатерина Васильевна, Колесова Елизавета Давыдовна, Черкашина Екатерина Андреевна, Катакинова Анна Семеновна, Катакинова Мария Владимировна, Овечкина Елена Сергеевна, Кычкина Марфа Ананьевна.
Үөрүүлээх күнүнэн күн күбэй Герой ийэлэрбитигэр махталбытын, сүгүрүйүүбүтүн биллэрэн Герой ийэлэр оҕолорун ааттарыттан тыл эттэ үлэ ветерана Сергеева Евдокия Андреевна уонна Герой ийэлэрбит оҕолоро, сиэннэрэ, аймахтара тыыннаах сибэкки дьөрбөтүн анаммыт миэстэҕэ уурдулар.
Герой Ийэ Гоголева Екатерина Васильевна туһунан төрөппүт уола Василий Иннокентьевич Гоголев – Уйулҕан «Хоһуун таас» диэн кинигэтин быйыл переизданиелаан, «Хамначчыт кыыс дьылҕата, дьахтар тулууруттан күүстээх туох баара буолла…» диэн ааттаан таһааттарбыт, бэйэтэ автографтаах саҥа кинигэтин, нэһилиэкпитигэр Ийэ скверэ аһыллыытынан убаастабыллаах Герой ийэ оҕолоругар, Габышев Ньургун Владимировичка, Куприянов Александр Валерьевичка, Сотникова Мария Егоровнаҕа уонна автор көрдөһүүтүнэн Цыденжапова Татьяна Сергеевнаҕа үөрүүлээх быһыыга туттарылынна.
Саха Республикатын бастакы президена Михаил Ефимович Николаев 1993 сыллаахха балаҕан ыйын 2 күнүнээҕи 532 №-дээх Ыйааҕынан алтынньы ый үһүс өрөбүл күнүн Саха сиригэр Ийэ күнүнэн биллэрбитэ. Онтон ыла бүтүн Саха сирин үрдүнэн бу күнү, күн күбэй ийэлэргэ анаан тэрээһиннэр тэриллэн ыытыллаллар. Быйылгы Саха сиригэр бэлиэтэнэр ийэ күнэ биһиги нэһилиэкпитигэр «Ийэ скверин» аһыллыытыгар сөп түбэһиннэрэн тэрилиннэ. Ийэ скверин үөрүүлээх аһыллыытыгар мустубут нэһилиэкпит бука бары ийэлэрин Саха сиригэр Ийэ күнүнэн истиҥник эҕэрдэлээн туран, үтүө үгэскэ кубулуйбут бэлиэ түгэн ыытылынна. Күн күбэй ийэлэригэр бэйэлэрин истиҥ эҕэрдэлэрин, махталларын тиэрдэн туран, тыыннаах сибэкки дьөрбөтүн бэлэх ууннулар ыраахтан, чугастан кэлбит төрөппүт оҕолоро уонна оҕолор ааттарыттан сибэкки букетын туттарда урбаанньыт Николай Кириллин.
Үөрүүлээх тэрээһини «Ситим» эр дьон вокальнай ансаамбыла (салайааччы СР култууратын туйгуна Иван Прибылых), олохтоох олох-дьаһах коммунальнай хаһаайыстыбатын ырыа куттаах уолаттара, Петр Дохунаев ылбаҕай ырыаларынан ситэрэн-хоторон, киэргэтэн биэрдилэр.
Бу үөрүүлээх күммүтүгэр Мэҥэ нэһилиэгэр элбэх оҕону төрөтөн, көрөн-истэн, улаатыннаран, олох киэн аартыгар атаарбыт ытык дьоммут — күн күбэй Герой ийэлэрбит, икки уонна үс оҕолорун Аҕа дойду улуу сэриитигэр атаарбыт, Аҕа дойду улуу сэриитин кэмигэр тыылга үлэлээбит, кыайыыны уһансыбыт тракторист ийэлэрбит, нэһилиэкпит сайдыытыгар улахан кылааттарын киллэрсибит үтүөлээх, орденнаах уонна биэстэн үөһэ элбэх оҕолоох ытык ийэлэрбит ааттарын үйэтитэр Ийэ скверын аһыллыытыгар кэлэн кыттыыны ылан, үөрүүбүтүн үллэстибит ытык-мааны ыалдьыттарбытыгар барҕа махталбытын тиэрдэбит!
Истиҥ махталбытын тиэрдэбит «Ийэ скверэ» бырайыак олоххо киирэригэр саҕаланыаҕыттан түмүктэниэр диэри иилээн-саҕалаан үлэлэспит 2015-2025 сылларга «Мэҥэ нэһилиэгэ» тыа сирин тэриллиитин баһылыгынан үлэлээбит, бырайыак сүрүн көҕүлээччитигэр Маттатааҕы социально геронтологическай киин салайааччытыгар Куприянов Александр Валерьевичка, Ийэ скверэ ис хоһоонугар үлэлэспит Скрябина Анисия Даниловнаҕа, Кычкина Ия Васильевнаҕа, Стручкова Сардана Степановнаҕа, нэһилиэкпит күн күбэй ийэлэригэр, сырдык санаанан салайтаран, төрөппүт оҕолорун бэлэхтэрин – тыыннаах сибэкки букеттарын тиксэрэн, үөрүү түгэнин бэлэхтээбит нэһилиэкпит урбаанньыттарыгар Сарана Артемьеваҕа, Николай Кириллинҥа, Герой Ийэ Гоголева Екатерина Васильевна туһунан «Хамначчыт кыыс дьылҕата» саҥа кинигэлэрин бэлэх ууммут биир дойдулаахпытыгар Василий Иннокентьевич Гоголевка – Уйулҕанҥа, «Доруобуйа» түмсүү коллективыгар (салайааччы Ноговицына М.И.), кэлбит ыалдьыттары итии чэйинэн, минньигэс пловунан күндүлээбит Лука Говоровка.
Нэһилиэк ийэлэрин сырдатар көмүс буукубанан суруллубут ааттардаах, хаартыскалардаах стендэлэрдээх Ийэ скверэ дьэрэкээн уотунан сырдатыллар уоттардаах, фонардардаах, итиэннэ сквергэ тохтоон сынньанан, сэһэргэһэ түһэргэ аналлаах кэрэ көстүүлээх скамейкалардаах. Ийэ скверэ сыллата өссө тубустун, киэркэйдин! Нэһилиэкпит биир ытык сирин харахпыт харатын курдук харыстыаҕын, уһун үйэлэргэ үүнэ-сайда чэчирии турдун диэн алгыспыт маанытын аныыбыт.
Нэһилиэкпитигэр бу күн олус долгутуулаах күн буолла. Ол курдук тэрээһиҥҥэ төһө да кыттыыны кэлэн ылбаталлар, элбэх ыччаппыт аныгы сиэринэн, ыраахтан олорон дьиэлэригэр доставка оҥорон ыраах-чугас олорор күн күбэй ийэлэригэр тыыннаах сибэкки дьөрбөтүн бэлэх уунан долгуттулар, уйадыттылар, үөртүлэр, дьоллоох түгэни бэлэхтээтилэр.
