Сахабыт сирэ тымныытынан биллэр, ол онтон биһигини быыһыыр аспыт эт, үүт, сүөгэй, арыы буолар, бу астар баар буоланнар биһиги маннык 8 ыйдаах, тохсунньу тоһуттар тыйыс тымныыларын этэҥҥэ туораан олордохпут. Быйыл сайыммыт барахсан куйаас күннэри буоларын курдук бэлэхтээн, от үүнэн, кыстыыр отторун булунан, көмүс күһүммүт сир аһын арааһыттан күндүлээн, кырыа кыһыммыт кыстыгар бигэ эрэллээхтик үктэннибит. Сэтинньи 22 күнүгэр олохтоох култуура дьиэтигэр нэһилиэкпит олохтоохторугар, ыалдьыттарыгар анаан үгэскэ кубулуйбут «Идэһэ – 2025» атыы-тутуу дьаарбаҥка тэрээһинэ буолан ааста.
«Идэһэ – 2025» тэрээһиммитигэр биирдиилээн дьон быйылгы идэһэлэриттэн эт ас арааһыттан, кылгас сайыммыт бэрсибит оҕуруот аһыттан атыы-тутуу дьаарбаҥката тэрилиннэ. Ону сэргэ эрдэттэн биллэриллибит «Саамай уһун ынах тыла», «Собо – собо собооруйа» — улахан собоҕо биирдиилээн күрэхтэр ыытылыннылар, нэһилиэк тэрилтэлэрин хамаандаларын икки ардыларыгар «Көрдөөх эстафета» тэрилиннэ. «Идэһэ – 2025» атыы-тутуу дьаарбаҥка тэрээһиҥҥэ ыытыллыбыт күрэхтэр бириистэрин олохтоото нэһилиэкпит эдэр ыччата, ИП Кычкин Павел Петрович.
Биирдиилээн кыттааччыларга ананан ыытыллыбыт күрэхтэр түмүгэ маннык буолла:
«Саамай уһун ынах тыла» күрэххэ 1 миэстэ – Стручков Петр Васильевич, 2 миэстэ – Стручков Игорь Васильевич ылары ситиһэн, анал грамотанан, сэмэй бириистэринэн наҕараадаланнылар.
«Собо – собо собооруйа» — саамай улахан собо күрэх кыайыылааҕынан Ноговицын Александр Прокопьевич ааттанна уонна анал грамотанан, бирииһинэн бэлиэтэннэ.
Нэһилиэк тэрилтэлэрин хамаандаларын икки ардыларыгар ыытыллыбыт «Көрдөөх эстафета» күрэҕэр 2 хамаанда: олохтоох дьаһалта коллективын уонна олох-дьаһах коммунальнай хаһаайыстыба, «Звездочка» оҕо уһуйаанын коллективтарын холбоһуктаах хамаандалара 5 этаптаах күрэхтэһиигэ илин-кэлин түсүһэн, бэрт тыҥааһыннаах киирсиилэр буоллулар.
1 этап — «Ынах этин эрийэн фарш оҥоруу»
2 этап — «Бэлэм убаһа оһоҕоһуттан халбаһыы оҥоруу, буһарыы»
3 этап — «Блиц турнир» — 1 мүн. иһигэр боппуруостарга эппиэттээһин
4 этап — «Уччуу — учча» — анаммыт киһини таҥыннарыы
5 этап — «Көрдөөх сүүрүү»
Нэһилиэк тэрилтэлэрин хамаандаларын икки ардыларыгар ыытыллыбыт «Көрдөөх эстафета» түмүгэ бу курдук буолла:
1 миэстэ – олохтоох дьаһалта хамаандата.
2 миэстэ — олох-дьаһах коммунальнай хаһаайыстыба, «Звездочка» оҕо уһуйаанын холбоһуктаах хамаандата.
Түмүккэ миэстэтигэр буһарыллыбыт аспытын – халбаһыыбытын, саха мааны аһын – алаадьыны күрэхтэһии кыттыылаахтара, көрөөччүлэрэ бары күргүөмүнэн үөрэ-көтө амсайан, тото-хана аһаан, астынан тарҕастылар.
Биллэриибитин сэҥээрэн, ылынан, олохтоох дьаһалта, ОДьКХ уонна «Звездочка» оҕо уһуйаанын коллективтара ох курдук оҥостон кэлэн, көхтөөхтүк кыттыбыккытыгар, саамай түмсүүлээх, бэлэмнээх буолан кыайыы өрөгөйүн билбит, анал грамоталары, сэмэй бэлэхтэри туппут нэһилиэкпит тэрилтэлэрин хамаандаларыгар, биирдиилээн күрэхпит кыттааччыларыгар, бириистэри олохтообут Кычкин Павел Петровичка ис сүрэхтэн тахсар сылаас махталбытын биллэрэбит. Быйылгы кыстыгы бука бары этэҥҥэ туоруоҕуҥ! Барыгытыгар доруобуйаны, үлэҕэ, үөрэххэ үрдүктэн үрдүк ситиһиилэри, этэҥҥэ буолууну баҕарабыт! Куруук бу курдук үөрэ — көтө, инники күөҥҥэ сылдьын!
